2 SAMUEL 11
11
David ae Bathsheba
1Vemai hai khonü khana teile phaki soureih soutawe, ana David louzü ki hinou bua Joab ye panou reihmaitao sa-a reih soure donou seitawure. Puletao nou Ammon mai jünou reih veloue alia Rabbah nuhdu nasü sühaoloure, ana David louzü Jerusalem hi bue.
2Teitheli teinghei ngailouyu phaki, David nou züphao hinou tashulou-a kipei tapa sühao-a bue. Süphaki puhnou naotumai ali dzükhüa buyu sü zhingao loure. Naotupai sü hüvei shore. 3Naotupai hai thaoe touyu süloure donou David nou maiye seiho noutare alia puh sü Eliam nah naotupai Hit puona Uriah chapfü Bathsheba she tea süloue. 4David nou maiye seitaho Bathshebaye kulou-a panou puh hi save peie; puh hai leshilou-a sabu sazü loure. (Bathsheba hai khou vei zhe tawua pfüphao sousheeyu vei nanou chebüa baihie.) Süthaisü puh sü ki hi dakhai vetare. 5Somolu puh sü samode touyu sülou-a David hi samoyu ko hai paove peie.
6“Hit puona Uriah ye ahi seive peio” tea David nou Joab hi chi paoseita-e. Südonou Joab nou Uriah ye David hi seive peie. 7Uriah nou puh hi veyu ki, David nou Joab sü daibüa bue, puhvei maikhe mai hai kabüa bue, ae reih züyu sü daibüre tea noue. 8Sütea nouwu-a David nou puhye chuwo lah ne ki hinou ve sophilo tea paopeie. Uriah nou tapayu thai, David nou puhye donou tea sapeina ali peie. 9Ana Uriah nou lah ki hi vemoa nou süzhou zü veo ki reihkhao maiye koa rokhubomü hinou zü-a baire. 10Süzhou Uriah nou lah puh ki hi vemoe touyu sülou-a David nou Uriah ye kuve lou-a paoe, “Ne sü teile alao ki hi vekhai moa zhou nou ve-a baie, daisounou lah ki hinou ve solou mowe?”
11Uriah nou David hi haibüa paoe, “Israel ae Judah maikhe mai nou reih züre donou lahkuku ki thaowu-a reihbu hinou bue, Vo Sübvü-a sühinou bue ae ajünou du-somai Joab alia puh khenou adusomai koutea rekou nou bue. Südonou E kabüa nou lah aki hinou ve touso toua ae avei kipfüye ko-a sabu sazü khailaige? Ne hri-a bubusa nevei kilaio E sübüa nou sava-a hrüyu sü soukhai toulai moe.”
12Südonou David nou paoe, “Süthaisü zhou-a hai hinou chaolo, dosho Enou neye reihbu hi seidakhai tapeilai.” Südonou Uriah sü süzhou alia thainesho koute hai Jerusalem hinou nai-a buloue. 13David nou puhye sü kupove puh hinou pa touso loue, ae puhye sa-a nou süzhou khei-a zhaoh sozhiloure, ana süzhou khei-a puhsü ki hi vemoa lah puhvei sahba nou baloua veo vei fühao khoyu maitaoye koa züa baire.
14Thainesho shona sü David nou seiko ali rülou-a Joab ye peio tea Uriah tayu phaki panou pfü-a tare. 15Seiko nasü haibüa rüpeie, “Kaozhou shishilai reihbu hisü Uriah ye nghoujü hinou seikou thoupeio, süthaisü puh thailao nou laiyu maitaoye panou thaitsü taloua puhye panou reibuh hinou southawo.” 16Südonou Joab nou puhvei reihmaitaoye sa-a nuhdu hi reih hulouyu phaki, reih khoushore buh hisü Uriah ye seikou peie. 17Soureih maitao nou tapalou-a reih züyu phaki, David vei peikhomai taoli southawure, sühisü Uriah-a loure.
18Reih züyu phaki haibüa vepare touyu ko khesü David hi paota peie, 19ae Joab nou kopotare maina hi haibüa paolo tea paodoupeie, “Nenou reih züyu hi haibüa vepare tea paoyu thai, 20Veo nou rarou-a neletao daisounou nuh vei bokha hi kou nghitei-a hulouwe? Nuh vei bokha hinou voulou kapare neletao sümowu? 21Dao raichoki vuli Gideon nahpoutu Abimelech ye nuh vei bokha hinou southawure touyu sü neletao choloumowu? Thebez touyu buh hinou nahpfümai alinou thou veiyu chuh nou laikou khyathapei-a baie. Daisounou bokha nghitei tea hukouwe tea veo nou rarou-a paolouzü, ne vei reihmai thaiyu hisü Uriah-a thaire tea paopeio.”
22Südonou kopotayu maina nou David hi velou-a Joab nou haibüa paolo tea paopeiyu taosü tave veo hi paoe. 23Puh nou paoe, “Ngaobayu soureih maitao hai Etao jünou khouchipu loua tapa Etaoye duloure, ana Etao nou puletaoye nuhdu robomü khevai hudakhai thoupeie. 24Süthaisü puletao nou kivo levainou voulou kapa nevei reihmai peikhoyu mai taoli hai kathare; nevei reihmaitao hisü Uriah koute-a kathawure.”
25Seiko pfüve peiyu maina hisü David nou paoe, “Joab ye leveaso, ledulo, ae khudulo tea paopeio. Reihbu hisü thaomai nou thailai, thaomai nou hrilai touyu sü mailinou-a paolou hoe, khouchipu lou-a hudakhailou nuhdu sü polo tea paopeio.”
26Bathsheba nou puhvei kyapu thaire touyu ko hai sülou-a dongai pfüa nou bure. 27Dopfüyu teile cheyu thai, David nou puhye veo ki hi vewo tea kuloure, sütea puh sü veo vei khapfü soulou-a nahpoutu ali napeie. Ana David nou souyu vah haso khesü Mapao nou jüpa more.
Currently Selected:
2 SAMUEL 11: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
