CHIKUAPEI MAITAO 8
8
Akhai soua Midian Maiye Soushi Souha Peiyu
1Süthaisü Ephraim mainou Gideon hi paoe, “Midian maiye reih soure donou, ne daisounou Ehye kulou moe? Ne daisounou Etao hi haibüa souwe?” Sübüa puletao nou Gideon hisü vamoshoa bure.
2Ana Gideon nou puletao hi paoe, “Enou souyu ae neletao nou souyu vah sü koa zhulai toulouzü, Enou souyu vah sü hazhotou liamoe. Neletao nou hatou titouli soubaiyuma, avei khü teitei nou souyu jünou dupuhie. 3Ramai nou Midian mai vei peikhomai ahai - Oreb ae Zeeb sü neletao bah hi thoupeie. Neletao nou souyu sü Enou souyu jünou dupuhie.” Gideon nou haibüa paopei khaie, puletao vei lekha sü khaitare.
4Süthaisü Gideon ae puhye salaiyu mai kaihsü taohai Jordan rei kacho paloure. Puletao sü veare, ana ngaobamaiye sü thaihu poa tahie. 5Puletao nou Sukkoth nuhdu hi velouyu phaki, nuhdu sühi hrüa buyu maitao hi puhnou paoe, “Zhuvea Eye salaiyu maitaoye raokhao peio, daiolouzü puletao hai pouzüre, ae Etao hai Midian hi veo Zebah ae Zalmunna thaihu tahie.”
6Ana Sukkoth nuhdu hi peikho maitao nou paoe, “Neletao sü Zebah ae Zalmunna ye nüloumo hidao, Etao daisouyu donou nevei reihmai taoye sü touso peikhailai?”
7Gideon nou puletao hi chila peie, “Sükoulouzü veire! Mapao nou Zebah ae Zalmunna ye abah hi thoupeiyu kisü, Enou deiki hi shu pfüyu süüda ae süüshu nou neletaoye hroupeilai.” 8Gideon nou Pennuel nuhdu hi ve sübüa touso khore, ana Pennuel nuhdu hi hrüyu mai-a Sukkoth nuhdu hi mainou paoyu büa chila pei-a baire. 9Südonou puhnou paoe, “Enou reih veiloua dakhai veyu phaki, neletao vei kipeitaoh nasü dakho peilai.”
10Zebah ae Zalmunna hai puhai reihmai sa-a Karkor nuhdu hi bue. Teinghi palova tyahrütao vei reihmai teitei hisü reihmai thekiangou (15,000) likhei shoa baire, daiolouzü reihmai the kaihlia kai (120,000) sü southare. 11Gideon nou Nebah ae Jogbehah teinghi palo vanou reih sü huloure, daiolouzü reihkhomai ye sü buh sühi khailou moe. 12Zebah ae Zalmunna sü tutare, ana Gideon nou puhaiye sü thaihu poa kou nüloure, alia reihmai hrülaiye sü hupho rarouwure.
13Joash nahpoutu Gideon nou reih veiloua Heres ludu hilo vanou ki hi dakhai veyu phaki, 14Puhnou Sukkoth nuhdu hi nahlemai ali nüloua puh hinou ko khesü noue; alia puhnou Sukkoth hi peikhomai ae matsümai mai rainainai zhih sü paopeia rüloue. 15Süthaisü Gideon nou Sukkoth nuhdu hinou hrüa buyu maitao hi ve paoe, “Neletao nou Eye soukha ba-a baiyu sü lichokhaio. Neletao nou veahoa laiyu avei reihmaitao ye Zebah ae Zalmunna ye nüloumo hie tea touso peiba-a baire. Ana sühai sü chuo haihi bure.” 16Süthaisü Gideon nou shupfüyu süüda ae radeiki hi süüshu khesü poloua Sukkoth hi peikho maitaoye dapeie. 17Puhnou Penuel nuhdu hi kipeitaoh nasüa dakhowure, ae sühi hrüa buyu maitao-a southare.
