ISAIAH 7
7
Veo Ahaz donou Paoyu Chipao
1Uzziah tyao, Jothan nahpoutu Ahaz nou Judah hi veo soua buyu teile hinou Sairia hi veo Rezin ae Israel hi veo Remaliah nahpoutu Pekah nou Jerusalem hi soureih souloue, ana puletao nou reih sü hulou louhoa baire.
2Judah teidei hi reih souloure donou Sairia mai nou Israel maiye chavei loure she touyu ko chouve loukhaie, veo Ahaz alia puhvei mai hrülai nou pinguyu hai teikhai nou süübe hülüyu büa lüre.
3Süthaisü Mapao nou Isaiah hi paoe, “Ne nahpoutu Shear Jashub ye saloua ve veo Ahaz ye daotawo. Ne hai puonah nou puhye sü sabanü dzüsao mai dou ludu hilo kouyu dzükhao reilova hinou dzü popayu buh akhai hinou bua ngaolai. 4Puh hi haibüa paopeio, ‘Leikei-a bulo, nasei tea bubaio, piso, moyuma hobvü haibvüa leavea buso, daiolouzü veo Rezin ae puhvei Sairia maitao alia Remaliah nahpoutu veo Pekah vei lekha-rarou nasü nenou ngaopire hai mei deiyu süüpotao jünou ngaopi pure halia hae. 5Daiolouzü Sairia nou Israel mai ae Remaliah nahpoutu ye koa neye haibüa soushilai touwe, 6Khe, Judah teidei hi reih hulou Etao nou polou laishe, alia Tabeel nahpoutu ye panou veo soulou laikhe.’ ”
7Ana Mapao Enou puletaoye sü panou haibüa soulou laimoe touyu sü paopawe. 8Daiolouzü Sairia jünou Damaskas-a dupu hie, ae Damaskas jünou veo Rezin-a khoupu hie. Alia po rairoungou levai hinou Israel maiye sü panou peposasa-a hrüyu tyahrü ali soupeilai. 9Israel jünou Samaria dupu hie, Samaria jünou veo Pekeh-a khoupu hie.
“Neletao nou lülouche loumore toulouzü, neletao lalou hoa bailai.”
Immanuel vei Shee
10 Mapao nou veo Ahaz hi paopue, 11“Nevei Ramai Mapao hinou shee ali kholo, sünasü nenou thousho-a buyu thaimai buh hinou laiho moyuma kusho-a buyu raki hinoulai.”
12Ahaz nou chila peie, “Enou shee nasü kholai moe, daiolouzü Mapao ye louche moa kabü laisa tea Enou zhulai moe.”
13Süthaisü Isaiah nou paoe, “Oh veo David vei kihikha maitaore, haihai keilo. Neletao nou maiye souchoroyu hai taile hie tea Ramai ye souchoro peipulai hie tea chovu? 14Südonou Mapao nou neletao hi shee ali peilai, süolouzü loumainah ali nou nah hrüloua nahpoutu ali naloulai, ae puh zhih sü Immanuel#7.14 immanuel: Haina vei ko hai “Ramai nou Etaoye koa bue” touwe. tea salai. 15Nahtou sünanou dupa aveih ashi sükulouyu phaki, maikhe mainou chonaodzü ae leivudzü toua bulai. 16Ana sübüyu teile koumo jünou neletao nou ngaopi-a buyu veo ahai vei teidei khesü soushi khaia panou mai ali-a bumoa bailai.
17“Mapao nou ne hi, nevei maitao pei hi, alia nevei kihikha maitao pei hisü daoh Judah hinou Israel maitao nou ratayu nou poa zhou koute vepakhai moyu veahoyu sü pove peilaire – puh nou Assaria hi veoye sü neletao hi seithou peilai.
18“Süzhou teithe sü Mapao nou ka dousho-a buyu Ejipt maiye panou khaomai zhaoveyu büa velai, alia Assaria maiye panou laivoutu büa velai. 19Puletao nou velou deichi deirao, alia poube shube buyu dei teitei hisü panou phoutao loulai.
20“Süzhou teithe Mapao nou Assaria mai vei veo hinou pei soumaiye ngaloua panou neletao vei peishu, mümai ae khoumai khesü bipeilai.
21“Süzhou teithe tatamai ali nou cholou ali ae nghikü ahai likhei bubaiyuma, 22puletao nou rukhalou süyu chonaodzü sü ngaoloulai. Daiolouzü teidei sühi shokhai touyu maitao nou chonaodzü ae laivoudzü tou-a bulai.
23“Süzhou teithe, veishoa buyu darkha kipei, darkhabe thethe bua muh paohao louhoa buyu buh khesü shube ae poube khenou paopa phoutsüa bailai. 24Buh sükhe hisü mainou kha-sou phoutouyu buh soutawulai, alia teidei teitei nou poube ae shube nou paopa phoutao-a bailai. 25Shinamara daothou toua buyu deichi khesü shube süübe khenou paopaloua mai ali-a velai moe. Buh sükhesü soukhaona khenou pou touyu buh souwulai.”
Currently Selected:
ISAIAH 7: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
