CHIKUAPEI MAITAO 3
3
Shokhai Touyu Tyahrütao
1Kanaan teidei hilou soureih soukhai toumoyu Israel maitaoye zhure donou Mapao nou shokhai touyu tyahrü khesü haitao-e, 2Puhnou haihai Israel mai bonakhatao, soureih soukhai toumoyu maitaoye panou soureih soudou loure donou shokhai pei khaitoue. 3Tyahrü sütao sü haitaoe: Philistin mai nuhdu angou, Kanaan mai hrülai, Sidon mai, Lebanon deichi hinou hrüyu Hiv mai, Baal Hermon deichi hinou poa Hamath louyu ludu hi kouyu teitei-e. 4Puletaoye shokhai touyu hai Israel maiye zhure donoue, süolouzü Moses teile hinou Ramai nou puletao paipaoh hi kharochi peikhai touyu taosü zülaiho zülai mosa touyu zhure donoue. 5Südonou Israel maiye panou koa Kanaan mai, Hitmai, Amor mai, Periz mai, Hiv mai, ae Jebus mai hrohinou hrüe. 6Puletao nou süpehao hi hrüyu nah naotumai khesü nawe, ae puletao nah naotu khesü puletao nah poutumai ki khaipeie, alia puletao nou maivei bashara khesü thotare.
Othniel
7Israel mainou puletao vei Ramai Mapao ye ngaiwure, alia Mapao nghoujünou vah ashi soutare, alia Baal ae Asheroth rahye sü thotare. 8Südonou Mapao nou rarouloua Israel maiye panou Mesopotamia hi veo Kushan-rishathaim khakhe hinou po acha panou hrüe. 9Süthaisü Israel mainou Mapao hi kra-a paoyu phaki, Mapao nou Israel maiye khailupa peiloure mai ali seive peie, alia puhnou Israel maiye khailupa peie. Puh zhih hai Kaleb thaihou Kenaz nahpoutu Othniel toue. 10Mapao vei rako sünou puh hisü velou loure, alia puhnou Israel maiye süthai sa-a hrüpeie. Puhnou Israel maiye sa-a soureih soutae, ae Mapao nou Mesopotamia veo Kushan-rishathaim ye puh bah hi thoupeie, ae puhnou Kushan-rishathaim jünou reih veiloue. 11Südonou teidei hisü po raidai kaona-a soyu ngaoloue. Süthaisü Kenaz nahpoutu Othniel hai thaitare.
Ehud
12Süthaisü Israel mainou Mapao nghingao hinou vah ashi soupu takhaire, südonou Mapao nou Moab mai veo Eglon ye Israel mai jünou soukhoupu peire. 13Puhnou Ammon mai ae Amalek maiye saloua Israel mai pei hi reih soulou veiloure, ae puletao nou habe nuhdu, Jeriko nasü poloure. 14Israel mainou Moab hi veo Eglon khakhe hinou po kiacha hrüe.
15Ana Israel mainou Mapao hi kra-a soukha khoyu phaki, Mapao nou puletaoye khailupa peiloure mai ali seive peie. Puh hai Benjamin khü hinou veyu Gera nahpoutu Ehud touwe, puh hai bah nalo nou vah souyu maie. Israel mainou Ehudye Moab mai veo Eglon hi sapeina panou pove peire donou seitae. 16Ehud nou lah puhye donou pahvai thaivai heipfüyu, sentimitar raingou phali shoyu khoche ali souloure. Puhnou sünasü sah khenou puh bah zhoulova hi khikhai loure. 17Süthaisü puhnou sapeina nasü veo Eglonye peire donou potare, veo Eglon hai theataolou louyu mailie. 18Ehud nou sapeina taosü veo hi peiyu thai, puhnou sapeina pfüveyu maitaoye sü ki hi seidakhai tawure. 19Ana puhnou Gilgal pe hi chuh shokhai touyu hinou dakhai ve veo hisü haibüa paore, “Oh veo, E ne hi kheichi ali paolai.”
Südonou veo nou puhye khoyu kilai maitao hisü “Kijü pawo” tea kharochi peiwure, südonou kilai mai hrülai nou kijü patakhai toure.
20Süthaisü veo hai la puhvei kaoyu kide, kipei hinou chaobua buyu hisü Ehud nou talou loua paoe, “Neye donou chipao ali Enou Ramai hinou polai.” Veo nou puh buh hinou tashu laloure. 21Ehud nou puh bah nalo nasü thaikou zhoulova hinou khipfüa laiyu khoche nasü poloua veo pou hisü khüthou peire. 22Khoto noupu koa khoche teitei nou veo vei pou khevai loukhai toure, ae süsü puh thea nou küpa holoure. Ehud nou khoche nasü paipa moa pou hi khaiwure, alia pou hinou zhe sü küpae. 23Süthaisü Ehud nou kipah paloua kikhu sü khareih nou thoukha peire. 24Puhnou tayu thai, kilai maitao nou tapa zhuyu phaki kikhu sü khareih nou khakhai touyu ngaoloua puletao hai haibüa tsüchoe, “Puh la kaoyu kide hinou soyu phae.” 25Puletao nou khoa bubukou khaie puhsü kikhu houpa more, südonou puletao nou khareih nou khakhai touyu kikhu nasü houpa zhuyu phaki, puletao vei paopu sü sühinou thaia buyu ngaoloure.
26Puletao nou khoa bukinou Ehud sü tala loure, puhnou chuh shokhai touyu hi tukouloua Seirah nuhdu hisü veloure. 27Puhnou sühi velouyu phaki, puhnou Ephraim deichi hinou buyu nuhtao hisü shabe nghoupeie, alia Israel maiye reih soure donou kuloure, süthaisü puhnou reihmai süthai sa-a deichi hinou takoue. 28Puhnou Israel maitao hisü paoe, “Athai fülo! daiolouzü Mapao nou neletao ngaobamai, Moab maiye sü neletao bah hi thoupeire.” Südonou puletao nou Ehud thaisü fütare, alia Moab mainou Jordan rei kacholai tea buyu hinou puletaoye sü panou mai aliro rei sü kachopa loumore. 29Süzhou teithe puletao nou Moab maiye southa louyu hai mai thekirou phali southaloue, puletao hai khouko buyu ae pfüphao veishoyu maikhai toue, mai ali koute-a panou turei palou moe. 30Süzhou teithe Israel mainou Moab mai jünou reih veiloue, alia puletao vei teidei hisü po raicha hai kaona-a soyu ngaoloue.
Shamgar
31Puh thaisü Anath nahpoutu Shamgar nou Philistin mai kaihrou hai cho khourao ali nou khouthaloue. Puh-a Israel maiye vupa peiyu mai alie.
Currently Selected:
CHIKUAPEI MAITAO 3: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
