ISAIAH 35
35
Sheeyu Ludu
1Hiphao ae radeiki sü sasho laire,
radeiki hinou poupa khesü pah pata laire.
2Radeiki nasü sasho-a nou shusoua lou soulai,
hüvei shoyu Lebanon Deichi büa hüvei sholai,
alia Karmel ae Sharon nou dei veiyu büa veilai.
Mai hrülai nou Mapao vei khouko ava ae puhvei aduso sü ngaolai.
3Lelou hoa buyu bah khesü soukhou peio,
ae talou hoa buyu phi khesü souchü peio.
4Ngaopia nou areih hayu maitao hisü haibüa paopeio,
“Khouchilo alia ngaopiso!
Ramai nou tave neye khailupa peilai,
ae neye ngaobayu maitaoye sü puhnou khüngu phoupeilai.”
5Süthaisü nghichayu mainou ngaoloulai,
ae noupe-a buyu mai nou chouloulai.
6Phibah shiyu mai nou kho-shu büa tuta loulai,
ae la hayu mainou sasho-a nou lou soulai.
Radeiki hisü nou dzüla palai ae reidzü sü külai.
7Mei büa soushoa buyu vünai sü zai datalai,
ae radeiki hisünou dzüla küpalai.
Lakhao khenou hrüa buyu buh hisü pounghou ae süünghou tsüpaloulai.
8Sühisü dushoyu ludu ali talai,
alia ludu sünasü “Sheeyu ludu” tea kulai.
Mah souyu mai nou ludu süna talai moe,
ae voyu mai-a hai hisü mota laimoe.#35.8 Hai nanou kaoyu phae voyu mai-a...mota laimoe; Hebrew hi sheesha moe.
9Sühisü chipeikhaodu-a bulai moe,
moa rekhaona taralia talai moe.
Ludu sühisü Mapao nou khailupa peiyu maitao nou ta-a ki hisü veloulai.
10Puletao nou asasho-a nou lou soupoa Jerusalem hisü velou loulai,
puletao nou teisa sava-a hrülai,
alia veahoyu ae dongai pfüyu bulai moe.
Currently Selected:
ISAIAH 35: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
