EZEKIEL 23
23
Mah Souyu Tou Nahai
1 Mapao nou ahi haibüa paoe, 2“Thai-a bailaiyu maipure, teile ali hi pfümai ali hai nahtouna ahai bue. 3Puhai nou nahle-a buki Ejipt hinou hrüe ae sühinou puhaiye sü mainou sabu sazü peia puhai sü khakhapfü soutare. 4Tsünapai zhih hai Oholah#23.4 oholah: Hebrew maila hinou zhih haina vei artha hai “honapai vei rathoki”. toue, (puhnou Samaria maiye paonüdawe), ae nahpai zhih nou Oholibah#23.4 oholibah: Hebrew maila hinou zhih haina vei artha hai “avei rathoki sü honapai hi bue”. toue (puhye sü Jerusalem paoe). Enou puhaiye sü nakhei loue, ae puhai nou eye nahpoutu nahnaotu taoli napeie. 5Oholah nou avei soua bulikhu honapai hai honapai vei jüpayu Assaria maiye thainü loure ae khakha tare. 6Puletao hai sabanü papayu tyanou raibütoua banaoyu soureih mai, nuh teidei khoyu mai, ae peikhoyu maitao; puletao hai nahle-a nou hüvei shoyu ae rhei pfüyu soureihmai khaitoue. 7Honapai nou Assaria vei peikhomai hrülai hi khakha tare, ae honapai vei reshiyu sünou süthaisa-a puhye panou Assaria maivei bashara khesü thotare ae lah puhye sü souzhai loure. 8Honapai nou Ejipt teidei hinou nahle-a buki khakhapfü soutayu nasü baimoa soutapure. Honapai nou loumainah soua bukinou poutumaiye sabu sazü tare, ae puletao nou puhye sü khakhapfü soua po-e. 9Südonou Enou honapaiye puhnou jüpashoa buyu puhnou leshiyu Assaria mai bah hi thoupeire. 10Puletao nou honapaiye sü sabanü phakhai touloua baitou tea khaipeie, puhvei nah poutu ae nahnaotu maitaoye sü nüloure, alia honapaiye sü khoche nou daothawure. Honapai vei ko hai buliki nou hrüyu naotumaitao nou kupoa nou bue.
11“Honapai vei thaihoupai Oholibah nou hai khesü ngao-a buyuma honapai hai Oholah jünou shipure ae khakhapu tare. 12Honapai nou Assaria mai, nuh teidei khoyumai, peikhomai, reihna tufüa buyu reihmaitao, rhei pfüyu peikho maitao ae hüvei sho-a buyu nahle maitaoye sü jüpapu loure. 13Honapai nou sheemoa hrüyu hrü sü Enou ngaoloure, puhai mai ahai kheinou ludu ali hinou ta-a baire.
14-15“Honapai hrü veimoyu hinou shipulailai tare. Babilon maivei peikho maitao vei zhurai hai kivo vahi daokhai touyutao ae rükhai touyutao, puletao vei khya hi sah nou phupfüyu ae zhainga veisho-a pei hi phupfüyu khesü honapai nou ngaolou khaie; puhnou dzüpa loure. 16Honapai nou sütao hai ngaolou khaie, jüpasho loure ae Babilon mai hi kopo maiye seitare. 17Babilon mainou honapaiye sazüre donou veloure. Puletao nou honapaiye sü sabu sazü peia puhye souzhai peiyu thai, honapai nou puletaoye sü ngaoraloua nou puletao hinou tare. 18Honapai nou dukhea nou khakha tare, ae mai hrülai nou puhye sü khakhapfü soua nou süloure. Enou puh jürai paiye ngaorayu büa puh-a ngaora loure. 19Honapai nou nahle-a buki Ejipt hinou khakhayu büa khakhapu tare. 20Honapai hai rekaleyu donou rheisüh moa rhei büa soushiyu poutu maitao nou thainü loure.” 21(Oholibah, nenou Ejipt teidei hi buki, ne nahle-a buki mainou pa nevei naonao marasoua ae maiye panou sabu sazüyu nasü nenou soupunü loure.)
Ramai nou Thaihoupaiye Tudeiyu
22“Südonou chuo Oholibah, Ramai Mapao nou haibüa paoe: nenou ngaora-a thaotayu nevei leshiyu maitaoye sü panou ne pei hi raroulai ae Enou puletaoye save neye panou sühao loulai. 23Enou Babilon hi mai, Kaldea mai hrülai, Pekod, Shoa, alia Koa maitao, ae Assaria mai hrülaiye sü save peilai. Enou zhurao veishoyu nahle maitao, peikho maitao, nuh teidei khoyu maitao ae rhei pfüa soureih souyu hi peikho maitaoye sü save jüloulai. 24Puletao nou ne pei soureih soure donou reilova nou rheiluki ae rhei pfüa reihmai taoli hai sapoa nou veloulai. Puletao nou rü ae hupeirü pfüa neye sühao loulai. Enou neye sü puletao vei bah hi thoupeilai ae puletao nou neye sü lah puletao vei chikha thaifüa chiku peilai. 25Enou ne pei hi lekhayu thaifüa neye sü panou puletao nou soupeilai. Puletao nou nevei nghou ae noubei sü vade loulai ae nevei nahmaitao-a southalai. Puletao nou nevei nahnaotu khesü ne hinou potawulai ae puletaoye sü hria mei nou deitha peilai. 26Puletao nou nevei sabanü khesü paiphalai ae nevei muteiyu zhusana khesü poloua bailai. 27Nenou Ejipt hi bukinou hrü ashi hrüa sashi-a laiyu nasü Enou neye panou soupu khailai moe. Nenou Ejipt maiye sü lichopu laimoe ae bashara khesü zhua zhupu khailai moe.”
