2 SAMUEL 23
23
David vei Akhai Chipao
1Ramai nou soudu souso peiyu, panou veo soure donou Jakob Ramai nou dopalouyu Jesse vei nahpoutu David, Israel maiye donou puhnou lou veilih dapa peikhai toue. Haitao hai David vei akhai chipao-e:
2Ramai vei rako nou ahi haibüa nou paowe;
puhvei chipao sü avei mü-lü hi bue.
3Israel maivei Ramai nanou paoe,
Israel maivei chuhdu nanou ahi paowe:
“Acheche hinou teidei khopeiyu veo,
Ramai vei chi zü-a teidei khopeiyu veo,
4puh sü teihao chaomoa leirei touyu shona hi vapeiyu teinghi raiwe,
teirükou shopeiyu thai, teinghei nou phupeia pouzü, süüzü lapayu raie.”
5Sübüa nou avei tyaosholea pei hi Ramai nou ha peilai
Daisounou touyuo puhnou Eye koa teisa halai moyu vo soukhai toue,
pepo khailai moyu ae-ao touyu sü soukhai toue,
teisanou datalai moyu chaachou sü souwure.
Sünasü Enou jüpa palai nasüe;
süna hai avei veilou ngalouyu nasü soulai,
ae hai nasü Ramai nou pa vete vuzülai.
6Ana Ramai sümoyu maiwo louzü shube poube bütoua polai bailai;
mai talinoua puletaoye sü bah nou deilou hoe.
7Puletaoye deilai toulouzü hu nou souyu basei moa kho-heung nou po-a deilai;
sütea puletaoye sü meinou deihawu bailai.
Zhih Tashoyu David vei Soureih Maitao
(1 Puo 11.10-41)
8David vei zhih tayu soureih veimaitao sü haitaoe: Soureih veih veilai mai asü vei süthai-apeio puh sü Tachemon puona Josheb Basshebeth toue; puhnou heung poa mai kaihchaye lah likhei nou du-a puletao hrülaiye southa khailoue.
9Mai asü hrohi zhih tayu ahai chenasü Ahoh vei khü hinou Dodo vei nahpoutu Eleazar tea kue. Teitheli David puhai koa Philistin maiye reih züta-e, ana Israel mai hai Philistin mai lulouhoa thaitsü tare. 10Ana Eleazar nou thaitsü khaitoumoa soutaosou lapo-a khoche nou Philistin maiye daotha thakou vealeyu donou puh bah sü khoche hi zütei toulou-a puh bah sü topalou hore, alia bah nouyule-a khoche sü poa zhalou homo koute puh lah likhei nou reih zü-a veiloue. Ramai nou süzhou-a Israel maiye panou ngaobamai jünou reih veiloue. Nakounou Israel maivei reihmaitao nou Eleazar hi dakhaive thaimaitao vei basei khesü poloua baie.
11Puh thaisü Harar mai Agee vei nahpoutu Shammah toue. Philistin mai nou toushi/hala alao hrüyu Lehi tea kuyu buh hinou vejüa buloure. Israel maitao hai ngaopia tutare, 12ana Shammah nou talou lao toutsü hinou lalou-a Philistin maiye reih soue. Ramai nou zhouvu hi-a Israel maiye panou reih veiloue.
13Chachiyu teile pare, süphaki soureih veishoyu Israel mai shirou hrohinou mai asütao nou David nou tutsüa buyu Abdullam lya qulu hi ve daoe. Philistin maitao nou Rephaim Deikho hinou reihbuh soulou-a buwe. 14Süphaki David sü chuhnou reihbu khosühao khaitouyu deichi ali hi bue ae Philistin mainou reih veilou-a Bethlehem hi lou buloure. 15David nou kilaova thainü lou-a haibüa paoe, “O, mai talinou-a Bethlehem robomü pe hi buyu dzükhao na hinou taho dzü saolou-a pove Eye panou ke louzü daizhouzhoa veilai sarou!” 16Hai hai choulou-a soureih veisho-a zhih tashoyu mai asütao nou Philistin reihmai nou buyu buh tachopoa taho Bethlehem dzükhao hinou dzü saolou-a David hi pove peie. Ana puhnou poveyu dzü sü ke bare; ana puhnou Ramai ye posheelayu dzü sü lalai-a baire. 17David nou “Mapaowo, Enou dzü hainasü ke louhoe! Dzü haina keyu sü thai-hri domoa nou poveyu puletao mai asü vei zhe keyu khihaoe,” tea paore. Sütea puhnou dzü sü kekhai touba-a baire. Hai hai khuvei veilai mai asü vei vah hasoe.
18Zeruiah pfüpai nou napeiyu Joab thaihou Abishai nou reih veihveilai “Mai Shirou” vei süthai-apeio sü soue. Lah puh likhei nou mai kaih asüye heung poa reih zü-a puletaoye southa khaitouyu vanou puh sü süthai-apeio sü souloue. 19Puh hai “Mai Shirou” hrohinou zhihta talai na soue, sütea zhih tayu mai shirou vei süthaipu soue, ana puh-a mai asütao hi koute zhih tamoe.
20Kabzeel puona Jehoiada vei nahpoutu Benaiah-a zhih tashoyu reihmai alie. Puhnou khuduyu vah sovei alao soupeie, vulia Moab mai reih veih veilai mai ahaiye puhnou southa peie. Teisaiki vü koushoa buyu teile phaki, vuli puhnou chipeikhaodu aliye kaobvü ali hinou southa peie. 21Du-soshoyu Ejipt mai ali heung poa nou bue, anou Benaiah nou sübou ali poa puhye sü southaloue. Benaiah nou takou puhvei heung sü shaolou-a heung sünanou khütha peie. 22Mai shirou hrohinou mai ali sou-a buyu Benaiah nou souyu puhvei khuvei khudu vah hasotao sü haitaoe. 23Puh hai khuvei maitao hrohinou matsü kayu alie, ana “Mai Asütao” nou zhih tayu koute hi khete moe. David nou puhye khoyu maitao pei hi panou aduna soue.
24-39“Mai Shirou” taosü haitao-e:
Joab thaihou Asahel
Bethlehem puona Dodo nahpoutu Elhanan
Harod hinou Shammah ae Elika
Pelet hinou Helez
Tekoa hinou Ikkesh nahpoutu Ira
Anathoth puona Abiezer
Hushah hinou Mebunnai
Ahoh hinou Zalmon
Netophah hinou Maharai
Netophah hinou Baanah nahpoutu Heleb
Benjamin khü hinou Gibeah puona Ribai nahpoutu Ittai
Pirathon hinou Benaiah
Gaash nghia buyu deikho hinou Hiddai
Arabah hinou Abialbon
Bahurim puona Azmaveth
Shaalbon puona Eliahba
Jashen vei nahpoutu maitao
Jonathan
Harar hinou Shammah
Harar hinou Sharar nahpoutu Ahiam
Maakah hinou Ahasbai nahpoutu Eliphelet
Gilo hinou Ahithophel nahpoutu Eliam
Karmel hinou Hezro
Arab puona Paarai
Zobah hinou Nathan nahpoutu Igal
Gad hinou Bani
Ammon puona Zelek
Beeroth hinou Nahara, puhnou Joab vei reihna pfüwe
Jattir hinou Ira ae Gareb
Hit puona Uriah
Zhih tashoyu reihmai shianai sü haitao-e.
Currently Selected:
2 SAMUEL 23: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
