PAODAKHAIYU CHIKHA 26
26
Chachi louyu vei Posheela
1“Neletao vei Ramai Mapao nou neletao hi peilaiyu teidei hi talou louyu phaki alia teidei süna lou polou-a sühinou pfüsho louyuki, 2neletao vei Ramai Mapao nou neletao hi peikhai touyu teidei hinou neletao nou daothou khaitouyu taimou hinou parai kayu moa kourai kayu shira daoli polo alia sülai hi pothoulo. Süso neletao vei Ramai Mapao nou puh zhih pa bure donou dopei laiyu buh hisü potakhaio, 3alia süteile hi buyu napao hisü takoulou-a haibüa paolo, ‘Mapao nou Eletao puopao hi peilai tea paodai khai touyu teidei hi E velou loure touyu zhou Enou Ramai Mapao hi paopa ngaowe.’
4“Napao nou ne bah hinou sülai sü polou-a Ramai Mapao vei posheelabu nghoujü hi pokou khaipeilai. 5Süthaisü Ramai Mapao nghoujü hinou haibüa nenou paolai, ‘A puopao hai tasühao laiyu Aram maiye, alia puhnou mai daoti sa-a Ejipt hi taloue ae sühinou hrüe alia dushoyu, khouko bushoyu, ae mai poushoyu tyahrü ali souloue. 6Ana Ejipt mainou Etao hi maishi shoe, soupai louhoyu vah khouli Etao-ye pa sou-a souvea shopeie. 7Etao nou Etao puopao Ramai Mapao hi kra-e, alia Mapao nou Etao paikho choupeie, alia Etao veashoyu, vah teishoyu soua alia souvea shoyu puhnou ngaoe. 8Südonou Mapao vei khoushoyu bahnou süthaipoa, khupasoua puh baokao khapa-a, khupayu shee soungao-a alia khupasou-a Etaoye Ejipt teidei hinou sapa peie. 9Puhnou Etaoye teidei haina hi save thoupeie alia chonaodzü ae laivoudzü nou küyu teidei haina hai Etao hi peie, 10alia Oh Mapao, nenou ahi peikha touyu teidei hinou parai kayu shira khesü chuo Enou ne hi povewe.’
“Süthaisü sülai sü Ramai Mapao nghoujü hi pokou jükhaio alia puh hi pei pfünakou khurüo. 11Alia Ramai Mapao nou ne alia ne kikhamai hi havei peikhai touyu veishi hinou ne alia Levimai alia neye koa hrübuyu shetu maitao kolinou sava zolai.
12“Po asü koh ngaolouyu veishi hinou zha kirou hinou zha ali hai popa kuloure toulouzü, pokupa khaitouyu taith sütao hai Levi mai, shetumai, pfüpuo hamai alia mimeamaiye leshi peilai, sükure toulouzü puletao-a neletao vei nuhdu hinou touso sü vasho toua nou bulai. 13Süthaisü nenou ne Ramai Mapao hi haibüa paolai, ‘Nevei kharochi thaifüa, Ramai vei zhatao sü Enou aki hinou popaloua Levi mai, shetumai, pfüpuo hamai alia mimeamai taohi peire. Nevei kharochi hai Enou pfütho moe ae halia ngai-a ngaimoe. 14Enou dongai pfübu teile hi Ramai vei zhasü ali-a toulou moe, moa naanou hinou shee moa buyu teile hi Enou sühai ali-a deikhai moe, moa thaimai hi#26.14 thaimai hi; moa thaimai donou. Enou hali-a posheela moe. Enou Ramai Mapao chi sü züe; nenou ahi kharochi peiyu veishi Enou soure. 15Nenou sheeshoa buyu raki hinou zhukou peikhaio, alia nevei Israel maitaoye hapeio ae nenou Etao puopao hi paopeikhai touyu thaifüa Eletao hi peikhai touyu teidei, chonaodzü alia laivoudzü nou küyu teidei nasü hapeio.’
Mapao vei Maitao
16“Zhou neletao Ramai Mapao nou kharochi alia chikha haitao neletaoye zülo tea peia bue; südonou neletao vei tsüle ae hrü veishi alia rako lou-a sütao hai soutaosou-a reilo. 17Mapao hai neletao Ramai-e touyu alia puhvei ludu hinou neletao nou talai touyu alia puhvei kharochi ae chikha khesü neletao nou khailai touyu, alia puh chi zülai touyu hai zhou teithe neletao nou paopare. 18Neletao hai zhou teithe Mapao nou paokhai touyu büa puhvei mai soure donou popeiwure; ae neletaoye puhvei chikha khesü zülo tea zhou teithe kharochi peiwe. 19Mainou paoshoyu hinou, zhih tayu hinou alia tsükhouyu hinou puhnou soukhai touyu tyahrü veishi jünou cholea khaipeilai touyu alia puhnou paokhai daiyu büa neletao hai Ramai Mapao hi sheeyu maitao soulai touyu hai puhnou paopare.”
Currently Selected:
PAODAKHAIYU CHIKHA 26: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
