ZEFANIA 1
1
1Judai ramah Amona fapa Josia a lal laiin, Zefania hnênah Lalpa thu a lo thleng a. Ani chu Hezekia thlah, Amaria fapa Gedalia fapa, Kusa fapa a ni.#2 Lal. 22:1—23:30; 2 Chr. 34:1—35:27.
Lalpa rorêlna ni
2“Lei chunga thil awm zawng zawng ka tiboral vek dâwn,”
Tih hi Lalpa thuchhuak a ni.
3“Mihring leh ramsa ka tiboral vek ang a,
Chunglêng sava leh tuifinriat sanghate pawh;
Mi sualte ka inchhuihthlûktîr#1:3 ‘Mi sualte chhiatna ka tithleng ang,’ tihna a ni âwm e. ang a,
Lei ata mihring ka nuai bo vang,”
Tih hi Lalpa thuchhuak a ni.
4“Juda-ho chungah kut ka thlâk ang a,
Jerusalem-a chêng zawng zawng chungah pawh;
Baal hnuhma zawng zawng he hmun ata hi
Ka paih chhuak vek ang a,
Milem puithiamte hming pawh
Tu man an hre reng tawh lo vang.
5Ni te, thla te, arsi te#1:5 Vâna thil awm zawng zawng sawina a ni. in chung zâwla biaa,
Lalpa chibai bûka, a hnêna thu tiam sia,
Milkoma hnêna chhia chham leh site leh
6 Lalpa hawisana zui duh lote,
Lalpa zawng lova amah râwn duh lote,
Ka tiboral ang.”
7Lalpa Pathian hmaah chuan ngawi ṭhiap rawh u,
Lalpa ni chu a hnai ta si a.
Lalpa chuan inthawina a buatsaih zo va,
A mi sâwmte pawh a tithianghlim#1:7 A mite a hrem ni hi inthawina ni angin a sawi a, ran talh chu a mite an ni; a ei tûrte hi an hmêlmate - chûng chuan an rawk dâwn a ni. ta.
8“Lalpa inthawina ni-ah chuan
Hotu te, lal fa te, hnam dang tih dân latute ka hrem ang.
9Chumi ni-ah chuan milem biate tih dân anga
Kawngka bul zuan khûmtu te,#1:9 1 Samu. 5:5 en rawh. Milem biate hian an pathian in kawngkhâr bul rah ngam loh neiin an kân hleuh hleuh ṭhîn a ang hle mai.
Mi thil an chhuhsak leh rûka
An pathian in tikhattute chu ka hrem ang.
10Chumi ni chuan Jerusalem-a Sangha Kawngkaah
An ṭap chuah chuah ang a,
Vêngtharah pawh mangangin an au vang a,
Mualahte chuan an chiau vawng vawng ang,”#1:10 Jerusalem khaw chhûng hmun hrang hrang aṭanga thâwm sawina.
Tih hi Lalpa thuchhuak a ni.
11“Dâwr hmuna#1:11 Heb. Khaw chhûng hmun hniam lai, a lûn lai tihna a ni âwm e. awmte u, ṭap vak rawh u,
Sumdâwngtute#1:11 Heb. Kanan mi. an awm tawh dâwn si lo,
Tangkaruaa sumdâwngtute pawh an awm ta lo.
12Chutih hunah chuan Jerusalem chu khâwnvâr chhiin,
Zu ṭawk tawh#1:12 Grep tui sâwr uaina a chan hnuin an bun chhuak a, a tak nawi nêna la awm chu a rei hnu chuan a ṭawk a, a intlâk tawh lo, chutiang chu a tehkhin a ni, induh tak si eng mah ni si lo tihna. anga awm mai mai,
Inchhuang taka titute chu ka vai khâwm ang a, ka hrem ang.
‘Lalpa chuan thil chhia emaw, thil ṭha emaw a ti lo vang.’
13An sum an rawksak vek ang a,
An inte pawh a ram ang,
Inte sa mah sela an luah lo vang,
Grepte phun mah sela, a tui an in lo vang.”
Lalpa ni ropui chu
14 Lalpa ni ropui a lo thleng dâwn ta,
A hnai hle tawh a, a lo thleng ṭêp a ni.
Lalpa nia thâwm chu a râpthlâk êm a,
Mi huaisente pawh an ṭê tuar tuar ang.
15Chumi ni chu thinurna ni, lungngaihna leh manganna ni,
Buai ni leh chhiat ni, thimna leh nguina ni,
Khaw dur leh thim chhah mup thlen ni a ni ang.
16Khawpui kulh leh in sângte bei tûra tawtawrâwt ri tuar tuar leh indo au thâwm awm ni a ni ang.
17Mite chu nasa takin ka timangang ang a,
Mitdel angin an kal ang;
Lalpa laka an sual avângin
An thisen chu vaivut leihbuak angin a baw nuai ang a,
An ruang pawh bawlhhlawh awm khâwm nûlh ang a ni ang.
18 Lalpa thinur lo thlen ni-ah chuan,
An tangkarua leh rangkachakte chuan a chhanhim thei lo vang a,
A thinurna mei chuan lei pum pui a kâng ral vek ang.
Lei chunga awm zawng zawng tân,
Tâwp thutna a thleng ang.
Currently Selected:
ZEFANIA 1: MIZCLBSI
Highlight
Copy
Compare
Share
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
