SAM 69
69
Ṭanpui dîlna
Hla hruaitu tân. Lilipâr#69: Sâm hming Heb. ‘Shoshanim.’ thlûka sak tûr. Davida ta
1Aw Pathian, min chhan chhuak rawh,
Tuite chuan min chîm pil lek lek a;
2Chirhdûpah chuan ka tâng ta a,
Rah chhan tûr rêng a awm si lo.
Tui thûkah chuan ka awm ta a,
A fâwnah chuan ka pil dâwn hi.
3Ṭanpui dîla ka auna lamah chuan ka chau ta a,
Ka dangte pawh a ro zo va,
Pathian thlîrin ka mit a vai zo ta.
4Chhan awm lova min hawtute chu
Ka sam aiin an tam tâk hi.
Mi chak pui puite chuan mi nuai bo an tum a,
Dâwta min bei ṭhîntute chuan
Ka rûk loh pawh min pêk kîrtîr a ni. #Sam. 35:19; Jn. 15:25.
5Aw ka Pathian, ka âtzia hi i hre vek a,
Ka thiam lohnate i lakah thup a ni hek lo.
6 Lalpa, Engkim Lalpa,
Keimah avângin nangmah nghâktute chu zak suh sela,
Israel-te Pathian,
Keimah avângin nangmah zawngtute chu mualpho suh se.
7Nangmah avângin hau ka tuar a,
Men ngaihna pawh ka hre ta lo.
8Ka unaute tân mikhual ang ka ni a,
Ka pianpuite tân pawh ram dang mi ang ka ni.
9I in tâna ka ṭhahnemngaihna chuan
Mi luah tlat a,
An chêksawlhna che chu
Ka phur zêl ṭhîn.#Jn. 2:17; Rom. 15:3.
10Ṭapa chaw ka nghei leh miten min hmusit zui a,
11Saiip puan ka sin leh min nuihzat a.
12Kulh kawngkhâra ṭhuten#69:12 Kulh kawngkhâr bul hi rorêlna leh punkhâwmna a ni. ‘Hotute’ tihna a ni nghâl. min rêl zui a,
Zu ruite chuan hlaah min chham.
13Kei zawng, Lalpa, i hnênah chuan ka ṭawngṭai ang,
Ṭha i tih hunah mi chhâng ang che.
Aw Pathian, i ngilneihna nasa tak leh
I chhandamna rin tlâk tak chuan min chhâng ang che.
14Chirhdûp ata min chhan chhuak la,
Ka pil mai chu phal suh ang che.
Min hawtute leh tui thûk tak ata chu
Min chhan chhuak bawk ang che.
15Tui lian chu min len botîr suh la,
Tui thûkah ka tlâk phal lo la,
Thlân kotlângah min liamtîr suh ang che.
16 Lalpa, i ngilneihna a ṭha si a, min chhâng ang che,
I lainatna nasa tak chu ka chungah lantîr ang che.
17I chhiahhlawh lakah hian i hmêl thup suh,
Ka mangang êm a ni, min chhâng thuai rawh.
18Lo kal hnai la, min tlan ang che,
Hmêlma lakah min chhan chhuak rawh.
19Min chêksawlh dânte hi nangin i hre reng a,
Ka zahzia te, ka mualpho dânte pawh
Ka hmêlmate i hmu vek bawk.
20Min hmuhsitna chuan ka lung a tichhia a,
Na ka ti êm êm a ni.
Khawngaih ka beisei a, tu man min khawngaih lo,
Thlamuantu tûr tu mah ka hmu zo lo.
21Ka ei tûrah tûr an pawlh a,
Ka tuihâl chu zu ṭâwng min pe. #Mt. 27:48; Mk. 15:36; Lk. 23:36; Jn. 19:28,29.
22An ruai ṭheh chu chhiat phah sela,
An inremna ruai pawh chu an tân fal chang rawh se.
23An mitte chu tihdelsak la,
Eng mah hmu thei suh se,
An kâwngte chu khûr zawih zawih bawk rawh se. #Rom. 11:9,10.
24I thinurna chu an chungah leih la,
I thinrimna chuan nangchîng rawh se.
25An chênna chu ram sela,
An puan inah tu mah chêng hek suh se. #Tirh. 1:21.
26Nangin vuak i tuartîrte chu an sawisa a,
Hliam i tuartîrte natzia chu sawi nuam an ti.
27I hremna tûr chu tihpunsak la,
I chhandamna chu chang ve suh se.
28Nunna bu ata chu an hming thai chhia la,
Mi dikte zîngah chuan an hming ziak suh. #Exod. 32:32; Thup. 3:5; 13:8; 17:8.
29Kei zawng na tuarin ka rûm hi,
Aw Pathian, min chhan la,
Hmun râlmuangah min hlâng ang che.
30Pathian hming chu fakin ka zai ang a,
Lâwmthu hrilin ka chawimawi ang.
31 Lalpa tân chuan ran hlan aiin chu chu a ṭha,
Bâwngchal, ki leh tin sei tak nei hlan ai pawhin.
32Tihretheihten an hmuh hun chuan an lâwm ang a,
Pathian zawngtu thinlung chu a nung thar ang.
33Retheite thu Lalpan a ngaithla a,
A ni, saltângte chu a zahpui lo.
34Lei leh vânten amah fak rawh u,
Tuifinriat leh a chhûnga chêngte chuan fak rawh u.
35Pathian chuan Zion khua chu a hum ang a,
Judai ram khuate chu a din leh ang.
A mite chuan an luah ang a,
Ram chu an nei tawh ang.
36A chhiahhlawh thlahte chuan an rochung ang a,
A hming ngainatute chu tah chuan an chêng bawk ang.
Currently Selected:
SAM 69: MIZCLBSI
Highlight
Copy
Compare
Share
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
