ZAKARIA 4

Khâwnvâr dahna hmuh thu

1Vântirhkoh mi betu kha a lo kal leh a, muhîl kaihthawh ang maiin mi rawn kai tho va. 2“Eng nge i hmuh le?” min ti a. Kei chuan, “Rangkachak hlîra siam khâwnvâr dahna ṭhuam sarih nei, a hmâwra hriak bâwm hmui nei ṭheuh ka hmu,” ka ti a. 3A kiangah Oliv thing pahnih a awm a, pakhat chu a ding lamah, pakhat a vei lamah. #Thup. 11:4. 4Vântirhkoh min betu hnênah chuan, “Ka pu, hêng hi eng tihna nge?” ka ti a. 5“Hêng hi eng tihna nge i hre lo maw?” mi ti a. “Hre lo, ka pu,” tiin ka chhâng a.

Jerusalem hnêna Pathian thutiam

6Tichuan, ka hnênah heti hian a sawi:

“Jerubabela hnêna Lalpa thu lo thleng chu hei hi a ni:

I chakna ni lovin, i thiltihtheihna#4:6 Hebrai lamah ‘i’ a tel lo, ṭhenkhat chuan, ‘Sipai chakna’ tiin an let. ni hek lovin

Ka Thlarau zâwkin le,”

Engkim Lalpa chuan a ti. #Ezra 5:2.

7Aw nang, dâltu tiang lian, eng nge i nih le?

Jerubabela hmaah chuan râwt mâm vek i ni ang,

Tempul sak zawhna lung hnuhnûng ber#4:7 Lung phûm ni angin sak zawh ni-ah a sa zotu hming pu tûrin lung dah tûr tâwpna an dahtîr a ni. a rem hunah,

Mipui chu, “A mawi mang e, a mawi mang e,”

Tiin an au dur dur ang.

8 Lalpa chuan heti hian min bia a: 9“Jerubabelan Tempul lung a phûma, a kuta a sak zawh hun chuan Engkim Lalpa chuan an hnênah ka tîr che tih an hria ang. 10Tempul sak hna a chak loh avânga zak ta chu Jerubabelan sahal khaia hna a chhunzawm an hmuh chuan an lâwm hle ang, hêng khâwnvâr dahna pasarih hi Lalpa mit, khawvêl pum pui thlîr ṭhîntu chu a ni,” a ti a.#Thup. 5:6.

11Tin, a hnênah, “Hêng Oliv thing pahnih, khâwnvâr dahna ding lam leh vei lama awmte hi engtihna nge? #Thup. 11:4. 12Rangkachak hriak bâwm hmui nei sîr tuaka oliv zâr pahnihte hi engtihna nge?” ka ti a. 13Ani chuan, “Hêng hi engtihna nge i hre lo maw?” min ti a. Kei chuan, ‘Hre lo, ka pu,” ka ti a. 14Ani chuan, “Hêng hi mi pahnih, lei pum puia Lalpa rawngbâwl tûra thlante chu an ni,” a ti a.

Currently Selected:

ZAKARIA 4: MIZCLBSI

Highlight

Copy

Compare