PAODAKHAIYU CHIKHA 25
25
1“Mai ahai hai hali saovaloua chikuyu phaki, chikuyu mainou mahzü zhulai, süthaisü thaonou kaoe alia thaonou mah-e touyu paopeilai. 2Mahyu naye taida peizü louzü, chikuyu mainou kouzülo tea paopeilai alia puh nghoujü hinou puhvei mah thaifüa süda dazü taosü cho-a dalai. 3Ana puh hisü süda raidai jünou la-a dalai moe, süjünou la-a dare toulouzü puh hai maisou nghoujü hinou haongu soupeiwure.
4“Chode ali hai thai hinou sa-a thoutaiyu phaki mü phukhaiso.
Thaitayu Ne Thaihou Jürai Naye donou Souzü Vah
5“Chinamai ahai koa hrüzho buyu hinou, mai ali hai nahpoutu ha-a thaire toulouzü, puh chapfü hai kikhamai hi moa vakou mai ki pa nghita laimoe. Puh cha thaihou maili nou nealoulai alia cha thaihou moa jürai nou souzü vahtao sü soupeilai. 6Narai kayu nahpoutu nasü thaibuyu puh zhih pa polai, sükure toulouzü puh zhih hai Israel mai hrohinou tyaka laimoe. 7Ana thaita-a buyu thaihou nanou puh chiye nanü more toulouzü, naotupai nou taho nuhdu romü hinou tsükhemai hi paolai, ‘Acha thaihou nou puh jürai zhih sü Israel mai hrohinou pa bulaiyu soupei bare. Cha thaihou mainou chimai hi soupei laiyu vah nasü puh nou ahi soupei moe.’ 8Süthaisü, nuh hi tsükhe mainou puhye kuloua paoyuma puhnou ‘E puhye nanü moe’ tea balouzü, 9puh jürai chapfü naye panou tsükhemai nghoujü hinou puh phikha ali paizhu loulai, puh pah hi taidzü süsho peilai alia haibüa paolai, ‘Jürai maivei kihikhamai soushu peilai moyu mai hi soulaiyu sü haire.’ 10Mai süna hi hrüveyu taosholea hrülai hai ‘Mainou phikha paipa laipeiyu kikhamaitao’ tea Israel mai hrohinou sülai.
Zhai Kukhetao
11“Mai ahai davayuki, mai ali chapfü nou puh chasü mai bah hinou vupa peilai tea mou-a alia puhnou bah thaipa mai hona jü houre toulouzü, 12puh bah sü daodelaiwo, puhye zhuveaso.
13“Ne lekhabvü hisü süh douyu tyakuyu chuh ahai, ali süh ali thea khaiso. 14Ne ki hinou süh douyu bvü tyakuyu ahai - ali du, ali tai nou khaiso. 15Nevei süh douyu chuh alia douyu bvü hai le sheesha nou khailo, sükure toulouzü neletao Ramai Mapao nou neletaoye peikhai touyu teidei hinou hrüsho-a hrülai. 16Daiolouzü doli dokai sou-a maivei haibüa latou lashoyu hai neletao Ramai Mapao nou ngaorae.
Amalek Maiye Southawo tea Kharochi Peiyu
17“Neletao nou Ejipt teidei hinou tapayuki ludu hinou Amalek mainou neletao hi dai-e soupei touyu liloukhaio. 18Neletao nou veachea alia hocheyuki, puletao nou neletaoye ludu hinou takou dao-a neletaoye reihsou-e alia lülou hoshoa thailo nou na-a tayu maitaoli daotha khaipeie, puletao hai Ramai ye ngaopi moe. 19Neletao Ramai Mapao nou neletao hi peikhai touyu teidei hisü neletao nou talou poloua shochaoyu ngaoloure toulouzü, alia neletaoye ngaobamai veishi hinou kaozhou aveih ngaoloure toulouzü, Amalek maiye raki khenou pa lichopu more donou souhakhai touwo.
Currently Selected:
PAODAKHAIYU CHIKHA 25: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
