2 THESSALONIMAI 3
3
Ehye donou Veachi Paopeio
1Akhai hinou, thaihou jürai khemai, Mapao vei chipao hai thashoa paodouta loure donou ea neletao hrohi velouyuki büa süsü panou tsükhoua poloure Ehye donou veachi paopeio. 2Alia Ramaiye panou Ehye vah ashi soumai ea mai ashimai bah hinou vupa peiloure donoua veachi paopeio; daiolouzü maikhemai hrülai nou chipao nasü louche peimoe.
3Ana Mapaowo louzü louchelou veie, alia puhnou neletaoye soutsü peilai ea neletaoye maishimai bah hinou khopeilai. 4Ehnou nelehi paopeikhai touyu taosü nelenou soua souwe ea thaokhaimoa soua bupei shulai tea Ehnou nele vanou Mapao hi louche-a bue.
5Mapao nou neletao lesü Ramai leshi ea Khrista hinou veyu shamealou süyu hilova süve peiyu soulouwo.
Vah soua Buloure Süpeiyu
6Thaihou jürai khemai, chuo Ehnou neleye Eletao Mapao Jisu Khrista zhih hinou chikha peiwe, süolouzü neletao hai hi-a buyu ea Ehnou nelehi paodou peikhai touyu zhai süna thaifüa tamoyu thaihou jürai maitao hinou tarei talo. 7Daiolouzü Ehnou souwuyu sübütoua nele-a souzüe touyu sü neletao-a sütoua bue. Ehnou neleye koa bubu kisü Ehsü hi-a bukhaimoe. 8Ehnou maitali hia muh peikhaimoa tou-shomoe, ana neletao maitaliye souvea more donou Ehnou khei-hea sokhaimoa te-a vah soue. 9Sübüa souyu hai nele hinou Ehye soukha peire khoyu zü ali-a hae touyu vanou moe, ana kabüa neleye panou Eh zhai doulou laisa touyu donou soubaie. 10Daiolouzü Ehnou neleye koa bubuki hinou nelehi chikha hainasü peie, süolouzü, “Maita linou vah souba louzü, puhye sü panou touwuso.”
11Ehnou daidonou sübüa paowe toulouzü neletao hrohinou mai kamaisü hikeih-a ea vahlia soukhaimoa mai kukhemai vah hinou pei thaithoua teile souha-a bubaiwe tea Ehnou chouwe. 12Chuo sükuyumai sütao hisü Ehnou Mapao Jisu Khrista zhih hinou chikha peiyu noupu kaona-a puletao vah soua buloure ea lah puletao touso kutou loure donou süpeiwe.
13Ana thaihou jürai khemai, neletaowo vahvei souyu hisü shawu laimoe. 14Maitalinou Ehnou nelehi seiveyu seiko hainavei chipaohai zübawe toulouzü, sübüyu mai sünaye sü zhutoulo ea lah puhye panou ahrao ngaoloure donou puh hinou tarei talo. 15Sütoukhaia puhye sü ngaobamai alibüa popeiwuso, ana thaihou jüraimai alibüa puhye sü tukha züpeio.
Akhai Chipao
16Chuo kaonayu vei Mapao puhnou teisanou ea ludu teitei hinou neletao hi kaonayu peiyu sü soulouwo. Mapao nou neletao hrülaiye koa buyu sü souloukhaio.
17Paul hinou khurüyu vei chidoh seivewe. Haisü lah, Abah vuzünou rüwe. Avei seiko teitei hisü haibüyu zhaido hinou Enou paoshee souwe; Ewo haibüyu zhai hinou rübaiwe.
18Eletao Mapao Jisu Khrista zhuvea nou neletao hrülaiye koa buyu sü souloutheo.
Currently Selected:
2 THESSALONIMAI 3: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
