1 TIMOTHI 1
1
1Eletaoye khailu-apeio Ramai ea Eletao vei areih Khrista Jisu vei chikha hinou Khrista Jisu vei sei-atamai soua buyu Paul nou, 2lü hilonou chekhao-a Anahpoutu soua buyu Timothi hi rüwe:
Puo Ramai ea Eletao Mapao Khrista Jisu nou nehi zhuvea, khu-leshi ea kaonayu peiyu sü souloutheo.
Amada Dou-apeimai vanou Tukha Peiyu
3Enou Makedonia hilo tayuki nehi paopeiyu büa Enou neye panou Ephesa hinou nai-a bunüwe. Daiolouzü mai kamainou amada lüzhai sü doupeia bure, alia puletaoye sübüa doupeiyu hinou bailoure nenou kharochi peikhaio. 4Chi saovayu likhei povepei baiyu madayu daomaikotao ea pai-paomai zhih alaosou rüthoupoa laiyu sütaosü thaowure donou puletao hi paopeikhaio; sütaonou lü vanou likhei sülou baiyu Ramai vei aroh naye sü kuvah soumoe. 5Ehvei kharochi hainavei ko matsüwo louzü ra-hazheiyu le hinou, lekhetsü aveina hinou ea kao-züyu lü sütao hinou payu leshi süna panou paloure donoue. 6Mai kamaisü sütao hinou tala taloua, hakoa chi veivayu hinou puletao ludusü motare. 7Puletao sü razhai dou-apeimai sounüwe, ana puletaosü lah puletao nou daichi paosa touyu moa puletao nou khuh veishoa pao-a laiyu sütao vanou halia sükhai moe.
8Chuo razhai hai maitalinou kao-zü hinou seiloure toulouzü veishoe touyu hai Eletao nou süa bue. 9Sütoukhaia Eletao nou licholou molouzü shie, süolouzü razhai hai maivei mai donou soupeimoe, ana zhai souphe-souphomai, paoyu zübamai, Ramai ha-a hrüyumai ea mahsoua laimai, sheemomai moa chechemomai, lah puletao pfüpuoye southeamai ea maiye datheamai, 10khakha chaozüyu mai, emai zhaimoa koa züyumai, mai vaoyumai, amadamai, mada-a chi lapeimai ea cheche lüzhai hinou moa aku zhai hinou vah soua laimai, süolouzü 11Eye panou paodou peire Abah hi lüthou peikhai touyu adusho ea rako avei Ramai hinou veyu Ko Avei süna thaifüa tamoyu maitao donou razhai nasü rüpei khaitoue.
Ramai Zhuvea vanou Kalo Paoyu
12Avah haina donou Ahi khouko peikhai touyu Eletao Mapao Jisu Khristaye Enou kalo paowe, daiolouzü puhnou Eye nou puhvei kuvah souzüe tea chopeia, 13Esü raiki teile hisü puhchi paoshi-a ea puhye souvea-souhrao peikhai-a Eye doloue. Ana Ramai nou Ahisü zhuvea peie daiolouzü Enou lü ha-a buyupha hinou sükhaimoa süsü soure. 14Alia Eletao Mapao nou puhvei phoutsü poa buyu zhuveasü Apei hi lakhai peie ea Khrista Jisu ye koa ali soulouyu hinou Eletao zha soua buyu lü ea leshi nasü puhnou Ahi peie. 15Paokhai touyu chipao hainasü chechewe ea teiteinou poloua louchelou veie, süolouzü mahmaitaoye khaipeire donou Khrista Jisu sü deiphao hi ve-e. Alia mah maitao hrülai hrohinou Enou shishilai nasüe; 16ana Khrista Jisu nou Ahi tapeiyu zhai süna vanou puh hai shishilai mahmai hi koute daizhozhou shamea peisa touyu sü maikhemai hrülaihi pongao peiwu-a kukhemai taoye-a panou süsü süloua tave puh hinou teisa ahri nasü ngaoloure donou Ramai nou Apei hi zhuvea peire. 17Teisa Veo, athai hayu ea nghithounou ngaomoyu, likhei baiyu Ramai puh hisü khuhaoyu ea teisanou adu-sho souyu nasü souloutheo, teisanou! Amen.
Timothi nou Soure Vah
18Anahpoutu Timothi, rachi paola mainou raia ne vanou paokhai touyu chi sütao thaifüa chuo Enou ne bah hi chikha hainasü lüthou peiwe, süolouzü reih koloure donou chipao sütaosü bahsei büa seilo, 19alia nevei lü hinou soutaosoua bulo ea nevei lekhetsü nasü sheesha-a khailo. Mai kamainou puletao vei lekhetsüna paisü züpei bayu vanou puletao lü nasü souphe-souphore. 20Puletao hrohisü Enou Saitan bah hi thoupeiyu Humenas ea Alekjandar puhaie; sübüa thoupeiyu hinou puhai nou Ramaiye paoshiyu hai shie touyu sü süloulai.
Currently Selected:
1 TIMOTHI 1: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
