ZEFANIA 2
2
Sim tûra ngenna
1Zah nachâng hre lo hnamte u,
In-au khâwm ula, pung khâwm rawh u;
2Buhsi anga len bo in nih tûr hun ruat thlen hma,#2:2 LXX lamah, ‘pangpâr anga in vuaia in thih hma’ tih a ni. Lalpa thinur na tak in chunga a lo thlen hma leh Lalpa thinrimnain a nan hma che u hian.
3Ram chhûnga mi tlâwm, a thupêk zâwmtute#2:3 mi tlâwm tihte hi mi rethei, tihduhdahho sawina a ni, Pathian tâna intiretheite an sawina a ni fo. chuan
Lalpa chu zawng rawh u,
Dik takin ti ula, thuhnuairawlh takin awm rawh u,
Lalpa thinur ni-ah chuan in him mial mahna.
Israel ram chhehvêl hnam dangte chhiatna tûr
4Gaza khua an rauhsan ang a,
Askelon pawh a chhe vek ang.
Asdod mite chu chhûn laiah an ûm chhuak ang a,
Ekron khaw mite pawh an kawi chhuak vek ang.
5Tuipui kama chêng, Keriot mite u,
In chung a pik e! Lalpan in chungthu a sawi hi:
Filistia mite chênna
Kanan ram chu, luahtu awm lo khawpin ka tichhe vek ang a,
6Tuipui kamte chu a hnim vek ang a,
Berâm huang leh berâmpute bûk khuarna hmun a ni ang.
7Juda hnam thi bângten chûng ram chu an nei ang a,
An berâmte chu an tlattîr ang.
Zânah Askelon mite in ruakah an riak ang a,
Lalpa an Pathian-in a duhsak ang a,
A tihmuingîl leh ang. #Isa. 14:29-31; Jer. 47:1-7; Ezek. 25:15-17; Joel. 3:4-8; Amos. 1:6-8; Zak. 9:5-7.
8Moab mite chapozia te,
Amon mite an chhiatziate ka hria a,
An ram chhuhsak tuma chapo taka ka mite an vau dânte pawh ka hre reng a ni.
9Engkim Lalpa, Israel-te Pathian chuan heti hian a ti:
Moab chu Sodom angin a chhia ang a,
Amon mite pawh Gomora mite ang an ni ang.
An ram chu chi leilung, kângṭhaia khat,
Eng atân maha tlâktlai tawh lo a ni ang.
Ka mi, thi bângten an rûn ang a,
Ka hnam zînga la dam chhunten an neihsak ang.#Gen. 19:24.
10An chapo man an hmu dâwn,
Engkim Lalpa mite an hmuhsita an nuihzatbûr avângin.
11 Lalpa chu an tân ṭihbaiawm tak a ni ang.
A ni, lei chunga pathian zawng zawng chu a hrêk chau vang a,
Tuipui kama chêng hnam tinrêng ten
Amah chu mahni hmun ṭheuhvah chibai an bûk ang. #Isa. 15:1—16:14; 25:10-12; Jer. 48:1—49:6; Ezek. 21:28-32; 25:1-11; Amos. 1:13-15.
12Nangni, Ethiopia mite pawh
Ka khandaiha thah in ni ang.#Isa. 18:1-7.
13Hmâr lam ram chungah a kut a lek ang a,
Asuria chu a tichhia ang;
Ninevi khua pawh a tiṭiau vek ang a,
Thlalêr ramrovah a chantîr ang.
14Chutah chuan ranrual leh sa tinrêng,
A rualin an bawk ang a,
Thlalêr chhimbuk leh hrângkirte chu,
Ban chhîp bâwkah#2:14 Khua hi a ram vek dâwn a, a lung ban lu zâwlahte chuan thlalêra chêng savate an riak dâwn a ni. an riak ang a,
Tukverhahte an hrâm ang a,
Kailâwnahte choak an fu ang a,
Sidar thing inte pawh a chhe rem#2:14 In sakna hmanrua leh in chhûng bungraw siam nâna sidar thing tlote pawh a chhe dâwn a ni. rum ang.
15Hei hi khawpui chapo, pawisak nei lo,
‘Kei aia chak tu nge awm?’ ti rilru ṭhîntu awm dân chu a ni.
Mahse, heti khawp hian a chhe ta si a,
Ramsate riahhmun mai a lo ni ta,
A hmu apiangin diriam takin an chek khum tlawk tlawk ang. #Isa. 10:5-34; 14:24-27; Nah. 1:1—3:19.
Currently Selected:
ZEFANIA 2: MIZCLBSI
Highlight
Copy
Compare
Share
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
