1 SAMUEL 17
17
Goliath nou Israel Maiye Vahyu
1Philistin mainou soureih soure donou Judah maivei teidei Sokoh nuhdu hinou velou jüloure, ae puletao nou Sokoh ae Azekah kohinou buyu Ephes Dammim tea kuyu buh hi fühao soua buloure. 2Saul ae Israel mainou Philistin maiye reih soure donou velou jüloua Elah Deikho hinou fühao souloure. 3Deikho kohinou bua Philistin mainou deichi alilo vanou buloure ae Israel mainou deichi alilo vanou bue.
4Philistin maivei reihmaitao hrohinou Gath nuhdu hinou veyu Goliath tea kuyu maipu nanou Israel maiye tapaloua valoure. Puh hai mitar asü phali sah sho-e, 5ae puhnou baosahu nou souyu khaokha hai sühcho raingouanai buyu ali nouwe, ae baosahu peirü pfüe. 6Puh phi hai baosahu nou zühao pfüe, ae baosahu nou soukhai touyu heung ali hai phao hinou kapfüwe. 7Puhvei heung hai deka dei due, ae puhvei heung hai sühcho anai phali süh-e. Puhvei rü hai mai ali nou poa puh nghoujünou rai-a tawe. 8Goliath nou Israel mai hi shusoua nou haibüa shapaoe, “Neletao daisounou reih soure donou zhapoa nou bue? E hai Philistin mai ali-e, ae neletao hai Saul vei qila maitao-e! Neletao hrohinou mai ali Eye reih souvare donou dopalo. 9Puhnou veiloua Eye southa loure toulouzü, Etao hai neletao vei qila soulai; ana Enou veiloua puhye southa loure toulouzü, neletao hai Etao vei qila soulai. 10Israel maitaore, neletao mailia Eye vahlou süyu mai buha-e, mai bulouzü mai ali tapa Eye dukhaio!” 11Saul ae puhvei maitao nou haibüa Goliath nou vahyu chipao sü choulou khaie, puletao hai ngaopi shore.
David nou Saul vei Fühao hi Veyu
12David hai Jesse nahpoutue, puh hai Judah teidei hi buyu Bethlehem nuhdu hinou Ephrath mai-e. Jesse hai nahpoutu acha bue, ae Saul nou veo soulouyu phaki, puh hai tsüpare. 13Puh nahpoutu asü hai Saul ye koa reihbu hi hotare. Tsükana zhih hai Eliab, ahai chena zhih nou Abimadab, ae asü chena zhih sünou Shammah toue. 14David hai nahpoutu nakhana-e, ae puh jürai mai asütao nou Saul ye koa buyu phaki, 15David hai teile teile hinou Bethlehem hi dakhaiho puh puo vei zhaotu sü khowe.
16Goliath nou Israel maiye sho-kou vah-a buyu hai teithe raidai pare.
17Teitheli Jesse nou puh nahpoutu David hi paoe, “Ne jürai maitao donou thoubu sakhai touyu sühdou kirou haitao poloua puletao nou buyu fühao hisü poho peio. 18Ae chonaodzü nou soukhai touyu touna haitao ke kirou hai reihmai peikhoye pove peio. Ne jürai maitao kabüa nou bue touyu sü taho zhuloua puletao hai vei-a bue touyu shee ali ahi pove ngaopeio. 19Saul veowo, ne jürai maitao, ae Israel reihmaitao hrülai hai Elah Deikho hinou Philistin maiye reih soure donou bue.”
