ISAIAH 34
34
Ramai nou Puhye Ngaobayu Maiye Tudeire
1Oh tyahrütaore, tave jüloua keilo! Deiphao teitei ae sühinou hrüa buyu mai hrülai panou tave keikhaio. 2Daiolouzü Mapao nou tyahrü hrülai ae puletao vei reihmai hrülai pei hi rarou loure. Puhnou neletao mai hrülaiye sü souhakhaire donou soudawure. 3Puletao vei thaiphao sü daovu peilai moe, ana laikhaiwua panou tangua bailai, alia deichi teitei hisü panou zhe nou külai. 4Rakiva buyu khouh teinghi ae teivu khesü dekou ta-a bailai, ae raki teidei sü larükao ali büa zhaota-a bailai, alia rakiva buyu teivu khesü darkhabe vanou moa doushibe vanou süünghou raitayu büa raita-a bailai.
5 Mapao nou raki vanou puhvei khoche sü soudaloure, haina sünou Edom mai pei hi ae puhnou soushi souhawulai tea buyu maitaoye sü souhawulai. 6Puhvei khoche hisü zhaotu alia nghitu hai poa sheelayu phaki zhe ae southa neakhai touyu büa taolai. Daiolouzü Mapao nou Bozrah nuhdu hinou posheelayu sü soulai, ae Edom teidei hisü nou maiye southa sholai. 7Maikhe maiye chode dathayu büa dathawulai, sübüa puhtao vei teidei sü zhe nou külai ae southa nou holoulai. 8Daiolouzü Mapao nou khüngu phoure teile ali bue, ae Zion ye khailupa peire po ali bue.
9Edom hi rei khesü kolas data-a bailai, ae nai sü meithou chuh vitalai, alia teidei teitei sü mei deiyu buh souwulai. 10Hea-khei sü mei tao-a bulai, meikhao sü teisa nou khaoa bukoutelai. Teidei sü maiphao teitei hinou shi-a bailai, alia mai ali koute-a teidei sünasü tacho talai moe. 11Teidei sühisü tuturu ae leche nou buyu buh soutawulai. Mapao nou Edom sü soubürarou peilai ae southou shizhu mosou khaipeiwua panou hasü maiye choha-a bailai. 12Teidei sühisü vemai ali-a bulai moe, ae süthai peiyu mai ali koute-a ha-a bailai. 13Raishuh khenou veo fühao hi ae reihkhaobu khesü tsüpa phouloua bailai, alia hai hisü lakhao ae rehou nou hrüyu buh soua bailai. 14Rekhaona khenou buh sühisü takou takhe-a bulai, alia khei vei rashitao-a sühinou ve daolai. Buh sühi sünou kheikou hai rapfüpai nou ve soyu sü soulai. 15Buh sühisü raohou khenou phe souloua dzü dzülai, toutu koloulai alia leche hai-a lahkuku vei reidzü ae reikü koa bulai.
16 Mapao vei larübvü hi rüthou khaitouyu hrikhaona taosü phoukhaio. Haitao hai ali koute-a sühisü halai moe, ali koute-a lahkuku vei reidzü ae reikü hai halai moe, papa buche khai-a bulai. Daiolouzü Mapao nou sübüa soulai tea kharochi peiwure; puhnou sükhesü pove jüpeilai. 17Mapao nou puletao hisü teidei zhi peilai, ae lahkuku vei zha sü peilai. Puletao nou buh sühisü teisa nou hrüyu sü souwulai, ae khaphao teitei nou buh sühisü hrüa bubailai.
Currently Selected:
ISAIAH 34: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
