2 THESSALONIMAI 1
1
1Paul, Sailas ea Timothi nou Eletao Puo Ramai ea Mapao Jisu Khrista hi buyu Thessalonika hi lüloumaimehi rüwe:
2Eletao Puo Ramai ea Mapao Jisu Khrista nou neletao hi zhuvea ea kaonayu peiyu sü souloutheo.
Khrista Veyuki Chikure
3Eh thaihou jürai khemai, neletao vanou Ehnou teisanou Ramai hi kalo paovuzülai. Ehye donou süsü souzüshoe daiolouzü neletao vei lühai alaosou dumaimai khere ea neletao alinou liye donou leshiyu neletao vei leshinahai pulailai khere. 4Sübüyu donou Ehlah Ehnou nele vanou Ramai vei lüloumai metao hinou kathe soua bue. Nelenou thaokhaimoa nelehi vedao-a buyu souvea-soushi peiyu ea veahoyu teitei hinou shamea-a ea lü louche-a buyu vanou Ehnou kathe soua bue.
5Ramai vei chikuyu hai cheche-e touyu sü haitao teiteinou zhopaoh peiwe süolouzü Ramai vedei donou nelenou sübüa vea-hoyu vanou neleye puh vedeimai souzüe tea poloulai. 6Alia Ramai nou souzü nasü soupeilai, süolouzü neletaoye souvea-a buyu puletao pei hisü puhnou vea-hoyu pove peilai, 7alia Mapao Jisu nou khouko buyu puhvei rakivamai taoye koa meikei hinou raki vanou veyu kisü vea-hoa buyu neletao ea Ehye panou vaphia soloulai. 8Sükisü Ramaiye bayu ea Eletao Mapao Jisu vei Ko Aveina zübayu puletao pei hisü tudee peilai. 9Puletao sü teisanou souhawuyu ea Mapao vei nghojünou ea puhvei khouko ava hinou buh ku-a pokhaiyu vei tudee nasü ngaolai. 10Haibüa teithe sükisü puhnou puhmaitao hrülai hinou khekai ea lüloumai hrülai hinou tsükhouyu sü ngaolai. Neletao-a puletao hrohi loulai, daiolouzü Ehnou nelehi paodou peiyu chipao nasü nelenou loucheloue.
11Südonou Ehnou Eletao Ramai hinou neletaoye panou puhnou kulouyu hrü hinou züdoua hrüloure donou, alia puhvei khouko vanou neletao nou avei züpayu teiteisü vete loure donou ea neletao lüvei vah nasü panou souche loure Ehnou neletaoye donou teisanou veachi pao-a bue. 12Sübüa souyu hinou Eletao Mapao Jisu zhihsü nele vanou soudusho peiloulai, alia Eletao Ramai ea Mapao Jisu Khrista zhuvea thaifüa neletaoye puh vanou soudusho peiloulai.
Currently Selected:
2 THESSALONIMAI 1: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.