ISAIAH 63
63
Tyahrütao Peihi Mapao nou Veilouyu
1“Edom hinou velouyu nasü thaoge? Bozrah nuhdu hinou sabanü homarayu tyanou tutoupoa khouko pfüsho-a taveyu nasü thaowe?”
“Hai nasü Mapao-e, khouko bushoa khailu peire, ae veilouyu sü paosü peire donou tavewe.”
2“Nevei sabanü sü daisounou darkhadzü süyu maivei sabanü büa homarawe?”
3 Mapao nou chila peie, “Enou tyahrü khesü darkha dzü süyu büa deipei, ae mai linoua Eye soukha moe, Enou puletaoye sü avei lekha-rarou hinou deisasa peie, südonou puletao vei zhe nou avei sabanü sü zhe dawure. 4Daiolouzü Enou avei maitaoye khailu peire teile sü vere, ae puletaoye ngaobayu maitaoye khüngu phoure teile-a vere. 5Enou zhu veyu phaki, mai linoua Eye soukha peire mai ali-a hakhaie, Esü khupare, ana avei lekha nasü nou Eye soukhoupu peia Enou veilouyu nasü ngaoloue. 6Avei lekha nasü nou pfüa Enou tyahrü taoye sü taidei sasa peire, ae avei rarou hinou puletaoye sü soushikhai peiwure. Enou puletao vei hriyu zhe sünou deiphi hisü lazü peie.”
Mapao nou Isreal Maiye Zhuvea Leshi Peiyu
7Enou Mapao vei tobai soumoa leshiyu paolai,
Mapao nou Etaoye donou soupei khaitouyu teitei donou,
ae Puhnou veisho-a Israel maiye zhuvea leshi peiyu ae tobai soumoa leshi peiyu donou Enou puhye paosholai.
8 Mapao nou paoe, “Puletao hai avei maitaoe, hakilia ahi puletao nou dalai moe.” Südonou puhnou puletaoye sü veahoyu hinou khailupa peiwure. 9Puletao nou veahoyu hinou khailupa peiyu hai rakivamaiye seive khailupa peimoe, ana Mapao puh vuzünou tave khailupa peie. Puhvei leshi zhuvea sünou puletaoye khailupa peie. Latayu teithe teile teitei hi puhnou puletaoye sü süthaisa-a tapeie. 10Ana puletao nou puhye khaitya-a dure, alia puhvei sheeyu rakoye sü le souvea peie. Südonou puhnou puletao vei ngaobamai souloua puletaoye reih soue.
11Süthaisü puletao nou raichoki puhvei kilaiwo Moses vei teile nasü licho loure, ae puletao nou haibüa noue, “Puhvei maitaoye zaidu hinou sa-a kachopa peiyu Mapao sü daiki vetare? Puhvei maitao hi puhvei rako thoupeiyu Mapao sü daiki bue? 12Moses bah zhoulo nou koa tapeiyu Mapao, teisa puhvei zhih aveih aduso panou ngaore donou puletao nghoujü nou zai dzü soukoro peiyuna, 13zai dzü thoushoyu hinou puhvei maitaoye sata-apeio puhsü daiki bue?”
Vünai hinou rhei ali nou tayu büa puletao hai phi süloulai moe. 14Kikhaorü taoye deikho hinou sa-a tayu büa Mapao vei rako nou puhvei maitaoye panou so-chaoyu sü peilai. Puhvei aduso ae khouko ava nasü panou ngaore donou puhvei maitaoye sü süthaisa-a tapeie.
Zhuvea Peire donou Veachi Paoyu
15Raki hinou ae nevei sheeyu alia khouko ava buh hinou Etaoye zhukou peikhaio. Nenou Etaoye licho peiyu ae nevei khouko sü daiki vetare? Nenou Etaoye zhuvea leshi peiyu sü kalova vetare? Etaoye ngaipeiso. 16Daiolouzü ne sü Etao puo-e. Etao poupaoh Abraham ae Jakob sü Etao nou ngaomoe, ana Mapaowo, ne louzü Etao vei puo-e, Etaoye tobai soumoa khailupa peiyu nasü ne baie. 17Oh Mapaowo, ne daisounou Etaoye panou nevei ludu hinou tamah tamo tawe? Ae Etao vei le sü daisounou soukhousho peiwua neye panou ngaopilou moge? Nevei kilai maitao donou ae teisa nou nevei mai soua buyu maitaoye donou zhuvea Etao hi dakhai vepeio.
18Phajü touli hai nevei sheeyu maitaoye sü ngaoba mainou hulaiwure, puletao nou nevei sheeyu Rathoki nasü taisasare.#63.18 Phoure 18 nahai Hebrew hi sheesha timoe. 19Nenou Etaoye sü bakha ali-a khasa-a hrümoyu büa soupeiwure, ae Etao hai nevei mai moyu büa soupeiwure.
Currently Selected:
ISAIAH 63: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
