EZEKIEL 20
20
Mapao vei Lichoyu ae Mainou Ngaophou Moyu
1Etaoye nüpoa tayu po anai vei khouh angou khoukha kirou zhou Israel maivei süthai-apei mai daotuli nou ahi tave Mapao vei leli nasü noure donou ve-e ae puletao nou anghoujü nou lou chobu loure. 2Süthaisü Mapao nou ahi haibüa paoe, 3“Thai bailaiyu mai nare, mai haitao hi Ramai Mapao nou haibüa paowe tea paopeio: Neletao avei leli nasü noure donou vehomoe? Cheche vujünou E hai hriyu Ramai thaifüa neletaoye panou ahinou halia noulai moe. Haisü Ramai Mapao Enou paowe.
4“Nenou puletao vei chiku peilaiwu? Sükulouzü puletao vei puo maitao nou ngaorayu vah soukhai touyu khesü paongao peio. 5Puletao hi avei chipao khesü paopeio. Enou Isreal maiye dolouyu phaki, puletao hi Enou apaopeie. Enou puletaoye Ejipt hinou paongao peie ae haibüa paopeie: E hai neletao vei Ramai nasüe. 6Süthaisü Enou puletaoye Ejipt hinou sapaloua Enou puletaoye donou dopakhai touyu teidei aveih, chonaodzü ae laivoudzü nou küa buyu teidei nasü peilai tea paohpeie. 7Enou puletao hisü paopeie, süolouzü puletao nou leshi-a buyu bashara khesü polaiwuo, ae cheche moyu Ejipt maivei rah khesü panou neletaoye souzhaiso, daiolouzü E hai neletao vei Ramai Mapao-e. 8Ana puletao nou Eye khaityawe ae avei chi sü keipei bare. Puletao nou puletao vei ngaorayu bashara khesü polai bare ae Ejipt maivei rah khesü tho-a nou bua baire. Südonou puletao pei hi avei lekha rarou nasü puletao nou Ejipt maivei teidei hi bukinou vepeilai tea Enou tsücho-e. 9Ana Enou sübüa soupei more, daiolouzü puletao nou koa hrüyu maitao nghoujü nou Enou puletaoye sü Ejipt hinou sapa peilai tea paosüpa peiwure, südonou avei zhih sü panou shimore donou Enou soupei more.
10“Südonou Enou puletaoye sü Ejipt teidei hinou radeiki hisü sapa peie. 11Enou puletao hi avei kharochi ae chikha khesü peie, sübüa zütouyu mai hai hrilouyu sü ngaoloue. 12Ahai koa nou ae-ao soukhai touyu nasü panou licho loure donou ae Enou puletaoye soushee peiwure touyu nasü panou süloure donou Enou puletao hi so teithe reilo tea nou peie. 13Ana puletao nou radeiki hinou buyu teile hia Eye khaityawe, puletao nou hriloure avei chikha khesü souphewure ae avei kharochi khesü malaire. Puletao nou avei soteithe nasü souzhaiwure. Puletaoye avei lekha rarou sünou souhawu laire tea Enou tsücho-e. 14Ana Enou puletao sü souha pei moe, daiolouzü Enou puletaoye Ejipt hinou sapa-a ngaolouyu tyahrü tao nou avei zhih sü tsükhou peilai moe. 15Südonou Enou radeiki hinou puletaoye panou mai lia Enou puletao hi peilai touyu teidei, chanaodzü ae laivoudzü nou küa buyu teidei hisü salou peilai moe tea chaachou souwure. 16Enou haibüa chaachou souyu sü daivanou toulouzü puletao nou avei kharochi khesü malaire, avei chikha khesü pfüphere, ae soteithe nasü souzhaiwure, ae puletao nou basharataoye thoyu nanou jüpapu loure.
