SAM 18
18
Davida hnehna hla
(2 Samu. 22:1-5)
Hla hruaitu tân: Hmêlmate kut aṭang leh Saula kut aṭanga Lalpa a chhan chhuah ni-ah hêng Lalpa fakna hlate hi Lalpa chhiahhlawh Davidan a phuah a, heti hian a ti:
1Aw Lalpa, mi tichaktu, Ka hmangaih che.
2 Lalpa chu ka lungpui leh ka kulhpui,
Min chhandamtu a ni.
Ka Pathian, ka himna lungpui,
Min chhandamtu ropui,#18:2 Heb. ‘Ki’
ka phaw leh kulhbîng sâng a ni.
3Fak tlâk Lalpa chu ka ko va,
Hmêlma lakah min hum ta a.
4Thihna hlauhawm tak chuan min hual vêl a,
Chhiatna tuiliante chuan min chîm bawk a. #Sam. 116:3.
5Seol hruihrualte chuan min phuar vêl a,
Thihna thangah ka âwk ṭêp tawh a.
6Ka mangang chuan Lalpa ka han au va,
Pathian hnênah ṭanpuina ka dîl a,
A tempul aṭang chuan ka aw a lo hria a,
Ka au thâwm chuan a beng a thleng ta e.
7Tichuan, lei chu khûrin a insâwi hlawk hlawk a,
Tlâng chu a nghahchhante lamin a nghîng ta dur dur a,
A thinur nasa tak avâng chuan.
8A hnâr aṭangte chuan meikhu a lo chhuak a,
A ka aṭang pawh chuan kan ral hmang mei a alh chhuak a,
Meilingte pawh a lo chhuak bawk a.
9Vân khi a hai hawng a,
Chhûm dum chunga dingin a lo chhuk a, #Sam. 97:1; 99:1; 144:5.
10Cherub chunga chuangin a thlâwk vêl a,
Thlain a thlâwk ta thuak thuak a.
11Thimin a inkhuh a,
Ruah pai chhûm chhah tak chuan a hual vêl bawk a.
12A hmaa êng awm chuan chhûm chu a chhun tlang a,
Ṭêk te, rial te a tla ta dur dur a.
13Vânah Lalpan khawpui a tiri a,
Chungnungberan a aw a chhuah a ni,
Ṭêk te, rial te a tla ta dur dur a.
14A thal a han kâp a, an darh ta a,
Kâwl a phêttîr zawr zawr a, an tlânchhe ta. #Isa. 30:30; Job. 18:6; 29:3.
15 Lalpa, i hnâra thaw chhuak meuhva i chhêma,
I han hau zet chuan,
Tuifinriat chu a mawng thlengin a kang zo va,
Lei innghahnate pawh a lang zo ta.
16Vân aṭangin a han ban a, min rawn vuan a,
Tui thûk ata min hnûk chhuak ta.
17Hmêlma chak tak kut ata chu min chhan chhuak a,
Ka hneh rual loh min hawtute lak ata chu.
18Chhiatna ka tawh laiin mi rawn bei a,
Mahse, ka nghenchhan chu Lalpa a ni.
19Hmun thâwl takah#18:19 ‘lei hnuai hmun thâwl,’ hremhmun tihnaah ngaih tûr a ni, ‘hlauhawm’ tia lehlin theih a ni bawk (Sam. 31:18; 118:5). min hruai chhuak a,
Ka chungah hian a lâwm avângin min chhandam ta.
20 Lalpa chuan dik taka ka tih avângin lâwmman min pe a,
Pawi ka khawih loh avângin mal min sâwm ṭhîn.
21 Lalpa kawng chu ka zawh ṭhîn a,
Pathian lakah thil sual ka ti hek lo.
22A rêl apiang ka zâwm zêl a,
A thupêkte ka bawhchhe ngai lo.
23A tân mi ngîl tak nih ka tum fo ṭhîn a,
Thil sual ti lo tûrin ka invêng reng bawk a.
24Dik taka ka tih ṭhin avângin Lalpan lâwmman min pe a,
Pawi ka khawih lo tih a hria.
25I laka rinawmte tân i rinawm a,#18:25 ‘Ngilneite tân ngil i nei a’ tih theih a ni bawk.
Mi ṭhate tân i ṭha êm êm.
26Mi thianghlimte tân chuan i thianghlim a,
Mi suaksualte erawh chu i haw ṭhîn.
27Mi tlâwmte chu i chhan ṭhîn a,
Chapote erawh chu i titlâwm ṭhîn.
28Ka khâwnvâr chu mi hâlsak a,
Lalpa ka Pathian chuan ka thimna chu min tihênsak ta.
29Nangma zârah hmêlmate ka ûm a,
Ka Pathian zârah chuan an kulh ka lâksak ta.
30Pathian hi zawng a kawngte a tluang a,
Lalpa thu chuan fiah a dâwl ṭhîn a,
Amah bêltu zawng zawngte tân phaw a ni.
31 Lalpa lo hi tu nge Pathian dang awm?
Kan Pathian chauh lo chu tu nge belh tûr dang awm?
32Chaknaa min thuama,
Ka kawng titluangtu chu Pathian a ni.
33Ka ke te pawh sazuk ke ang maiin min siamsak a,
Tlângah himin min dintîr a.#Hab. 3:19.
34Ka kutte chu indo a thiamtîr a,
Dâr thalngulte ka kuai kûl thei hial a ni.
35Inhumhim nân phaw min pe a,
I kut ding lam ngei chuan min kai ta a,
Min puihna chuan min tiropui ta bawk.
36Ka pênte chu i tisau va,
Ka kête lah a tleu si lo.
37Hmêlmate chu ka han ûm a, ka ûm phâk a,
An thih vek hma loh chu ka kîrsan duh lo.
38Ka sât thlu a, an tho thei tawh lo,
Ka ke hnuaiah an thal phung mai.
39Indo nikhua atân chaknain min thuam a,
Min dotute min hnehtîr ṭhîn.
40Ka hmêlmate mi ûmtîr a,
Min hawtute ka that zo ta.
41An au chûl a, chhantu an nei si lo,
Lalpa chu an au va, a chhâng si lo.
42Ka râwt sawm a, thli len vaivut ang mai hi an ni,
Kawtthlêr diak angin ka thian fai ta.
43Hel hmangte lakah chuan min chhan chhuak a,
Hnamte hotu-ah min siam a,
Ka hriat ngai loh hnamten ka rawng an bâwl ta. #Isa. 52:15; 55:5.
44An hriat veleh ka thu an awih zêl a,
Ka hmaah an kûn ta.
45Hnam dangte chu an zâm zo va,
An kulh ata khûrin an lo chhuak ta.
46 Lalpa hi zawng Pathian nung a ni,
Ka lungpui chu fak rawh u,
Min chhandamtu Pathian chu ropui rawh se.
47Pathianin phuba min lâksak a,
Mite ka hnuaiah hian a dah.
48Hmêlma lakah min chhanhim a, hnuaichhiahtute chungah min awmtîr a,
Mi nunrâwngte lakah min chhan chhuak ta.
49 Lalpa, hnam tin zîngah ka fak ang che,
I hming fakin ka zai bawk ang.#Rom. 15:9.
50A Lal thlan chu hnehna ropui tak a pe ṭhîn a,
A hriakthiha chu a khawngaihin,
Davida leh a thlahte chu a lainat kumkhua ang.
Currently Selected:
SAM 18: MIZCLBSI
Highlight
Copy
Compare
Share
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