20David nou thainesho shona nou kushuloua zhaotu khesü panou mai kukhe aliye khore donou paopeiwua touso taosü pfüloua puh puo Jesse nou paoyu thaifüa tare. Puhnou Israel maivei fühao hi velouyu phaki, Israel maitao hai reih hi tare donou reihna tuloua reihvo soua tapare. 21Philistin mai ae Israel mai hai reih soure donou reihmaitao sü zhu haohao nou zhingao-a veapoa bure. 22David nou touso taosü natao zhu-apeio hi khaipeiwua reihbu hisü tuve puh jürai maitao kabüa busa touyu zhure donou tare. 23Puhnou puletaoye cha-a buyu teile hinou Goliath nou Israel maiye raichoki büa nghoujülo takouloua vare, ae süsü David nou chouloure. 24Israel maitao nou Goliath ye zhingao loukhaie, puletao mai hrülai hai ngaopi shopoa tutare. 25Israel maitao nou haibüa alinou ali hi paoe, “Maipou hounaye zhukhaio! Puhnou Etaoye vah-a buyu chipao sü kei khaio! Veo Saul nou maitaralia puhye southa louyu mainaye sü buu dushoa peilai touwe; ae veo nou puh nahpai-a puh ki khaipeilai touwe, ae süpei sünou kikha sü polai moe touwe.”
26David nou puhye nghia buyu maitao hi noue, “Philistin maipu naye southa loua Israel maiye vupa peiyu naye daili peilai touwe? Heebi moyu Philistin maipu nanou hria buyu Ramai vei reihmaitaoye ngaophou moa vah-a buyu nasü thaoge?” 27Puletao nou David hisü Goliath ye southa louyu mainaye sü dai peilai touyu khesü paopeie.
28David vei jürai tsükhana nou David nou mai hi chi phayu sü choulou khaie, puhnou paoe, “Ne hai hinou dai souwe? Rekou nou buyu zhaotu khesü thaonou khowe? Enou nevei do sü süwe! Ne hikei tea nou hai hi tave reih züyu sü zhulai tea vewe!”
29David nou paoe, “E daili souwure? E mai hi chi lia noulou shivu?” 30Puhnou mai kukheli hia reive loua nou noupue, ae mai süna-a raibütoua chila sü peie.
31David nou paoyu sü kamai-a nou chouloua Saul hisü ve paopeie, ae Saul nou puhye sü leho kuloure. 32David nou Saul hi paoe, “Apaopuwo, Philistin puonaye sü maitaralia ngaopiso! Enou puhye sü taho reih soulai.”
33“Moe,” tea Saul nou chila peie. “Ne sü nahmaitou baihie, ana puh sü puhvei hrümai teitei nou reihmai ali soua bue, südonou ne puhye dulou hoe!”
34David nou Saul hi paoe, “Apaopuwo, nevei kilai E hai apuo vei zhaotu sü khowe. Zhaotu kho-a buyu phaki, khaosouveo moyuma vuh nou tave zhaotu nüpoa tayu phaki, 35Enou thaingou poho zhaotu khesü khailupa loua baiwe. Khaosouveo moyuma vuh nou Eye reida khaive duyu phaki, Enou raoqulu hinou leiloua southa loua baiwe. 36Enou souveo ae vuh khesü southaloue, sübütoua Ramai ye sümoyu Philistin puona-a Enou southaloua bailai, daiolouzü puhnou hriyu Ramai vei reihmaitaoye sü ngaophou more. 37Mapao nou Eye khao ae vuh hinou khailupa peie; puhnou Eye Philistin maipu haina hinou khailupa peia bailai.”
Saul nou chila peie, “Sükulouzü veire, tawo, Mapao panou neye salai peiyu sü soulou theo.” 38Süthaisü Saul nou David ye puhvei reihna nou tupeie; puhvei baosahu peirü rüpeie, ae reih pfüa souyu sabanü khesü thoupeie. 39David nou puhvei reihna tulou ae khoche poloua tazhuyu phaki, puh hai talou hore, daiolouzü puh hai reihna khesü pfükho moe. Süthaisü David nou Saul hi paoe, “E reihna hai sü pfüa reih soulou hoe, daiolouzü E haitao pfükho moe.” Südonou puhnou reihna khesü phawure. 40Süthaisü David nou zhaotu poa khoyu süüpo nasü puh bah hinou polou, rei hinou chuh lerüa buyu angou sü puh lekhabvü hi kothouloue, alia puh bah hinou lou sü poloua Philistin puona hilova takou tare.
