2 SAMUEL 12
12
Nathan vei Chipao alia David nou Ledayu
1Ramai nou rachi paolawo Nathan ye David hi seivere. Nathan nou puh hi tave paoe, “Nuh ali hi mai ahai hrüwe, mai ali sü toungi-e ae alina sü toure hamai baie. 2Toungi puona vei kikhaorü alia zhaotu alao bue, 3toure hana sü puhnou hrüpove khaitouyu zhaotu ali khei bubaie. Puhnou sünatuye sü leshisho-a puhvei nahmaitaoye koa ki-a puhvei ki hinou hrüzho-a baie. Puhnou tousoyu touso vuzünou panou touso-a hrüa bue. Puhvei pai khao hinou panou touso toua ae daopo-a puh nah naotupai ali kheihao-a bue. 4Teitheli shemai ali hai hangi puona ki hi veive-a bue, hangi puona sü puhvei shepuo naye donou lah puhvei kikhaorütao sü dathapei pare, anou ali kheithe buyu toure hapuona vei zhaotu nasü polou-a sünanou shemai naye dathapei-a baire.”
5David nou ko haina choulou-a hangi puona pei hi rarou sholoua Nathan hi paoe, “Hri-a buyu Ramai zhih ku-a Enou paowe, süolouzü haibüyu vah souyu hangi puona hai thaizüe. 6Puhnou maiye zhuvea leshiyu ha-a alia hangiwe tea vah ashi souyu donou zhaotu nasü deida ahai zhopeiyu chie.”
7“Mai tainasü ne baie,” tea Nathan nou David hi chila peie. Israel maivei Ramai Mapao nou paoe: “Enou neye panou Israel mai veo soure donou theadzü noupeie alia neye Saul bah hinou vupa peie. 8Enou neye puh vei ki, puh vei khapfütao alia Israel ae Judah ahai khei vei vedei sü ne hi peie. Haitao hai neye donou khamo hie toulouzü hai jünou deida koute-a peilai. 9Ne daisounou avei paochi zümowe? Daisou-a haibüyu vah sovei ashi souwe? Nenou Hit puona Uriah ye sü reih hinou süho southawure, Ammon maiye panou puhye southawua puh vei chapfüye sü nenou naloure. 10Nenou avei chi zümoyu donou chuo khoche sü nevei tyaosholea hinou tarata laimoe, nenou Uriah chapfüye sü shaonaloure. 11Enou chaachou soulukhu ne hi paowe, süolouzü lah nevei kikhamai hrohinou neye hraiyumai panou palai, nevei nghingao hinou nevei tyamai beimai ali hi nevei kipfüye sü panou sazülai. 12Nenou kheikhei sou-a mah souwe, ana Enou vahsovei haina sü Israel mai hrülaiye panou hea teile hinou panou soungaolai.”
13“E Ramai nghoujünou mah souwure,” tea David nou paoe.
Nathan nou chila peie, “Ramai nou ne vei mah sü khaipeiwure, ne thailai more. 14Ana Ramai nou ngaora shoyu vah nasü nenou souyu donou, nevei nahpoutu nasü thai-a bailai.” 15Süthaisü Nathan hai lah ki hi dakhai tare.
David Nahpoutu Thaiyu
Uriah vei chapfü Bathsheba nou David hi napeiyu nahpoutu nasü soushisho loure. 16David nou nahtuye panou veiloure donou halia toumo somoa kheimathe deiphi hinou te-roupoa Ramai hi veachi pao-a khoe. 17Puh khenou buyu adumaitao nou puhye panou tashu touso touloure donou paoe, ana puhnou halia touso bare. 18Teithe anai chezhou sü nahpoutu sü thaire. Puh khenou adumaitao sü nahtu thaire touyu ko sü David hi paopire. Puletao nou haibüa paoe, “Nahtu thaimo ki koute-a Ehnou paoyu chi ali-a keipei bae, kakua nahtu sü thaire tea puh hi paokhailai? Thaiyu hai sülouyu thaiwo puh hai lahye soushi louveie.”
19Puhmaitao nou kheikhei sou-a chi phakuyu zhai hinou puhnou sülou-a “Nahtu sü thai-a baidou” tea noupare.
“Oungai puh sü thai-a baire,” tea puletao nou chila peie.
20David nou deiphi hinou tashu laloure, dzü khüloure, pei-a kuloure, sabanü-a daloure. Süthaisü puhnou Rathoki hi taloulou-a Ramai ye tho-e. Puhnou lah puhvei ki hi dakhai ve touso peio tea kholoua touso loure. 21“Nahtu thaimo ki sü ne hai kra-a halia touba sobakhai, ana nahtu thaire toukhaie ne tashalou-a hatouso tayu hai daitouwe touyu Etaowo sümore,” tea puh khenou adumaitao nou paoe,
22“Ouvai, nahtu hri-a busasü E ha toumo-somoa nou kra-a nou Ramai hi khowe, daisounou touyuo Ramai hai maiye zhuvea leshi süyu Ramaie, südonou zhuvea leshia nahtuye sü panou thaimore donou khowe. 23Ana chuo puh sü thaire, E daisounou chua hatoumo somoa lüa bulaige? Enou nahtuye sü souhri lou süwu? Enou teitheli puh hi velai, ana puhwo hatarali souyuma ahi velou hore.”
Solomon ye Nalouyu
24David nou puhvei khapfü Bathsheba ye panou levea more donou le sousa tare. Puh hai koa buzülou-a nahpoutu ali naloue, ae David nou puh zhih sü Solomon tea saloue. Ramai nou nahtuye sü leshi peie, 25ae Ramai nou rachipaolawo Nathan ye seive nahtu zhih sü Jedidiah tea sapeio tea kharochi peie, daisounou touyuo Mapao nou puhye sü leshie.
David nou Rabbah Polouyu
(1 Puo 20.1-3)
26Haibüa buyu teile phaki-a Joab nou Ammon maivei nuhdu Rabbah pei hi eitya reih sou-a poloulai tea bue. 27Joab nou kopomai seive David hi paoe, “Enou Rabbah hi reih hulou puletao nou tousoyu dzü teitei sü poloure. 28Chuwo bua buyu reihmaitao salou-a reih hulou puletao vei nuhdu Rabbah nasü lah nenou lou polouo. Nuhdu haina polouyu vei kathe hai avei zhih aveih sounü moe.” 29Südonou David nou reihmaitaoye salou-a reih hulou Rabbah nuhdu sü poloure. 30Ammon maivei bashara Molek pei hinou kilogram shiangou süyu vemai peirü ali alia peirü tena hisü mutei shoyu chuh lou-a David nou poloue. Mutei chuh nasü popashu lah puh vei veo peirü hi thouloue, nuhdu taina hinou na kukhe kukhe-a alao poloue. 31Nuhdu hi maitaoye sü kilai soulou-a panou süü vayu, phou marei kuyu alia naichuh souyu vah paitea hi taitsü shia vah soue. Puhnou Ammon maiye panou vah souyu bütoua kukhe maiye-a panou sübüa vah soue. Süthaisü puh alia puhvei maitao sü Jerusalem hi dakhai vetare.
Currently Selected:
2 SAMUEL 12: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
