ISAIAH 62
62
1Zion nou veilouyu sü
teithepayu büa ae Jerusalem ye khailupa peiyu nasü meivabvü büa valou mo koute,
honapaiye donou E ngasou bulai moe.
2Oh Jerusalem, tyahrü kukhe taonou nenou veilouyu sü ngaolai,
ae veo maitao nou nevei kathe sü ngaolai.
Neye sü zhih ashu ali nou kulai;
Mapao nou zhih sapeiyu nasü nou kulai.
3Ne hai veishoyu vepeirü ali büa Mapao vei bah hinou bulai.
4Neye sü “Thaowua tayu pai” tea sapulai moe,
moyuma neye “Hulaiyu pai” tea kupulai more,
ana neye sü “Asah sü honapai-e,”
ae nevei füdei sü “Shanghi soulouyu Pai,” tea kulai.
Daiolouzü Mapao nou neye jüpa-e,
alia nevei füdei nasü puhnou maipu ali büa khopeilai.
5Khemainah ali nou loumainah aliye nalouyu büa neye Sou-apeio nou neye naloulai,
alia shilaiyu nanou nghilaiyu naotupaiye donou asayu büa nevei Ramai Mapao nou neye donou asalai.
6Oh Jerusalem, nevei kivo vahi Enou reihkhaomai khaipei khaitoue,
puletaoye sü panou hea-khei-a ngasou buso.
Mapao hinou buyu maitao,
thaokhai toumoa vah soua bulo, asosouo.
7Alia Jerusalem hai soushupu loua panou deiphao maiye paoshomo koute puletaoye panou asosouo.
8 Mapao nou haibüa chaachou souwure,
ae puhvei khouko nou haibüa soulai:
“Neletao vei shinamara khesü panou neletaoye ngaobayu maitaoye toupu khailai more,
alia vakou maiye panou neletao nou teroua soukhai touyu thoudzü khesü toupulai more.
9Ana hai khesü soupfüa pojü khaitouyu maikhe mainou toulai,
ae Mapao ye paosholai;
alia hai khesü pove jükhai touyu maitao nou avei Rathoki hinou tousolai.”
10Jerusalem hi maitaore, nuhdu hinou vakou tapalo,
maikhe maiye panou dakhai vere donou ludu sü soukhaio!
Ludu adu sü soulou khaio,
ludu hi buyu chuh khesü soushee-o,
mai khemaiye panou süloure donou ludu hi shee ali soukhai peio.
11 Mapao nou deiphao kainghou adai hi haibüa shapaowe:
“Jerusalem hi hrüyu maitao hi haibüa paopeio,
Mapao nou neletaoye khailupa peire donou laire,
puhnou khailupa peikhai touyu maitaoye sü koa salaire.”
12Neletaoye sü “Ramai vei Sheeyu Maitao,”
ae “Mapao nou khailupa peiyu maitao” tea kulai.
Jerusalem ye sü “Ramai nou Leshiyu Nuhdu”
ae “Ramai nou Thaolai moyu Nuhdu” tea nou kulai.
Currently Selected:
ISAIAH 62: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
