1 VEMAITO 15
15
Judah hi Veo Abijah
(2 Puo 13.1-14)
1Nebat nahpoutu Jeroboam nou Israel mai veo souyu po kiacha kousü Judah hi Abijah nou vekou loue. 2Puhnou Jerusalem hinou po asü hai veo soue. Puh pfü hai Absalom nah naotupai Maakah toue. 3Ae puhnou puh puo büa mahmo teitei sü soue, alia puhnou puhvei Ramai Mapao ye sü puh paoh David büa puhvei tsüle hai peimore. 4Ana David donou puhvei Ramai Mapao nou Abijahye nahpoutu ali panou puh thaisü veo soure donou peie, ae Jerusalem sü panou vuloure donou peie. 5Daiolouzü David nou Hit puona Uriah hi puhvei hümai teitei nou puhye soulo tea Mapao nou kharochi peiyu veishi hai soukhai toupeie, ae puhvei nghingao hinou kaozüyu vah likhei soua baie. 6Chuo Rehoboam ae Jeroboam nou soureih souyu nasü Abijah vei hümamai veishi hia soua baie. 7Abijah nou soupfüyu veishi sü Judah hi Vemaitao vei Hrüko Larübvü hi rüthou peikhai toue.
8Abijah nou puhvei paoh maiye koa thaitare; ae puhye sü David Nuhdu hinou poa daovu peie. Puh nahpoutu Asa nou puh thaosou pa vekou loue.
Judah hi Veo Asa
(2 Puo 15.16—16.6)
9Israel hi Veo Jeroboam nou veo louyu po kai kousü Asa nou Judah hi vekou loue, 10ae puhnou Jerusalem hinou po raidaili hai veo soue. Puh pai zhih hai Absalom nah naotupai Maakah toue. 11Asa nou puh pao David nou souyu büa Mapao vei ngheingao hinou kaozü nasü soue. 12Puhnou poutu naotumai khakhayu khesü teidei hinou souha peie ae cheche moyu rathobu hinou buyu khakhapfü khesü souha peie, alia puh jünou rai-a buyu maitao nou soukhai touyu bashara veishi sü puhnou polai peie. 13Puhnou puh pai Maakah ye vepfüpai vahbu hinou popa peie, daiolouzü honapai nou ngaorayu Asherah rahpfü vei bashara hai soukhai toue; ae Asa nou bashara khesü soushi peie ae Kidron deikho hinou poho mei deipeie. 14Asa nou cheche moyu rathobu veishi hai souhalou moyuma, puhnou puhvei hrümamai veishi hinou Mapao hi chilee cheche-a hrüe. 15Puhnou ae puh puo nou Mapao hi peithou khaitouyu na teitei, sana ae shahu veishi-a Rathoki hi pothou khaipeie.
16Veo Asa ae Israel hi Veo Baasha puhai vei hrümamai sasasü soureih soukoute-a baie. 17Israel hi Veo Baasha nou Judah hi reih huloure, ae Ramah nuhdu nasü puhnou kaopo pohao loua panou mai aliro Judah hi tapa talou more. 18Süthaisü Veo Asa nou Mapao vei Rathoki hi khaitouyu shahu ae sana teitei, alia veo ki hi buyu nangi veishi sü poloua puh vei peikhomai ye panou Sairia maivei Veo Tabrimmon nahpoutu, Hezion tyao Benhadad hi seiho peiwure, ae haibüa seiko-a seita-e: 19“Apuo ae ne puo nou chavei lathaoyu büa ahai-a chavei lathao-a bulaikhe. Enou ne hi shahu ae sana sü sapeina soua seive peie. Nenou Israel hi Veo Baasha ye chaveiyu sü baipeio, sükulouzü puhvei reihmaitao hai avei teidei hi buyu taosü sata-a bailai.”
20Veo Benhadad nou Asa veo nou paoyu sü aetou peiwure ae puhnou puhvei reihmai peikhowo alia reihmai sü seive Israel maivei nuhdu khesü soureih soue. Puletao nou Ijon nuhdu, Dan, Abel-beth Maakah ae Galilee vei Zai nghia buyu teideitao ae Naphtali teidei teitei hai poloure. 21Veo Baasha nou vepa-a buyu ko sü choulouyu phaki, puhnou Ramah nuhdu kaopo poa buyu sü chaore ae Tirzah hi tare.
22Süthaisü Asa veo nou Judah teitei hi mai hrülai nou Ramah hinou Baasha nou pove khaitouyu chuh ae süü khesü polo tea kharochi peie. Na sütao nou Asa nou poa Mizpah ae Geba touyu Benjamin vei teidei hi buyu nuhdu haisü kaopo pohao loue.
23Asa veo nou soupfüyu vah veishi, puhnou khuveisho-a soukhai touyu vahtao ae nuhdu kaopo pokhai touyu veishi hai Judah hi Vemaitao vei Hrüko Larübvü hi rüthou khaitoue. Ana puhnou tsüpayu thai, puh phi souloua puh sü shovaire. 24Asa sü thaire ae puhye David vei Nuhdu vemaitao vei khüh hinou poa daovu peie, ae puh nahpoutu Jehoshaphat nou puh thaosou pa vekou loue.
Israel hi Veo Nadab
25Judah hi Veo Asa nou veo soulouyu po ahai kousü Jeroboam nahpoutu Nadab nou Israel mai hi vekou loue, ae puhnou po ahai sü veo soue. 26Puh puo büa puhnou Mapao vei nghingao hinou vah ashi khesü soure ae Israel maiye süthaisa-a mah soutare.
27Issakar khü hinou Ahijah nahpoutu Baasha nou Nadab ye southalai tea shodo ashi souloure, ae Nadab nou puhvei reihmaitaoye sapoa Philistin hi buyu Gibbethon nuhdu hi soureih soulouyu teile hinou southawure. 28Haibüa vepayu hai Judah hi Veo Asa nou veo soulouyu po asü kounoue, ae Baasha nou Nadab thaosü Israel mai hi pa vekou loue. 29Puhnou pa veo souha louyu thaibü, Jeroboam vei kihikhamai hrülaiye sü southa tare. Mapao vei chipao hinou puhvei kilaio Shiloh puona rachipaolawo Ahijahye panou paopeiyu thaifüa puhnou Jeroboam vei kihikhamai hrülaiye sü southa khaitoure, mai ali koute-a shokhai peimoe. 30Haibüa vepayu hai Jeroboam nou mah souyu vanou ae puhnou Israel maiye panou mahmo souyu donou Israel maivei Ramai Mapao vei lekha rarou soupa peiyu donoue.
31Nadab nou soupfüyu veishi hai Israel hi Vemaitao Hrüko Larübvü hi rüthoupei khaitoue. 32Judah hi Veo Asa ae Israel hi Veo Baasha puhai vei hümamai teitei sü soureih soukoute-a baie.
Israel hi Veo Baasha
33Judah hi Veo Asa nou veo soulouyu po asü kousü Ahijah nahpoutu Baasha nou Israel maivei teidei teitei hi vekou loue, ae puhnou Tirzah hinou po kaidai hai veo soua khasa-a hrüe. 34Puhnou Veo Jeroboam büa Mapao nghingao hinou vah ashi khesü soure, ae Israel maiye süthaisa-a mah soutare.
Currently Selected:
1 VEMAITO 15: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
