1 VEMAITO 4
4
Solomon vei Peikhomaitao
1Solomon nou Israel mai veishi hi veo soure, 2ae mai haitao nou puhvei peikho maitaoe;
Zadok nahpoutu Azariah nou napao soue.
3Shisha vei nahpoutu Ahijah alia Elihoreph nou chikubu hi rü-apeio sü soupeie
Ahihed vei nahpoutu Jehoshaphat nou rü-apeio soue.
4Jehoiada nahpoutu Benaiah nou Reihmai Peikhowo sü soue.
Zadok alia Abiathar nou napao soue.
5Nathan nahpoutu Azariah nou teidei peicha maitao peikhowo sü soue,
Nathan nahpoutu Zabud napao nou veo vei paodou-apeio soue.
6Ahishar nou veo vei kilai maitao hi peikhowo sü soue,
alia Abda nahpoutu Adoniram nou taitsü poa vah souyu hi peikhowo sü soue.
7Solomon nou Israel maitao hinou teidei kho-apeio mai kiahai dopaloue. Puletao nou veo alia puhvei kikhamaiye panou toure vei touso pove lapeie. Mai alinou khouh alili vei pove peie. 8Mai sütao zhih alia puletao nou khore teidei haitaoe:
Benhur: Ephraim maivei nuh teideitao
9Bendekar: Makaz, Shaalbim, Beth Shemesh, Elon, alia Beth Hanan nuhdutao
10Benhesed: Arubboth ae Sokoh vei nuhdutao alia Hepher vei teidei veishi
11Benabinadab, puh hai Solomon vei nahnaotu Taphath ye naloue: Dor vei teidei teitei
12Ahilud nahpoutu Baana: puhnou Taanak, Megiddo alia Bethshan vei teidei teitei, Zarethan nuhdu nghiyu, Jezreel nuhdu vei khelo, Abel Meholah ae Jokmeam nuhdu koute
13Benzeber: Gilead teidei hi buyu Ramoth nuhdu, Jair vei khü, Manasseh vei tyaosholea maitao vei nuh teitei, ae Basham vei Arzob deizetao, nuhdu rairou, hu nou rokhubomü soukhai touyu ae chuh nou kivo khokhai touyutao
14Iddo nahpoutu Ahinadab: puhnou Mahanaim vei deizetao
15Ahimaaz, puhnou Basemath ye naloue, hai-a Solomon vei nahnaotu ali-e: puhnou Naphtali teidei khoe
16Hushai nahpoutu Baana: puhnou Asher deize hilo ae Bealoth vei nuhdu khoe
17Jehoshaphat, Paraoh nahpoutu: puhnou Issakar teidei khoe
18Shimei, Ela nahpoutu: puhnou Benjamin vei teidei khoe
19Geber, Uri nahpoutu: puhnou Gilead teidei, Amor mai hi veo Sihon alia Og, Bashan teidei hi veo nou khasa-a buyu teideitao hai khowe.
Mai haitao kiahai pei hinou teidei khowo mai ali hai khaikhai toue.
Solomon nou Veo Souyu phaki Vasayu
20Judah alia Israel maitao hai chosha louhoa buyu zaipe hi vünai zhoua bue; puletao nou touso-a vasho-a nou bue. 21Solomon vei vedei Euphratis Rei hinou poa Philistia hi koute alia Ejipt maivei deirai hi koute buyu tyahrü teitei nou loue. Puletao nou puh hi kikha peie ae puhvei hümamai teitei hinou puhvei khakhe hinou hrüe.
22Solomon nou teithe ali hinou touso ngaoyu hai southou litar thengou, thoubu litar the kirou, 23hübo veiyu chode kirou, kikhaorü nou kai, alia zhaotu kaihli, süpei hinou kho-shu, ae hou sü louwe.
24Solomon vei vedei hai Euphratis rei teinghei loulo Tiphsah hinou teinghei loulo Gaza hi koute-e. Euphratis vei teinghei loulo buyu veo maitao hrülai puhvei khakhe hinou bue, alia kinapa soua buyu tyadei veishi hisü kaona-a hrüa bue. 25Puhnou hria buki sasü Judah alia Israel maitao nou veahoyu daomoa kaozhou vei-a hrüe, lahkuku vei kihikha mai hai kipei bua darkhashi ae doushibe hai bue.
26Solomon vei rheiluki pfüre donou rhei hai theraidai bue alia reihmai nou pfüre rhei thekiahai bue. 27Solomon vei teidei khomai kiahai taonou khouh alili hai puletaoye panou Veo Solomon alia puhvei ki hinou buyu maitaoye panou toure donou koyu touso khesü pfüve peiwe 28Teidei khomaitao nou puletao vei zha hai süthou alia rhei panou toure rouvo koutea pfüla peiwe.
29Ramai nou Solomon hi ratsü ae dokai, alia tsüsü hai chosha louhosou peikhai toue. 30Solomon nou tsüveiyu hai Ejipt maivei teinghei palo ae teinghei loulo tsüveiyu maitao jünou veipu hie. 31Puhnou Ethan, Ezrahit, ae Heman, Kalkol, alia Darda, Mahol nahpoutu maitao jünou tsüdo veipu hie, alia pehao hi buyu tyahrü hrülai hisü puhvei zhih hai tare. 32Puhnou tsüchi thehsü alia lou thehli jünou la-a dapa peie. 33Puhnou süübe, proube, Lebanon hi buyu sedar süübe hinou kivo hinou paopayu proube vanou paopeie; puhnou hrikhaona, raohou, nghou ae kha donou paopeie. 34Deiphao hi vemai hrülai nou puhvei tsüveiyu hai süloua maikhe mainou puhye sapeina alao seive peie.
Currently Selected:
1 VEMAITO 4: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
