1 VEMAITO 5
5
Solomon nou Rathoki Soure donou Soudayu
(2 Puo 2.1-18)
1Tair hi veo Hiram hai teisa nou David vei samai sou-a bue, ae puhnou David thaosou puh nahpoutu Solomon nou vekou loure touyu süloukhai-e, puhnou puh hi süh-seitamai seive peie. 2Solomon nou veo Hiram hi chipao haibüa seidakhai peie: 3“Nenou süa bue, süolouzü apuo David vei teile hisü puhnou reih veikhai toulou mokoute, pehao hi buyu ngaoba maitaoye reih soua puhnou Mapao ye thore vei Rathoki souyu teile ngaolou more. 4Ana chuo avei Ramai Mapao nou Eye kaonayu nasü pehao hi buyu tyahrü veishi hi peie. Ewo chuo ngaobayu mai hare, ae Eye dure kaozhou ashi hare. 5Mapao nou apuo David hi haibüa chaachou soupeie, ‘Ne thaosou pa vekoure ne nahpoutu nanou Eye donou Rathoki nasü soulai.’ Chuo Enou avei Ramai Mapao ye thore rathoki sü souta laire tea lela loure. 6Südonou nevei maitaoye seiho Lebanon hinou sedar süü sü vipeio. Avei maitao-a panou koa puletaoye vah soulai. Enou nevei maitaoye sü nenou paoyu shizho taosü peilai, daiolouzü nenou veisho-a süwe, süolouzü avei maitao hai nevei maitao büa süübe hai vilou sümoe.”
7Hiram nou Solomon hinou chipao haisü choulou khaie, puh hai leva shore, ae puh nou haibüa paoe, “Zhou teithe Mapao ye paosholo, daiolouzü David hi haibüa tsüdo veiyu nahpoutu ali peia panou dushoyu tyahrü pei panou puh thaosou vekou louyu donou.” 8Süthaisü Hiram nou Solomon hi haibüa ko hai paosei veie, “Nenou seiveiyu chipao sü Enou ngaoloure, alia nenou kho-a buyu sedar süü ae haosüü sü peilai. 9Avei maitao nou Lebanon hinou zai hi koute hai süü daokou peilai, ae süü sütao sü phupaloua nevei buh hisü pove peilai. Avei maitao nou buh sühinou süü phukhai touyu khesü phipa peilai, süthaisü nevei maitao panou zhulo. Neye panou avei maitaoye touso hai peiyu Enou jüpa-e.”
10Sübüa Solomon nou jüpayu haosüü alia sedar süütao hai Hiram nou peie, 11alia Solomon nou Hiram vei maitaoye southou ton thehai ae oliv theadzü litar the kaihdai hai potei tsüsü peie.
12 Mapao nou chaachou soukhai touyu thaifüa Solomon hisü ratsü hai peie. Hiram ae Solomon kohisü keavei lathaoyu sü peie, alia puhai koa vo soukhaitoue.
13Veo Solomon nou mai 30,000 hai Israel mai hrohinou taichü poa vah soure donou dopa khailoue, 14alia Adoniram panou puletao peikhowo sü soue. Puhnou puletaoye sü maime asü soua me ali hinou mai 10,000 hai dade peiloua puletaoye panou khouh ali hai Lebanon hinou vah soue, ae khouh ahai sü panou ki hi dakhai ve-e. 15Solomon nou mai 80,000 hai deichi hilonou chuh da-e, alia mai 70,000 nou pa chuh pfüa vahsoue, 16alia mai 3,300 hai panou puletaoye zhua vah panou soure donou khaipeie. 17Solomon vei kharochi thaifüa puletao nou chuh veishoyu adu tyanou daloua Rathoki vei beikhei sü poa soue. 18Solomon alia Hiram vei vah souyu maitao, ae Baiblos hi maitao nou Rathoki soure donou süü khesü soupeie, ae chuh dapeie.
Currently Selected:
1 VEMAITO 5: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