David nou Golaith jünou Veilouyu
41Philistin puona sünou puh rü pfüyu naye panou raipoa koa nou David hilo tanghi koure. 42Ae puhnou tanghikou David ye ngaolou khaie, puhye sü ngaophou moa jünü loure, daiolouzü David hai hüvei shoa nou nahle maitou baihie. 43Puhnou David hi paoe, “Ne süüpo nasü poa daisoulai? E hai sei baie tea ne tsüchowu?” Golaith nou puh rah zhih kuloua nou David ye chaare. 44Puhnou David hi paoe, “Ahi takou khaio, Enou nevei pfüphao sü tei hi raohou ae rekhaona taoye panou touloulai.”
45David nou Goliath hi haibüa chila peie, “Ne louzü ahi khoche, heung ae rü pfüa takouwe, ana Ewo louzü nenou ngaophou moyu Israel maivei Ramai Mapao zhih hinou ne hisü takouwe. 46Zhou teithe Mapao nou neye sü abah hi thou peilai, ae Enou neye sü southa loulai, ae ne pei deloulai. Enou Philistin maivei reihmaitao vasou sü raohou ae rekhaona taoye panou tou loulai. Süthaisü deiphao mai hrülai nou Israel mai hai Ramai bue touyu süloulai, 47ae hai hi buyu mai hrülai nou Mapao hai puhvei maitaoye vupa peire hai khoche moyuma heung komoe touyu sü ngaoloulai, daiolouzü Puh hai reih kolouyu pue. Puhnou neletaoye sü Etao bah thoupeilai.”
48Goliath nou David hilo tanghi koure, ae David nou Philistin mainou reih soure donou zhapoa buyu hilosü thasho poa takoure. 49David nou puh lekhabvü hisü bah thaithou chuh ali poloua süna nou Goliath hisü laikou puh pu hisü deipeie, ae puh peirao sü deiphewua puhsü deiphi kaokou tare. 50Sübüa David nou Goliath ye sü khoche pomoa lou ae chuh ali nou southaloue. 51Süthaisü David nou tukou puh phao hisünou laloua puhvei khoche sü paipa loua puh pei deloua puhye sü southaloue.
Philistin maitao nou puletao vei reih souveih kayu maipuna thaiyu sü ngaolou khaie, puletao hai tupho rarou tare. 52Süthaisü Israel mai ae Judah maitao nou shusoua Philistin maiye sü thaingou poa Gath ae Ekron vei robomü hi koute huve peie. Sübüa Philistin maiye sü Shaaraim ludu hinou Gath ae Ekron koute hai ludu sasasü kaodu poa nou ta-e. 53Israel mainou Philistin maiye hutawua dakhai veyu phaki, puletao nou homaitao vei fühao hi buyu navei teitei sü poloure. 54David nou Golaith vei pei sü Jerusalem hi pove-e, ana Goliath vei reihna khesü puhvei sahpao hi khaiwure.
David ye Saul hi Popeiyu
55David nou Goliath ye reih zülai tea tayu phaki, Saul nou puhvei reihmai peikhowo Abner hi noue, “Abner, nahlepuna hai thao nahpoutue?”
Abner nou chila peie, “Apaopuwo, E-a sülou more.”
56“Nahlepouna sü thao-e touyu taho phoulo,” tea Saul nou kharochi peie.
57David nou Philistin puona ye southaloua dakhai veyu phaki, Abner nou puhye saloua Saul hi ve-e. Süphaki David hai Goliath pei poa laihie. 58Saul nou puh hi noue, “Nahlepu nare, ne thao nahpoutu-e?”
“E hai Bethlehem hinou buyu nevei kilai Jesse nahpoutu-e,” tea David nou chila peie.
Currently Selected:
1 SAMUEL 17: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
