EZEKIEL 22
22
Jerusalem nou Soumahyutao
1 Mapao nou ahi haibüa paoe, 2“Thai-a bailaiyu mainare, maiye southayu mainou phoutao-a buyu nuhdu nahi chikure donou ne souda loure homoe? Puhnou ngaorayu vah haso soukhai touyu khesü sheesha tea nou honapai hi paongao peio. 3Ramai Mapao Enou paoyu chipao khesü nuhdu nahisü paopeio. Neletao hai lah neletao vei thaihou jürai mai taoliye southayu donou ae basharataoye thota-a lahye souzhai louyu donou neletao vei teile sü velaire. 4Neletao hai maiye southayu vei mah bure ae basharataoye souyu donou lah neletaoye souzhai loure, südonou neletao vei teile sü vere, neletao vei teile sü chere! Südonou chuo Enou tyahrütaoye panou neletaoye ngaora-a konülai ae neletao hai mai hrülai vei jünü sü panou soulai. 5Neye nghia buyu tyadeitao ae hosho-a buyu tyadeitao nou neye sü ngaora-a konülai, daiolouzü neletao hi chikha touyu ali-a hazei toure. 6Israel maivei süthai-apei mai hrülai nou lah vei pfüchi nasü louche loure ae maiye sü southare. 7Nuhdu hi hai mai linoua pfüpuo maiye tsükhou more. Neletao hai shetumai hinou dazhuyu vah sü soupfüre ae mimeapfü ae rounahtou hinou kaozhou aveih nasü phoure. 8Neletao hai sheeyu buh sü tsükhou peimore ae Soteithe sü reilou more. 9Neletao kamai-a nou maiye panou southare donou dayu chi sü paore, kamai-a nou basharatao hi posheela peiyu touso khesü toure ae kamai-a nou kezhe vei jüpayu nasü rukha soua nou bure. 10Neletao kamai-a nou puo vei kipfüye sazü sabuwe, kamai-a nou naotumaiye puletao nou khouh khouh hi zhe ta-a buyu teile hia nüloua sazü peie. 11Kamai-a nou khulou vah souwe, kamai-a nou lahvei moupai ae lah tupfüye sazüwe. 12Kamai-a shizho ngaore donou maiye southawe, kamai-a nou lahvei thaihou jürai soua buyu Israel maitao hinou pousha vea soutou-a hangi loure. Puletao nou Eye ngaiwure” tea Ramai Mapao nou paoe.
13“Mai vei shaotou shaosoyu ae maiye southayu neletao hisü abahzü peilai. 14Enou neletaoye souche peilaiyu teithe zhou sü neletao nou khuvei lousüwu ae neletao vei bah sü khouko bua nou lashu lousüe tea tsüchowu? Mapao Enou haisü paowe ae Enou paoyu avei chipao thaifüa Enou soulai. 15Enou neletaoye sü tyahrü hrülai hi soupho rarou khaiwulai ae neletao nou vah ashi souyu nasü panou akhai soulaire. 16Sübüa tyahrü kukhe maitaoye panou neletaoye ngaophou laimoe ana neletao nou E hai Mapao-e touyu sü panou süloulai.”
Ramai vei Meideiyu Thaobvü
17 Mapao nou ahi paoe, 18“Thai-a bailaiyu mainare, Israel mai hai Eye donou komore. Puletao hai Eye donou huba datare; puletao hai shahu, baosahu, tin, hu ae mishinhu hai hukuyu maivei thaobvü hinou huba vitayu nasü büre. 19Südonou chuo Ramai Mapao Enou puletao hai muh lia hayu hubatao raibütoure tea paowe. Enou puletao mai hrülaiye sü Jerusalem hi pove jüloulai. 20Hukuyu mai ali nou shahu, baosahu, lee, mishin hu, tin hu hai thaobvü hinou meidei loua soushee louyu büa soupeilai. Hu hai dzü datayu bü avei lekha rarou sünou puletaoye soupeilai. 21Enou puletaoye sü Jerusalem hi pove jüloulai ae puletao vei khe hinou meibvü ali souloulai ae puletaoye avei lekha sünou mei deipeilai. 22Shahu hai thaopei hinou dzü vitayu büa Enou puletaoye Jerusalem hinou soupeilai, süthaisü puletao nou Mapao vei lekha rarou nasü süloulai”
Israel Maivei Süthai-apei Maitao vei Mah
23 Mapao nou ahi haibüa paopue, 24“Thai-a bailaiyu mainare, Israel maivei teidei hai sheemore, südonou Enou avei lekha hinou puletaoye tudee peie tea paopeio. 25Süthai-apei maitao hai souveo nou soukhaona southakhai touyu hinou ra-a buyu büa bure. Puletao nou maiye sü southare, puletao nou polou süyu koute hai maivei pousha ae na khesü poloure ae puletao nou maiye southayu donou mimea maipfü hai alao pare. 26Napao maitao nou avei chikha sü pfüthore ae puletao nou sheeyu nasü tsükhou peimore. Puletao nou sheeyu ae sheemoyu nasü haibüa nou tyaku hie touyu sü doupei more. Puletao nou sheeyu natao ae sheemoyu natao tyakuyu sü doupei more ae Soteithe sü puletao nou ngaophou more. Südonou Israel maitao hai Eye tsükhou more. 27Nuh teidei khasa-a hrüyu peikho maitao hai nüsei nou soukhaonaye pai desasa loua southayu bütoua baire. Puletao hai toungi loure donou maiye sü southare. 28Rachipaola peiyu maitao nou mah haitao hai mai ali nou kivo hi naikaa napeiyu büa poku peiwure. Puletao hai cheche moyu zho nou-ngao-a baire ae da-a nou vepare khesü paopei-a baire. Puletao nou Ramai Mapao vei chi paowe tea khawe, ana Mapao Enou puletaoye sü cha moe. 29Toungi maitao da-a nou maivei shaotoure. Puletao nou touhayu maiye ngaophou moe ae vakou mai hinou kaozhou aveih nasü poloure. 30Kivo nasü souloure donou mailia buhasa tea Enou zhu-e, kivo pepo tayu hinou laloua teidei hai nasü avei lekha rarou hinou vupa loure maiye Enou phou-e ana Enou mai ali-a ngaolou more. 31Südonou avei lekha rarou nasü puletao hi velai ae mei nou deihayu büa Enou puletaoye sü puletao nou soupfü khai touyu vahtao donou souhawulai.” Haisü Ramai Mapao nou paowe.
Currently Selected:
EZEKIEL 22: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
