1 VEMAITO 14
14
Jeroboam vei Nahpoutu Thaiyu
1Teile süphaki, Jeroboam nahpoutu Ahijah sü souloure. 2Ae Jeroboam nou puh chapfü hi paoe, “Zhu soudaloua panou mailia neye sülouso, sübüa Eye panou Israel mai hi veo soulai tea paopeiyu rachipaolawo Ahijah nou buyu Shiloh hi tawo. 3Puhye raokhaopho kirou, raokhaoki daotu, ae laivoudzü bvüli tea pove peio. Ahai nahpoutu sü daibülai touyu sü puh hi noulo, ae puhnou ne hi paongao peilai.”
4Südonou Jeroboam kipfü nou Shiloh hi Ahijah vei ki hisü tare. Ahijah sü tsülouyu donou puh nghithou hai ha ngaomore. 5Mapao nou Ahijah hi Jeroboam chapfü sü puh hi ve puhvei nahpoutu soua buyu na donou noulai tea laire tea paopeie. Ae Mapao nou puh hi kabüa paolai touyu sü paopeiwure.
Honapai nou velouyu phaki, puh sü mai kukhe mai ali zhai souloure. 6Ana honapai nou kikhu hi takouyu kho sü Ahijah nou chouloua puhnou honapai hi paoe, “Taloulo. Enou süwe ne sü Jeroboam chapfüe. Ne daisounou mai kukhe ali zhai souwe? Neye donou ahi ko ashi paopeia baire. 7Taho Jeroboam hi Israel maivei Ramai Mapao nou haibüa paoe tea paopeio: ‘Enou neye panou avei Israel maitao hi veo soure donou dopeie, 8ae David vei kihikhamai hinou vedei sü ne hi peie. Ana nenou avei kilai David bümore, puh louzü avei chikha züwe, alia puhvei hrümai veishi nou peia Enou jüpayu kaozü vah likhei soua baie. 9Ana ne louzü ne jünou rai-a khasa-a hrüyu maitao jünou shipure. Nenou Eye malaiwure ae bashara alia zhurai khesü souloua thotayu vanou avei lekha rarou soupa peiwure. 10Südonou Enou nevei kihikhamai hisü hakayu hai pove peilai, ae nevei tyaosholea hrülai, tsümai nahmai sümoa poutumai hrülaiye sü southakhai toulai. Enou nevei kihikha maiye sü choba velaiyu büa souhakhai toulai. 11Nevei kikhamai taralinoua nuhdu hinou thai louzü puhye sü sei nou touloulai, ae vakou nou thai louzü puhye sü rashopeiki nou touloulai. Haisü Mapao Enou paowe.’”
12Ae Ahijah nou Jeroboam chapfü hisü haibüa paopue, “Chuo ki hi dakhai tawo. Nenou nuhdu hi talouyu phaki ne nahpoutu sü thai-a bailai. 13Israel mai hrülai nou puh donou dopfüa puhye sü daovu peilai. Jeroboam vei kihikha maitao sü puhye likhei kaozü hinou daovu peia bailai, daiolouzü Israel maivei Ramai Mapao nou puhye likhei jüpa-a baie. 14Süpei hinou Mapao nou Israel mai hi vemai kukhe ali dopaloua puhye panou Jeroboam vei kihikhamaiye sü souhakhai toulai. 15Mapao nou Israel maiye sü tudee peilai, ae puhye sü rei hi poube buyu ali büa pfüa nghoupeilai. Puhnou Israel maiye puletao vei puopao maitao hi peikhai touyu teidei aveih hinou souhawulai, ae Euphratis Rei jünou la-a sourarou laiwulai, daiolouzü puletao nou Asherah rahpfüpai zhurai souloua thoyu donou avei lekha soupa peiwure. 16Jeroboam vei mah donou ae puhnou Israel maiye süthaisa-a mah souyu donou Mapao nou Israel maiye thaowure.”
17Süthaisü Jeroboam chapfü nou kushuloua Tirzah hi dakhai tare. Honapai nou puh ki hi talouyu phaki, puh nahpoutu sü thaire. 18Ae Mapao nou puhvei kilaio rachipaolawo Ahijah ye panou paopeiyu büa Israel mai hrülai nou puhye donou dopfüa daovu peie.
Jeroboam Thaiyu
19Jeroboam nou soupfüyu vah veishi, puhnou soureih souyu ae nuhteidei khasa-a hrüyu ko khesü Israel Maivei Vemaitao Hrüko hi rüthou peikhai toue. 20Jeroboam nou po kaihai hai veo soue, süthaisü puh sü thaire, ae puh nahpoutu Nadab nou puh thaosou pa vekou loue.
Judah hi Veo Rehoboam
(2 Puo 11.5—12.15)
21Solomon nahpoutu Rehoboam nou po raidaili payu phaki puhnou Judah hi vekou loue, ae puhnou po kianai hai Mapao nou Israel maivei teidei veishi hinou puhye panou thore donou dopa khaitouyu Jerusalem nuhdu hinou veo soue. Puh pfü zhih sü Ammon maipfü Naamah tie.
22Judah hi mainou Mapao ngheingao hinou mah sü soure, ae puletao nou raichoki puletao vei puopaoh maitao jünou mah sü soupu peia puhvei lekha sü soupa peiwure. 23Daiolouzü puletao nou cheche moyu rahye thore buh sü souloure, ae deichi alia süübe phi veishi hinou Asherah vei zhurai ae chuh sholoua thotare. 24Hateitei jünou shikayu nasü naotu poutu sümoa cheche moyu rathobu kinou puletao hai khakha tare. Judah hi maitao nou haoshoyu vah haso, raichoki Israel mainou talouyu phaki Mapao nou teidei sühinou hulai peiyu maitao nou soupfüyu vah khesü soutare.
25Rehoboam nou vekou louyu po angou kousü Ejipt hi Veo Shishak nou Jerusalem hi soureih souloue. 26Puhnou Mapao vei Rathoki hi buyu ae veo vei ki hi buyu nangi veishi alia Solomon nou sana nou rü soukhai touyu teitei hai pota khaitoure. 27Veo Rehoboam nou sütao thaosü baosahu nou rü souloua veo vei ki khoyu peikho maitao bah hi thoupeie. 28Ae veo nou Mapao vei Rathoki hi veyu chüsü, reihkhao maitao nou rü sütao pfüwe, ae süthaisü dakhai veyu phaki poloua reihkhao maivei kide hi khaiwe.
29Rehoboam nou soupfüyu vah veishi hai Judah hi Vemaitao vei Hrüko Larübvü hi rüthou peikhai toue. 30Rehoboam ae Jeroboam puhai vei teile teitei hisü soureih soukoute-a baie. 31Rehoboam sü thaitare ae puhye vemai vei khüh, David Nuhdu hinou poa daovu peie, ae puh nahpoutu Abijah nou puh thaosou pa vekou loue.
Currently Selected:
1 VEMAITO 14: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