17“Ana Enou puletaoye sü zhuvea leshi loure, Enou puletaoye sü radeiki hinou southalai more tea le laloure. 18Südonou Enou puletao vei nahle maitao hi haibüa paopi peie: Neletao vei puopaoh maitao nou soukhai touyu chikha khesü khaiso, puletao nou hrüyu zhaihrü nasü thaifüso, moyuma basharatao hinou neletao hai lahye souzhai louso. 19E hai neletao vei Ramai Mapao-e avei chikhatao ae avei kharochi khesü zülo. 20Soteithe nasü sheeyu teithe ali soua khailo sübüa sünanou ahai koa vo soukhai touyu vei shee soulai, ae sünanou E hai neletao vei Ramai Mapao nasüe touyu neletaoye panou süloulai.
21“Ana khaphao süna-a Eye khaitya-a aro sü zübare. Puletao nou avei chikha khesü pfüthowure, ae avei kharochitao, mai taralia sütao zülouyu mai sü hriloure na hai puletao nou malaire. Puletao nou Soteithe nasü souzhaire. Avei lekha rarou hinou puletaoye radeiki hinou southakhai moe. 22Ana avei zhih sü Enou Israel maitaoye teidei hinou sapayu ngaolouyu tyahrütao panou ngaophou more donou sübüa Enou soupei more. 23Südonou radeiki hinou chaachou kukhe ali hai Enou soupue. Enou puletaoye tyahrü veishi hi soupho rarou laiwulai tea chaachou souloue. 24Daivanou haibüa Enou puletao hi soupeie toulouzü, puletao nou avei kharochi khesü zü bare, avei chikha khesü pfüthore. Soteithe sü souzhai khaiwure ae puletao vei puopaoh maitao nou thoyu bashara khesü puletao nou tho tare.
25“Süthaisü Enou puletao hi veimoyu chikha khesü peie ae ahri pove peilou hoyu kharochi khesü peie. 26Enou puletao hi lah puletao vei posheela peiyu sünou souzhai louyu nasü peie ae puletaoye panou puletao vei nahpoutu naraio sü southaloua posheela peiyu sü soupeie. Haibüa nou puletao hi E hai Mapao-e touyu sü soungao peie.
27“Südonou thai-a bailaiyu mainare, Ramai Mapao Enou paoyu khesü Israel maitao hi paopeio. Neletao vei puopao maitao nou chilee cheche moyu hrü hrüa Eye haibüa paoshi peie. 28Enou puletao hi peilai tea paohpei khaitouyu teidei hisü puletaoye save thoupeie. Puletao nou kuyu deichitao ae süübe duyu khesü ngaolouyu phaki, neletao nou sütao hi posheela khesü peire. Puletao nou meidei-a posheela peiyu ae thoudzü vei posheela peiyu sünou avei lekha rarou soupa peie. 29Enou puletao hi haibüa noue. Neletao nou kuyu buhtao hi tayu sü dai-e? Südonou puletao nou kuyu buhtao#20.29 kuyu buhtao: Cheche moyu rahye thoyu buhtao hai Hebrew mainou aetou moe. Hebrew maila hinou “Kuyu Buhtao” touyu lakho hai “ne daki talai” touyu raiwe. tea zhaodao koute-a kuwe. 30Südonou Israel maitao hi Ramai Mapao Enou haibüa paowe tea paopeio: Neletao daisounou neletao vei puopaoh maitao nou mah souyu khesü soupuwe ae basharataoye daisounou thaihu tawe? 31Zhou koute-a neletao nou puletao bütoua sapeina khesü pei-a nou bue ae lah neletaoye basharatao hi neletao vei nahmai khesü southaloua meidei-a posheela peia souzhai lou nou bue. Sübüa soua buyuma neletao nou ahi tave avei leli nasü nouwe. Ramai Mapao E hai hriyu Ramai thaifüa neletaoye panou haliro ahinou noulai moe. 32Neletao hai tyahrü kukhe maitao, süü ae chuhye thoyu maitao büa hrü bailai tea neletao vei tsüle hinou laloure. Ana sükhesü hasou kilia vepalai moe.
