1 THESSALONIMAI 5
5
Mapaowo Velaire, Soudalo
1Ana thaihou jürai khemai, neletaoye donou sütaosü duki palaisa touyu teithe moa khou-teilena vanou panou nelehi rüvepeire matsü moe. 2Daiolouzü neletao lahnou sütoua bue, süolouzü Mapao vei teithe hai kheikou hinou avaomainou veyu sübüa velai. 3Maikhe mainou, “Kaona-a bure ea kao-zoushi hare,” tea paoyu teile sühinou naotu mainou nah nare kihi khya soungha palouyu büa sükhaimoa ha-kayu sü puletao pei hi velai, alia sükisü maitalia tupalou laimoe. 4Ana thaihou jürai khemai, neletaowo teizhihi bumoe, alia teithe sünanou avaomaili büa neletao hi panou sükhaimoa pawu laimoe. 5Daiolouzü neletao hrülaihai ava ea heakovei nahmaitaoe. Eletaowo khei moa teizhihi buyu mai moe. 6Südonou kukhemai büa Eletao zhia buwulai mokhe, ana Eletaowo zhaihe-a ea leikei-a bulaikhe. 7Daiolouzü zhiyu maisü khei hinou zhiwe, alia zhaoh shozhiyu maisü khei hinou shozhiwe. 8Ana Eletaowo teivahi buyu maitaoe, alia leikei-a buvu zülai. Eletao nou lü ea leshi hai reih khao-kha, alia khailu peiyuvei areih nahai reih peirü büa rülou vuzülai. 9Daiolouzü Ramai nou Eletaoye puhvei rarou nasü ngaoloure donou doloumoe, ana Mapao Jisu Khrista vanou khaipeiyu nasü ngaoloure donou doloubaie. 10Eletao nou kai-a bu-a, zhi-a bu-a puh veyu kisü Eletao sü puhye koa hrüre donou puhnou Eletao donou thaipeire. 11Südonou neletao nou chu-a soua buyu büa neletao alinou liye le soudupeia ea soukhapeia bulo.
Akhai Chipaotao ea Khurüyu Chidoh
12Ana thaihou jürai khemai, neletao hrohinou te-a vahsoua buyu maitaoye ea Mapao hilonou neletaoye süthaipeia doupeiyu maitaoye tsükhou loure donou Ehnou khowe. 13Puletao nou soua buyu vah süna donou leshi hilonou puletaoye kushoa tsükhou peikhaio. Lah neletao hrohisü kaona-a buloukhaio.
14Thaihou jürai khemai, vah souhi-a bumaiye paodou peire, le vea-a bumaiye souva peiloure, lelouho maiye soukha peiloure ea maikhemai hrülaiye koa shamea peiloure Ehnou neleye süpeiwe. 15Neletao maitalinoua ashinaye donou ashinanou pao rülou more zhuloukhaio, ana teile veishi hinou alinou lihi ea maikhemai hrülaihi avei soupeire donou phoukhaio.
16Phabusa nou salo, 17tobai soumoa veachi paokhaio, 18teile veishi hinou kalo paokhaio; daiolouzü haisü Jisu Khrista hinou neletaoye donou Ramai leli nasüe.
19Rako Mashiye sounghiwuso; 20rachi paolayu sü ngaophou moyu souwuso. 21Ana ha teiteiye sü zhai zhukhaio; avei nasü potouloukhaio, 22alia ashi zhai teiteisü thaowuwo.
23Eletaoye kaonayu peiyu Ramai puhnou neletaoye ha teitei hinou soushee peikhaio, alia puhye panou Eletao Mapao Jisu Khrista veyu kisü neletao rako, hrirai ea pfüphao teiteisü veishoa ea chaa ha-a khaipeiyu souloukhaio. 24Neletaoye kulouyu puhsü louche louveie, alia puhnou süsü soupeilai.
25Thaihou jürai khemai, Ehye donou veachi paopeikhaio.
26Sheeyuvei mü mupeiyu sünanou thaihou jürai khemai hrülaiye sasa-a khurü peikhaio.
27Seiko haina hai thaihou jürai khemai hrülai nghojühi phoungao peio tea Mapaowo zhih hinou Enou neletao hi khowe.
28Eletao Mapao Jisu Khrista vei zhuvea nasünou neletaoye koa buyu sü souloutheo.
Currently Selected:
1 THESSALONIMAI 5: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