18Süthaisü Gideon nou Zebah ae Zalmunna hi noue, “Nehai nou Tabor hinou southayu maitao sü kabüwe?”
Puhai nou “Neye raiwe, alia puletao mai hrülai nou veo nahmai bütoua bue” tea chila peie.
19Gideon nou paoe, “Puletao sü athaihou-jürai maitaoe, apfü nou napeiyu nahmaitaoe, nehai nou puletaoye southa moa baiyu thaio, Mapao zhih hinou E-a nehai ye southa laimoe.” 20Süthaisü puhnou puh nah naraio Jether hi paoe, “Tashuloua puhai ye southawo.” Ana nahle puona nanou southa bare, daiolouzü puh sü nahle maiyu donou ngaopi loure.
21Süthaisü Zebah ae Zalmunna nou Gideon hi paoe, “Ne la takou ahaiye southawo; khekai aliye sü khekai ali nou southayu phae.” Südonou Gideon nou puhaiye sü southare alia puhnou puhai vei racho hinou buyu zhusah natao sü poloure.
22Süthaisü Israel mainou Gideon hi paoe, “Ne alia nevei tyaonah taoye panou Etao peikho-a hrülo, daiolouzü nenou Etaoye Midian mai bah hinou vupa peiwure.”
23Gideon nou chila peie, “Enou neletaoye khasa-a hrülai moe, alia avei tyaonahtao-a panou neletao ye khasa-a hrülai moe; Mapao ye panou neletao ye khasa-a hrüa bailai.” 24Ana Gideon nou puletao hi paoe, “Enou neletao hinou hali kholai; neletao nou soureih souyu hinou ngaolouyu sana noubo ae bahkha khesü Eye peio.” (Daiolouzü Midian mai hai teinghi palova tyahrü mai büa sana noubo ae bahkha sü nouwe.)
25Maikhe maitao nou puh hi chila peie, “Sütao sü Etao nou asashoa neye peilai.” Puletao nou sahba ali khuloure, alia polouyu sana noubo ae bahkha khesü sühi thoupeie. 26Puhnou sana noubo khesü sühcho kai phali ngaoloue, sühisü zhusahna kukhetao, toutao, Midian veo mainou banouyu sabanü, ae racho te hi züyu mutei natao loumoe. 27Gideon nou sütao poa bashara ali souloure, alia sünasü puhvei nuhdu Ophrah hi khaire. Süthaisü Israel mai hrülai nou Ramai ye thomoa buh sühi nou ve bashara ye thotare. Haina hai Gideon ae puh vei kikhamai donou phisorü ali soure.
28Sübüa Israel mainou Midian mai jünou reih veiloue, alia puletaoye ngaopiyu sü hare. Puletao vei teidei hisü Gideon thaimo koute po raidai hai kaona-a soyu ngaoloue.
Gideon Thaiyu
29Joash nahpoutu Gideon nou dakhai ve la puh ki hinou hrüe. 30Puh hai nahmai rainai bue, daiolouzü puh sü maipfü alao nae. 31Ae Shekem hia puh hai khopfü ali bue, honapai nou puhye nahpoutu ali napeie, alia puh zhih sü Abimelek tea sapeie. 32Joash nahpoutu Gideon hai tsükhao khaolai nou thaie, ae puhye sü Abiazer khü vei Ophrah nuhdu hinou puh puo Joash ye daovuhyu buh hinou vuh peie.
33Gideon thaiyu thai, Israel mai hai Ramai ye ngaiwua Baal rahye sü thotare. 34Israel mainou puletaoye soukha peiyuna ae ngaobamai hinou vupa peiyu Mapao Ramai ye sü licholou moa baire. 35Gideon kikhamai nou Israel maiye donou daizhou koute vah soupei khaitoue touyu puletao nou kalo hai süpei more.
Currently Selected:
CHIKUAPEI MAITAO 8: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
