2 SAMUEL 24
24
David nou Maipei Choyu
(1 Puo 21.1-27)
1Ramai nou Israel mai pei hi raroure, puhnou David ye panou puletao pei hi veahoyu pfüve peire donou souloure. Ramai nou David hi paoe, “Taho Israel mai alia Judah mai kazhou bue touyu maipei chokhaio.” 2Südonou David nou reihmai peikhowo Joab hi kharochi pei-a paoe, “Ne nekhenou buyu aduso maitaoye salou-a Israel ae Judah mai khü teitei hi taho maipei phoukhaio, mai haizhou bue touyu E sünüwe.”
3Ana Joab nou veo hi haibüa chila peie, “Veo, Ramai ye panou Israel maiye chujünou zha kaih sü soupoupa peitheo, ae süsü ne ngheithou vuzünou ngaoyu sü soulo. Ana veo, ne daisounou maipei choyu sü jüpawe?” 4Pao-a buyuma veo nou halia aetou more, südonou Joab alia puh khenou aduso maitao hai veo vei paochi zümolou hore, südonou puletao sü maipei chore donou tapare.
5Puletao nou Jordan rei tacho palou-a Aroer dei khelou hinou bulou-a maipei choshure. Gad vei teidei levai buyu deikho toutsüla hi buyu nuhdu hinou chopoa tae. Taihinou tarei poa Jazer hi khe-e, 6sühinou Gilead, ae Kadesh tea kuyu Hit mai teidei hi phoupoa ta-e, puletao nou tapoa Dan hi veloue. Dan hinou tasühao poa Sidon hi veloue. 7Süthaisü puletao nou tashoupoa kou reihbuh soutou khaitoua buyu Tair maivei nuhdu hi veloue, sühinou tapoa Hiv mai alia Kanaan maivei nuhdu veishi hi tahoe. Tapoa ve akhai hisü Judah maivei teidei khekou buyu Beersheba hi veloue. 8Puletao nou sübüa khouh akü-a teithe kai ta-a teidei teitei tasühaoyu thainou Jerusalem hi khaive loue. 9Puletao nou maipei cholouyu süolouzü, Israel maitao hinou reih soulou süyu mai 800,000 ae Judah maitao hinou 500,000 bue tea veo hi pove peie.
10Maipei chocheyu thai, David nou lahvei mah süpalou-a le veasho-a nou Ramai hi paoe, “Vah sovei haina souyu hai E soumah showure, zhuvea nou avei mah khaipeio, E lah vo-a nou vah souwure.” 11Thainesho shona David nou zü hinou kushulou mojünou Ramai vei chipao sü David vei rachipaolawo Gad hi ve paore. 12Ne taho David hi paopeio tea Ramai nou haibüa nou paowe, “Puhye panou dolou veiyu tya asü peilai, sühinou ali moa ali dolo,” tea puh hi paopeio. 13Südonou Gad nou David hi tave paoe, “Nevei teidei hi po asü tokaayu nou laiho? Khouh asü nevei ngaoba maiye panou ne thaingou-a ne tutsü tayu nou laiho? teithe asü nevei teidei teitei hi rahta rahvu veyu noulaige? Chuwo nenou dorena dolou-a Eye panou nevei chila nasü Ramai hi ve paopeio.”
14“E veashore, Eye panou mai kukhemai bah hi delouwuso, Eye panou Ramai vei bah hi delou-a baio, daisounou touyuo puh sü maiye zhuvea leshi süshoe,” tea David nou chila peie. 15Südonou Israel mai pei hi Ramai nou shona nou po-a paoh khaitouyu teile koute hisü rahta rahvu hai seive pei-a Dan teidei hinou Beersheba koute hai mai 70,000 thaire. 16Rakiva puona nou Jerusalem ye souhawure donou puh bah khapayu phaki, Ramai nou maikhe maitao vei veayu ngaolou-a leveare, südonou “Tai khare, nevei bah khailou baio,” tea Ramai nou paore. Süphaki rakiva puona sü Jebus puona Araunah vei chathai hi bue.
17Israel maiye southayu rakiva puonaye David nou ngaoyu phaki, puhnou haibüa Mapao hi paoe, “Mahmo souyu nasü E baie, ana lülou hoyu mai haitao nou dai souwure? Ne vei bah sü apei hi alia avei kikhamai pei hi pei-a baio.”
18Süzhou teithe hinou Gad nou David hi ve paoe, “Jebus puona Araunah vei chathai hi taho Ramai ye posheelabu ali soukhaio.” 19Ramai nou Gad ye seive paopeiyu na thaifüa David nou buh sühi tare. 20Araunah nou David veo alia puhvei maitaoye ngaolouyu phaki, puhnou takou veo nghoujü nou nakoulou-a khurüe. 21Araunah nou “Dai vanou veo sü ne kilai ahi velousa?” tea noure.
“Nevei chathai haina hai ne hinou hülou-a nou hai hinou Ramai ye posheelayu buh ali soulou-a Israel mai pei hi veyu rahta nahai baipeire donou Ramai ye tholai,” tea vewe tea veo nou chila peie.
22“Veo nenou jüpayu veishi sü poloua Ramai ye sü tholo, mei dei-a thore donou chode ahai-a bue, ae mei deire donou chode phaodao, alia thai souyu süütao poa deilo,” tea Araunah nou paoe. 23Araunah nou sütao teitei sü veo hi pei-a paoe, “Ramai ye panou nevei posheelayu nasü popeilou theo.”
24Ana veo nou paoe, “Sa-a polai moe, muh peilai; muh lia loumoyu na alinou E Ramai ye posheela laimoe,” touloure. Puhnou chathai alia chode sü shahu raingou pei-a hüloure. 25Süthaisü David nou buh taihinou Ramai ye posheelabu ali soupa loure ae mei dei-a thore nataozü poshu meidei-a posheela peiwure, alia chavei lathaoyu vei posheela-a sheela peiwure. Sütea veo nou Israel mai hrülai thaosou veachi paoyu hai Ramai nou kei noupei-a nou Israel mai hi souyu rahta nasü Mapao nou nguchao peiwure.
Currently Selected:
2 SAMUEL 24: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
