ISAIAH 8
8
Isaiah vei Nahpoutu hai Maikhe Maiye donou Shee Soungao Peiyu
1Süthaisü Mapao nou ahi paoe, “Larücha rüthou khaire donou chuh ali polo ae süva hisü chadu tyanou#8.1 chadu tyanou; moa mai hrülaiye panou phoulou süyu larücha nou. haibüa rüthoulo, ‘Ma-her-Shal-al-hash-baz’ (thashoa shaolouyu, ae thashoa potayu). 2Louchelou veiyu mai ahai, napao Uriah alia Jeberechiah nahpoutu Zekharia ye panou shaki soure donou salouo. 3Phazütou thaisü akhapfü nou nahpoutu ali naloue. Mapao nou nahtai na zhih sü ‘Ma-her-shal-al-has-baz’ tea salo teanou paopeie. 4Daiolouzü nahtou nasü dupa ‘Pfü’ ae ‘Puo’ tea kuloumo jünou Damaskas hi kini khe ae Samaria hi shaolouyu nakhesü Assaria hi veo nou potalai.”
Assaria hi Veo nou Vere
5 Mapao nou ahi haibüa paopue, 6“Maikhe mainou kaonaphi-a kükou peiyu Shiloah reidzü#8.6 Shiloah rei: Rei haina hai Jerusalem vei teinghi palova nou dzünghou dushoyu ali hinou küpawe. sü malaiwua veo Razin ae Ramaliah nahpoutu veo Pekah ye ngaopi shoyu#8.6 Hai nanou kaoyu phae ngaopi shoyu; Hebrew lesa shoyu. donou, 7Mapao nou chuo Judah teidei hisü Assaria hi veo alia puhvei reihmaitaoye sü panou reidzü duveyu phaki reipe teitei hia dzü nou pa küyu büa küvelai. 8Sübüa küveyu sünou Judah teidei teitei sü naolaiwulai, alia puletao ngu jünou la-a ae na buyu veishi sü phoutao loulai.”
Ramai nou Etaoye koa bupeilai! Puhvei shouh nou teidei sü vupeilai.
9Tyahrü khemaitao, nuh teidei kadoukou nou hrüa buyu maitao, keilo, neletao nou soureih soure donou tudalou, ana ngaopilo; reih soure donou soudalo, ana pilo. 10Neletao nou kabüa vah soulai touyu khesü tsüchodah khailo, ana vete khailou laimoe; neletao nou chi sü paolai, ana hamako bailai, daiolouzü Ramai nou Eye koa salai peilai.
Mapao nou Rachipaolawo hi Paopeiyu
11 Mapao nou Eye chih shoa nou maikhe mainou tayu ludu hinou taso tea haibüa paoe, 12“Maikhe mainou vah ashi soulai tea sou-a buyu hisü ne louzhoso, ae puletao nou ngaopi buyu khesü ne piso. 13Khoukhoulai Mapao E hai sheewe touyu sü sülo, Eye likhei nenou khuhao-a tsükhoulai alia ngaopi bailai. 14E hai sheesha touyu donou maikhe mainou chuh linou phi sülouyu büa ahinou sülouwe ae sorüh hinou mulouyu büa Israel ae Judah hi maitao alia Jerusalem hi maitao hai muloulai. 15Mai alaosou phi süloulai; ae puletao sü kaotalai alia petalai, puletaoye sü muloulai alia satawulai.”
Thaimai hinou Vere-pare Nou-a Laiyu Maiye Tukhayu
16Avei rozümaitao Ramai nou ahi paopeilai touyu chitao soutaosou pokhai toulo, 17Mapao louzü puhvei maitao hinou puh pah pfüku tare, ana Ewo louzü puhye louchewe alia avei areih sü puh hi bue.
18Ewo louzü hai hinou Mapao nou ahi peikhai touyu nahmaitaoye koa bue, Khoukhoulai Mapao vei vebuh hai Zion deichi hinou bue, ae puhnou Etaoye Israel mai hi hriyu chipao panou soure donou seive khaitoue.
19Ana maikhe mainou ve neletao hisü “Thaimai hinou ae keingumai hinou noukhaio” tea polai. Puletao nou haibüa paolai, “Daiolouzü maikhe mai hai thaimai hinou ae neletao hinou hria buyu maitao thaosoua daie velai touyu sü nouyu kaomowu?”
20Neletao nou puletao hisü haibüa chila peilai, “Mapao nou Eletao hi doupeiyu khesü keilo! Keingumai ae thaimai ko pola-apei maitao nou paoyu sü keiso, puletao nou paopeiyu hinou haveih ali koute-a palai moe.”#8.20 Phoure 20 nahai Hebrew hi sheesha toumoe.
Veahoyu Vere Teile
21Maikhe mainou veahosho-a alia houzüa nou teidei teitei hisü takou-takhelai. Puletao houzüyu ae lekhararou hinou puletao vei veo alia Ramai ye chaalai. Puletao nou ratei hi zhukheyuma, 22ae deiphao hi zhuyuma puletao nou hali-a ngaolai moe, ana veahoyu ae zhiteiyu likhei ngao-a bailai, zhitei touyu buh hisü puletaoye laithouwulai.
Currently Selected:
ISAIAH 8: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
