CHIKUAPEI MAITAO 2
2
Israel Mainou Ramai Chi Zümoyu
1 Mapao vei rakivamai nanou Gilgal hinou Bokim hi takouloua nou haibüa paoe, “Enou neletaoye Ejipt hinou sapapeie, alia neletao puopaoh hi apaokhai touyu teidei na hisü save thoupeie. Enou paoe, ‘Vo soukhai touyu nasü Enou hasou chileea souphe khailai moe. 2Neletaoye panou teidei haihi hrüa buyu maitaoye koa vo soulai moe, neletao nou puletao vei bashara khesü soushi souphe peilai.’ Ana neletao hai Enou paoyu büa soumore. Enou souso tea paoyu nasü soua baire. 3Südonou chuo Enou paowe, Enou puletaoye sü neletaoye donou hulai peilai more; ana puletaoye panou neletaoye ngaobayu mai panou soulaire, alia puletao vei bashara khesü panou neletaoye muhloulai.” 4Mapao vei rakivamai nanou haihai Israel maisou hi paopeiyu phaki, mai hrülai nou shusoua krare. 5Südonou buh süna zhih sü Bokim tea saloue. Puletao nou buh sühinou Mapao ye posheela-a rathoe.
Joshua Thaiyu
6Joshua nou Israel maitaoye sü lahkuku vei zha depei khaitouyu teidei sü thaoloure donou seitawure. 7Joshua hria bukisa sü Israel mainou Mapao vei kuvah souwe, alia Mapao nou Israel maiye donou khupayu vahso soupeiyu teitei ngaoyu süthai-apei maitao bukisa hai Israel mainou Mapao ye thoe. 8Mapao vei kilai, Nun nahpoutu Joshua, puh hai po 110 mailoua thaire. 9Puhye Gaash deichi reilo nou buyu Ephraim mai deichi hi buyu Timna-heres hinou poa vuhpeie. 10Maiphao süna thaita khaiyu thai, bonakha phao hisü Mapao nou Israel maiye donou khupayu vah soupei khaitouyu khesü ngaiwure.
Israel Mainou Mapao ye Thomo Tayu
11Süthaisü Israel mainou Mapao nghoujü hinou vah ashi sü soutare, alia Baal rahye sü thotare. 12Puletao nou puletao vei paipaoh Ramai Mapao, puletaoye Ejipt hinou sapa peiyu nasü thomoa puletao pehao hinou buyu rah kukheye sü thotare, ae puletao nou Mapao vei lekha rarou sü soupa peie. 13Puletao nou Mapao ye thaowua Baal ae Ashtaroth rahsü thotare. 14Südonou Israel mai hisü Mapao nou rarou loua maivei saotou saosoyu maiye panou puletao vei kini khesü saoloure. Ae puhnou puletao pehao hinou hrüyu ngaobamai bah hisü zhothou peire, südonou puletao hai puletaoye ngaobamai nghoujü hinou lalou hore. 15Puletao nou soureih soutayu sasü, puletao nou vah ashi souyu vanou Mapao nou puletaoye kozho peimore. Südonou puletao hai veasho tare.
16Süthaisü Mapao nou puletaoye souvea souhoyu mai bah hinou vupa peire donou chiku-apeimaiye seive peie. 17Ana Israel mainou puletaoye süthai-apeimai chi sü zübare, daiolouzü puletao nou khakhapfü ali büa Mapao hinou bumoa rah kukheye sü thotare. Puletao hai puletao vei paipaoh nou tayu razhai hinou tamoa ludu tarei tare. 18Mapao nou puletaoye donou chikupeimai seive peiyu phaki, Mapao nou chikupeimaiye salai peiwe, ae chikupeimai nou hria bukisa sü puletaoye ngaobamai bah hinou Mapao nou vupapeiwe, daiolouzü ngaobamai nou puletaoye souvea-a tudee buyu nasü Mapao nou ngaoloua zhuvea-e. 19Ana chikupeimai thaita khaie, puletao hai puletao paipaoh mai jünou shipu ta-a baiwe, ae rah kukheye thota baiwe. Puletao hai zhaidou ashi nasü thaobae. 20Südonou Mapao nou Israel mai pei hi raroua haibüa paoe, “Enou puletao puopaoh hi vo soukhai touyu nasü mai haitao nou züba-a souphewure. Puletao nou achi zübayu vanou 21Joshua nou thaitayu phaki shokhai toua buyu tyahrü khesü Enou puletaoye donou hulai peilai more. 22Enou puletaoye sü poa Israel maiye kabülaisa touyu zhulai, puletao hai puletao vei paipaoh mai büa Mapao vei jüpa hinou talaiho talai mosa touyu zhulai.” 23Südonou Mapao nou süpehao hi hrüyu tyahrü khesü hulai moa shokhai peie, ae puhnou puletaoye sü Joshua bah hia thoupei moe, ae puh thaiyu thaia hulai peimoe.
Currently Selected:
CHIKUAPEI MAITAO 2: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
