KOPAODOUWO 5
5
Thahaha-a Chaachou Souso
1Nenou Ramai ki hi talouyu phaki ne phika leikeilo; nghiki takouloua kei louyu nanou avo mainou posheela peiyu jünou veipu hie; daiolouzü puletao nou vah ashi souwe tiyu hai sümoe. 2Ne mü pousouo, alia Ramai hi theasho-a nou chaachou souso, daiolouzü Ramai hai raki hinou bue alia ne sü deiphao hi bua baie; südonou nevei chipao hai panou chi-a baio. 3Daiolouzü nenou tsücho poulouzü, veayu hai-a daopou-a bailai, alia nenou lapai poulouzü, voyu chipao hai-a alao paopa-a bailai. 4Südonou nenou Ramai hi chaachou soulouzü, sünasü soupeimoa nou ponawuso; daiolouzü puhsü avo maiye jüpa moe. Soulai tea chaachou soukhai tiyu nasü soupeio. 5Nenou chaachou soukhaitoua soumoyu jüwo chaachou soukhai moyua veipu hie. 6Ne müye panou neye mah hisü süthai thouwuso, alia kopomai nghoujü hi ne paomahre tea paoso; daisounou Ramai ye pa ne pai chouloua rarou shulai, alia puhye pa ne bahnou soukhaitou vah sü souha shulai? 7Me alao sou mukhai-e, thouloumo chipao hai alao pa baiwe; ana newo louzü Ramai ye pilou baio.
Ehmai Hrüh hai Hako baie
8Deide ali hinou touha maiye souvea-a alia acheche ae kaozü nahai soumoa buyu nenou ngaolouzü, süna vanou ne khupawuso; daiolouzü aku vahbuh buwo ye sü kupuyu alinou zhua bue, süthai-a süjü kupuyu linou puletaoye-a zhua bue.
9Dei hinou patouyu hai mai hrülaiye donoue: veo koutea sühinou zha ngaowe.#5.9 Phoure 9 nahai Hebrew sheesha toumoe.
10Sha jüpayu mai nasü sha nou khalai moe; kini jüpayu na-a nangi vanou khalai moe. Hai-a hamako baie. 11Na hai pupakhai-e, sütaoye toulaiyu mai-a pupa-a baiwe; alia paopu hai dai viyu bue puh nghithou nou na sütaoye ngaoyu baimoa nou? 12Vah soumai ali hai, puhnou toupouyuma moa touchiyuma vasho-a zhilou baiwe; ana toungiyu maili vei kouliyu haina vanou puhye pa zhilai moe.
13Enou teinghi khehnou ashi ali ngaoe: kini hai paopuye souveare donou khai-a baie, 14ana kini sütaosü vah humahyu ali donou ha-a baiwe; alia puhsü puh nahmaitaoye donou halia shokhai peilai moe. 15Puhpfü nabvü hinou kouyu büa puhsü sakhai-a dakhai ta-a bailai, baitou tea veyu büa baitoua ta-a bailai; puletao nou teroua soukhai tiyu taohai haliro poa talai moe. 16Hai-a levea shoyu ashi alie: puhnou veyu bütou tea puhsü ta-a bailai; puletao nou terou-a teikhaiye thaihuhyu vanou daie vilouyu bue? 17Süpeinou, puletao vei teile teitei hai teizhi ae leveayu, rarouyu, sounou alia lekha moyu hinou souhawure.
18Mai liye donou veiyu alia kaoyu hai daie tea Enou ngaolouyu sü, Ramai nou puhye teile chitea teinghi khehnou hrüwuo tea peiyu tao hinou puhnou terou-a soukhai touyu hinou, puhnou touso-a sava-a ngaolouyu haire, daiolouzü hai sü puhvei zha-e. 19Mai lili hai Ramai nou kini-a peie, paopu sou-a peie alia sütao poa sava loure vei khouko-a peie ae puh zha-e tiyu aeti lousü ae puhvei terouyu hinou sava lousüe tea peikhai tiyutao hai Ramai vei sapeina-e. 20Daiolouzü puhnou puhvei teile hai li-a chosho laimoe, daiolouzü Ramai nou puh tsü hai pa lesayu nou phou-a bulouwe.
Currently Selected:
KOPAODOUWO 5: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
