1 SAMUEL 18
18
1Saul ae David nou chi phacheyu thaisü, Saul nahpoutu Jonathan nou David ye leshiyu hai lah puhye leshiyu bütoua leshi loure. 2Saul nou David ye sü süzhou teithe hinou puh hi khailoure, ae puhye panou lah ki hi dakhai tamore. 3Süthaisü Jonathan nou David ye koa akhai koute samai khamai soulai tea chaachou/vo ali souloure, daiolouzü Jonathan nou David ye leshi sholoure. 4Jonathan nou zaopoa laiyu zao nasü phaloua David ye noupeiwure, ae puhvei reihna, khoche, voulou alia khyakho hai-a David ye peiwure. 5Saul nou David ye seiho panou vah soutayu teitei sü puhnou veikhai touloue, südonou puhye Saul nou puhvei reihmai peikhowo sü panou souloure. Haibüyu hai Saul vei peikho maitao ae mai hrülai-a asa shore.
Saul nou David ye Ngaoraiyu
6David nou Goliath ye southaloua reihmaitao koa ki hi dakhai veyu phaki, Israel maivei nuh liki nou buyu naotu maitao nou sasho poa nou lou soua chopoa nou beibei, gaigou ae khubvü dapoa Saul veoye tapa süpeie. 7Naotu maitao nou sashoa nou haibüa lou sou-e, “Saul nou mai thethe southaloue, ana David nou mai thekirou kirou southa loue.” 8Saul nou haibüa lou souyu sü chouloua lekha loure. Puhnou paoe, “Puletao nou David ye sü mai thekirou-rou tea paopei khaie, ana Eye sü mai the-the tea pao-a baie. Puletao nou puhye sü panou athai sü veo soulaire!” 9Saul nou David ye sü süzhou teithe hinou ngaorai loua letsü loure.
10Thainesho sü Ramai hinou veyu rahshi rako nanou Saul hisü velou loure, ae puh sü puh ki hinou rarou shopoa vomai ali büa noulealea-a bure. Süphaki David hai teithetsü lou souyu büa gaigou poa lou soua nou bue, ae Saul hai heung ali poa bue. 11“Enou puhye sü kivo vahi phyamu khaiwulai,” tea Saul nou tsü choloure, ae puhnou bakha ahai hai heung nou laikou David ye phya-e, ana David nou bakha ahai khinou reiloure.
12Saul nou David ye ngaopi loure, daiolouzü Mapao nou puhye sü salai peie, ana puhnou puhye sü thaowure. 13Südonou Saul nou David ye sü panou puh hi bumoa reihmai theli peikhowo sü panou soutare. David nou reihmai saloua soureih souta-e, 14ae puhnou soureih soutayu teitei sü ngaloue, daiolouzü Mapao nou puhye koa salai peie. 15David nou veilou ngalouyu khesü Saul nou ngaolou khaie, puh hai ngaopipu loure. 16Ana Israel mai ae Judah mai hrülai hai David ye leshi-e, daiolouzü puh hai lamo shoyu süthai-apei mai ali-e.
David nou Saul Nah Naotupaiye Nalouyu
17Süthaisü Saul nou David hi paoe, “Nenou khuveia ae chilee cheche-a avei reihmai ali soua Mapao vei soureih soulouzü, Enou anah naotu tsüpai Merab ye ne ki khaipeilai.” (Haibüa sou louzü David ye sü puhnou lah southa moyuma Philistin mainou southa shulai tea Saul nou tsü choloure.)
18David nou chila peie, “E sü thao-e, ae apuo kihikha mai sü thao-e? Enou kabüa veo vei tyao sü soulou khailaige?” 19Ana Saul nou Merab ye David hi peilai touyu teile veyu phaki, puhnou David hi peimoa Meholath puona Adriel tea kuyu maipouna hisü peiwua baire.
20Anou Saul nah naotupai Mikhal nou David ye leshi loure, ae ko haina sü Saul nou choulouyu phaki lesa shore. 21Saul nou haibüa lah tsü cho-e, “Enou Mikhal ye puh ki khai peilai, sübüa honapai nou pa shodo souloua puhye sü Philistin maiye panou southawulai.” Südonou avu ahai chena soua Saul nou David hi paoe, “Chuo ne sü atyao soulaire.” 22Saul nou puhvei peikho maitao hi kheikhei soua nou haibüa David hi paopeio tea kharochi peie, “Veo nou chuo neye sü leshi loure, ae puhvei peikho maitao-a neye jüpawe, südonou chuteile hi hai puh nah naotupai ye nare donou teile sü veishore.”
23Südonou puletao nou David hisü haibüa paopeie, ae puhnou haibüa chila peie, “Hazho toulia moyu E büa buyu touhayu mai ali nou veo vei tyao soure sü veiyu le-e.”
24David nou paoyu chipao khesü Saul vei peikho maitao nou dakhai ve Saul hi paopeie. 25Süthaisü Saul nou David hi haibüa paopeio tea kharochi peie, “Veo nou jüpayu hai nghisha vei nako phasoua puhye ngaobayu mai hi khüngu phouyu büa Philistin mai kaihli southaloua puletao vei heebide loua pove peiyu likhei jüpa-a baie.” (Haibüa Philistin maiye panou David ye southare donou tsüchoda loure.) 26Saul vei peikho maitao nou David hi Saul veo nou paoyu chipao khesü ve paopei khaie, David hai veo vei tyao soure donou tsücho loua lesa sholoure. Shanghi soure teile dade loumo jünou, 27David nou puhvei maitaoye saloua nou Philistin mai kaih hai sü southa loure, ae David nou puletao vei hee sü bide loua veo hisü puhvei tyao souloure donou pove peire. Südonou Saul nou puh nah naotu Mikhal ye sü David ki khaipeiwure.
28 Mapao nou David ye sü salai peie, ae puh nah naotupai Mikhal nou puhye leshiwe touyu khesü Saul nou süloure. 29Südonou puh hai David ye ngaopipu loure, ae puh hria bukisa hai puhye ngaobayu mai ali soutare.
30Philistin maivei reihmaitao nou reih souyu tsühai David nou Saul vei reihmai peikhoyu mai kukhe jünou ngapu koute-a baiwe. Südonou David hai zhih tasho loure.
Currently Selected:
1 SAMUEL 18: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
