CHIKUAPEI MAITAO 7
7
Gideon nou Veilouyu
1Süthaisü Gideon ae puhye salaiyu mai hrülai nou shona kushuloua Harad dzüla pe hinou ve sahpao haoloua chaobuh souloure. Midian mai nou puletao buyu reilo Moreh deichi nghiyu deikho hinou fühao soua bue.
2 Mapao nou Gideon hi paoe, “Nenou salaiyu maitao hai pouyu le hie, Enou Midian maiye neletao bah hi thoupeiyuma, neletao nou la neletao vei khouko vanou veiloua baie tea paoshulai. 3Südonou nevei reih maitao hisü haibüa paopeio, ‘Mai taralia reih souyu ngaopi louzü ki hi dakhai ta-a bailai.’ ” Sübüa Gideon nou paopei khaie, mai 22,000 sü ki hi dakhai tare, ana mai 10,000 hai reih soure donou puhye koa buhie.
4Süthaisü Mapao nou Gideon hi paoe, “Nevei maitao hai chua poule hie. Puletaoye sü dzü buyu buh hi sa-a kouhkhaio, Enou puletaoye sühinou dokupa peilai. Enou mai haina hai neye sa-a talai tea paoyu mai nasü neye sa-a talai, ana mai haina hai neye sa-a taloushie tea paoyu nasü, talai moe.” 5Gideon nou puhvei maitaoye dzü buyu hi sa-a kouh-e, ae Mapao nou Gideon hi paoe, “Sei büa mü nou kouh dzü keyu maitaoye sü buh ali lova khailo, ae bah nou dzü saokeyu maitaoye sü buh kukhe lihi khailo.” 6Bah nou dzü saokeyu hai mai kaihsü doloue, ana kukhe maitao hai khoukhüloua mü nou kouh dzü ke khaitoure. 7Süthaisü Mapao nou Gideon hi paoe, “Bah nou dzü saokeyu mai kaihsü taoye panou neye sa-a reih soutalai, ae Enou Midian maiye sü ne bah hi thoupeilai. Kukhe maitaoye panou ki hi dakhai ve tawo.” 8Südonou Gideon nou kukhe maitaoye panou puletao ki hi dakhai tare, ana mai kaihsü likhei shokhai loua baie. Shokhai toua buyu maitaoye panou puletao vei na veishi ae shabe khesü poloure. Midian mainou fühao soua buyu hai puletao vei fühao khelo deikho hinou bue.
9Süzhou khei Mapao nou Gideon hi kharochi peie, “Tashulo, alia ngaoba maivei fühao hisü reih soulou khaio, daiolouzü Enou neye panou veilouyu sü peilai. 10Ana nenou reih hulou pi louzü, ne kilai Purah ye saloua puletao nou buyu fühao hisü talou khaio. 11Puletao nou daichi khaiwe touyu sü nenou süloulai, süthaisü nenou khuvei-a reih sü hulou loulai.” Südonou Gideon nou puh kilai Purah ye saloua ngaoba mainou buyu fühao hisü taloue. 12Midian mai, Amalek mai ae teinghi palova tyahrütao hai khazü me aduli nou buyu büa deikho hisü bure, alia puletao vei racho khesü rei hi venai zhoua chosha louhosou bue.
13Gideon nou sühi veyu phaki, mai alinou puh samaili hisü puhvei me haibüa paoe, “Enou me ali mue, süsü kabüwe toulouzü - raokhao pholi nou lupoa Etao vei sahpao hisü kou khyare, süthaisü sahpao nasü kaota baire.”
14Puh samai nanou chila peie, “Süsü hakukhe moe, ana Israel mai puona Joash nahpoutu Gideon vei khoche baie, puh bah hi Ramai nou Midian mai ae Etao reihmai me teitei hai thoupeiwure.”
15Gideon nou me nasü süloukhaie, deiphi nakouloua Ramai ye thoe; alia puhnou Israel maivei fühao hisü dakhai ve paoe, “Tashulo, daiolouzü Mapao nou Midian maiye neletao bah hi thoupeire.” 16Puhnou mai kaihsü taosü me asü sou zhire, alia puletao mai hrülai bah hisü shabe chekhei ae sayu dzübvü hisü mei taoloua chekhei thoupeie. 17Alia puhnou puletao hisü paoe, “Eye zhulo alia Enou souyu büa soulo; Enou puletao nou buyu fühao kaihi loulouyu phaki, Enou souyu büa soulo. 18Enou sa-a tayu me nanou shabe nghoupa peiyu phaki, neletao mai hrülai-a shabe sü nghoukhaio, alia shusoua ‘Mapao donou alia Gideon donou reih soulai’ tea shalo.”
19Gideon ae puhye salaiyu mai kaihli taonou kheitoutsü koumo jübü hie, reihkhomai nou buh lyayu thaibü, ngaoba maivei fühao kai hisü kouloure. Süthaisü puletao nou shabe sü nghoupare alia puletao bah hinou polaiyu dzübvü nasü daphere. 20Sübüa me kukhe ahai tao-a shabe sü nghoupare ae dzübvü sü daphere. Puletao bah nalova sü mei poloure ae bah zhoulo nou shabe sü poloua nghoupoa haibüa sha-e, “Mapao donou ae Gideon donou reih sü soulai.” 21Puletao mai hrülai nou lahlah buyu buh hinou lapoa fühao sü sühao-a bue, ae sühi buyu reihmai hrülai sü shusoupoa tutare. 22Gideon vei maitao nou shabe nghoupa peikhaie, Mapao nou puletao vei ngaobamaiye panou la puletao hao-haoye southava tare, alia puletaoye sü thaingou poa Zerarah lakou Beth-shittah koute tutare, ae Tabbath nghiyu Abel Meholah nuhdu koute tutare.
23Süthaisü Naphtali, Asher ae Manasseh khütao hinou mai hrülaiye sü kupaloua Midian maiye thaihu tae. 24Gideon nou Ephraim maivei deichi hinou hrüa buyu mai hrülai hisü haibüa panou kopomaiye paotae, “Takouh Midian maiye reih soukhaio, puletaoye panou tupalou more donou Jordan rei hinou poa Beth-barah koute dalo.” Südonou Ephraim mai hrülaiye kuve jüloure, alia puletao nou Jordan rei hinou Beth-barah koute sü daloure. 25Puletao nou Midian hi peikhomai ahai Oreb ae Zeeb ye nüloure. Puletao nou Ored ye Ored chuh hinou ae Zeeb ye Zeeb darkhadzü süyu buh hinou southare. Puletao nou Midian maiye thaihu poa tae, alia Oreb ae Zeeb pei sü depoa Jordan teinghi palova nou buyu Gideon hi pove-e.
Currently Selected:
CHIKUAPEI MAITAO 7: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