Ramai nou Tudeeyu ae Khaipeiyu
33“Cheche vuzünou Ramai Mapao E hai hriyu Ramai thaifüa neletaoye avei lekha rarou ae khoushoyu avei bah alia avei khouko sünou khasa-a hrülai. 34Enou neletaoye tyadeitao hi soupho rarou khaitouyu hinou sapoa vejüloua avei lekha ae khouko nasü soungao peilai. 35Enou neletaoye Radeiki vei Tyahrütao hi saveloulai ae sühi sünou neletaoye zhu haohao nou tave chikulai. 36Enou neletao vei puopaoh maitaoye Sinai Radeiki hinou souvea peiyu büa neletaoye souvea peilai” tea Ramai Mapao nou paoe.
37“Enou neletaoye sü soutaosoua khasa-a hrüloulai ae neletaoye panou avei vo soukhai touyu nasü züa nou hrülai. 38Enou neletaoye khaityayu maitao ae mah souyu maitao hinou povai laiwulai. Puletao nou chu hrüa buyu teidei hinou puletaoye sü polai peilai, ana Enou puletaoye panou Israel maivei teidei hisü dakhaive loulai. Süthaisü puletao nou E hai Mapao-e touyu sü süloulai”
39Ramai Mapao nou paoe, “Oh Israel maitaore, chuo neletao nou avei chi zülai moe toulouzü, lah neletao vei jüpa sü soua basharataoye tho tawo. Ana Enou neletao hi paopi peiwe, süolouzü haithai hai neletao nou avei chi sü zülai ae basharatao hi posheela sü peia avei sheeyu zhih sü tsükhou moyu soupulai moe. 40Sheeyu avei deichi,#20.40 sheeyu deichi: Zion Deichi, deichi haina hai Jerusalem hinou bue, buh sühinou Rathoki ae veo vei fühao bue. kuyu Israel maivei deichi hinou Israel mai hrülai nou Eye tholai. Teidei sühinou neletao nou Eye sheeyu sapeina ae veikayu posheela khesü Eye pove peilai alia Enou neletaoye jüpa-a popeilai. 41Neletao nou raroupoa buyu teideitao hinou save neletaoye pove jüpeiyu phaki, neletao nou meidei-a posheela peiyu khesü Enou popeilai ae tyahrütao nou E hai sheeyu Ramai-e touyu sü ngaoloulai. 42Enou neletao vei puopaoh maitao hi peilai tea paokhai touyu Israel maivei teidei hi neletaoye sapoa dakhaive peiyu phaki, neletao nou E hai Mapao-e touyu süloulai. 43Süthaisü neletao nou ngaorayu vah soukhai touyu khesü licho loulai ae kabüa neletao hai lah neletaoye souzhai loue touyu tao-a süloulai. Süthaisü neletao nou vah ashi soukhai touyu donou lah neletaoye ngaoralai. 44Enou avei zhih panou shimore donou vah souyu phaki, neletao nou E hai Mapao-e touyu süloulai, daiolouzü neletao nou mai shiyu ae vah ashi soukhai touyu thaifüa Enou neletaoye tudee peimoe” tea Ramai Mapao nou paoe.
Khelova vei Mei
45 Mapao nou ahi haibüa paoe, 46“Thai bailaiyu maipure, khelova zhukhaio, khelova maitao-e aetou more tea paopeio ae khelova buyu vaohro hisü rachipaola peikhaio. 47Khelova buyu vaohro hisü Ramai Mapao nou haibüa pao-a nou bure tea paopeio: Zhukhaio! Enou mei sü shaopei laire ae sühi buyu süübe veishi sü deihawulai. Halinoua mei hainasü sounghei lulai moe. Mei hai nasü khelao nou reilova taopoa nou khelai ae mai hrülai nou mei souyu nasü sülai. 48Puletao mai hrülai nou mei sünasü Mapao Enou shaothou peiwe touyu hai ngaolai ae mai linoua sünasü sounghei loulai moe.”
49Ana Enou haibüa paoe, “Oh Ramai Mapao wo, Eye panou sünasü paoso! Mai hrülai nou vamoa Eye hai nada nou pao-a baiwe tea nou pao-a bure.”
Currently Selected:
EZEKIEL 20: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