28Ramai Mapao nou paoe, “Nenou ngaora-a buyu maitao bah hisü Enou neye thaothou peiwulai. 29Ae puletao nou neye ngaorayu donou nenou soukhai touyu veishi sü ne hinou polaiwulai ae neye baitou tea thaokhai peilai, süthaisü ne hai khakhapfü ali-e touyu mai hrülai nou süloulai. Daiolouzü nenou sashia khakhayu donou. 30Haibüyu khesü ne hi vewe. Ne hai tyahrütao vei khakhapfü soutare ae puletao vei basharatao nou lah neye souzhai loure. 31Ne jüraipai nou tayu ludu nasü nenou thaifüa tare, südonou Enou honapaiye panou tudee peiyu chapai hinou ne-a panou kelai”
32Ramai Mapao nou paoe,
“Ne jüraipai nou keyu chapai;
duyu ae thoushoyu na hinou ne-a kelai.
Mai hrülai nou neye konüa panü soulai;
daiolouzü chapai nasü phoutao bue.
33Pai sünanou neye veahoyu sü peilai ae panou lulai,
süna hai ngaopiyu ae haka tayu pai-e,
süna hai ne jüraipai Samaria vei pai-e.
34Nenou süna ke khai touloulai,
ae sünavei pepoyu pe nou nevei naonao sü shasasalai.
Ramai Mapao Enou hai sü paoe.”
35Chuo Ramai Mapao nou haibüa paoe, “Nenou Eye ngaiyu donou ae ahi nou tarei tayu donou, nenou khakha-a sashi tayu donou veahoyu sü nenou ngaolai.”
Ramai nou Toupfüna Ahai Kheinou Tudeiyu
36 Mapao nou ahi haibüa paoe, “Thai-a bailaiyu mainare, Oholah ae Oholibah puhaiye tudeere donou souda loude homoe? Puhai nou ngaorayu vah soukhai touyu khesü puhai hi paopeio. 37Puhai nou khulou vah sü soure ae maiye southare — puhai nou basharatao hinoukhulou vah soure ae puhai nou Eye nah napeikhai touyu nahpoutu khesü southare. Puhai nou avei nahmai hai southaloua basharatao hi poa sheela peire. 38Puhai nou vah ashi sütao likhei soua baimoe. Puhai nou avei rathoki sü souzhaiwure ae Enou soushu peikhai touyu soteithe nasü reipei more. 39Puhai nou avei nahmaiye southa loua basharatao hi posheela peiyu teithe zhou nou avei rathoki hi veloua souzhai peire.
40“Puhai nou kadou sho-a buyu maitaoye puhai hi vepeio tea kopomaiye seiho kukhai kukhai-e, ae maikhe mai nou puhai hisü ve-e. Puhai nou dzü khülouwe, ngheiteipou nalowe ae zhusana sü thouloua maimou sü souloue. 41Puhai nou züphao aveih hisü bue, sü hinou taibel sü khailoua na aveihli khailoue, ae Enou puhai hi peikhai touyu poukai nüvei ae oliv theadzü khesü khailoue. 42Chaochaosoua laiyu maime ali vei paikho sü chou-e ae poutumai me ali hai radeiki hilova nou puhai hisü velou bue. Puletao nou baosa sü puhai bah hi thoupeie ae hüvei shoyu vepeirü sü puhai pei hi rüpeie. 43Süthaisü Enou lah ahi paoe, mainou sazü sabu-a sousasa chekhoyu naotupaiye sü chua puletao nou khakhapfü soua koa nou bubaire.#23.43 Phoure 42-43 nahai Hebrew sheesha moe. 44Puletao nou khakhapfü haina ahai hisü vekhai khai-a bure. Puletao nou hrü shiyu Oholah ae Oholibah hisü vekoute-a bure. 45Acheche maitao nou puletaoye sü khulou vah souyu donou ae maiye southayu donou paomah paoshiwulai, daiolouzü puletao nou khulou vah ashi sü soua nou bure ae maiye southayu donou puletao vei bah hisü zhe taore.”
46Ramai Mapao nou haibüa nou paoe: “Mai shiyu maime ali saveloua puhai vei nakhesü panou shaolo. 47Maime sünaye panou puhaiye chuh nou deipeio ae khoche sü poloua panou daopeio, puhai vei nahmaitaoye panou southa peio, ae puletao vei ki khesü panou mei deipeio. 48Teidei teitei hisü Enou pa khakha-a hrü ashi hüyu sü bupulai more, sübüa naotumaiye panou ngaopi loua khulou souyu ae hrü ashi hüyu sü soupulai moe. 49Ae mitoupfüpai ahaire, ne hainou hrü ashi hüa khulou souyu ae bashrataoye tho-a mah souyu donou tudee peilai, süthaisü ne hainou E hai Ramai Mapao-e touyu sü süloulai.”
Currently Selected:
EZEKIEL 23: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
