MATHAIA 4
4
Isuan thlêmna a tâwk
(Mk. 1:12,13; Lk. 4:1-13)
1Chumi zawh chuan Isua chu Diabola thlêm tûrin thlalêrah Thlarauvin a hruai chho ta a. #Heb. 2:18; 4:15.
2Ni sawmli leh zân sawmli chaw a nghei hnuin a ril a lo ṭâm a. #Exod. 34:28; 1 Lal. 19:8; Deut. 8:3; Neh. 11:1; Dan. 9:24; Mt. 27:33; Thup. 21:10. 3Thlêmtu chu a lo kal a, a hnênah, “Pathian Fapa i nih tak tak chuan hêng lung hi chhanga chang tûrin thu pe rawh,” a ti a. 4Ani erawh chuan, “Mihring hi chhang ringawt ringin an nung tûr a ni lo. Pathian ka aṭanga thuchhuak tinrêng an ring bawk tûr a ni,” a ti a.
5Diabola chuan ani chu khaw thianghlimah a hruai lût a. Tempul chhîpah#4:5 ‘zâwl’ tih theih a ni bawk. a dintîr a, 6a hnênah, “Pathian Fapa i nih meuh chuan zuang thla rawh.
‘I chungthu-ah zawng vântirhkohte thu a pe ang a,
An kutin an dâwm ang chia,
Tichuan, lungah i ke i sawh dâwn lo nia,’
tih ziak a ni si,” a ti a. #Sam. 91:11,12. 7Isua chuan a hnênah, “‘Lalpa i Pathian fiah suh’ tih ziak a ni bawk asin,” a ti a. #Deut. 6:16.
8Diabola chuan tlang sâng takah a hruai leh a, khawvêl ram zawng zawng leh a ropuina a entîr a; 9a hnênah, “Lei siin chibai mi bûk la, hêng zawng zawng hi ka pe ang che,” a ti a. 10Isuan a hnênah, “Setan, kal bo daih rawh,#4:10 Mss ṭhenkhatah ‘Ka hnungah kal rawh’ tih a ni. ‘Lalpa i Pathian chu chibai bûk la, ama rawng chauh bâwl rawh,’ tih ziak a ni,” a ti a. #Deut. 6:13; Mk. 8:33. 11Tichuan, Diabola chuan a kalsan a, vântirhkohten rawng an bâwlsak ta a.
Isuan Galili ramah rawngbâwl a ṭan
(Mk. 1:14,15; Lk. 4:14,15)
12Johana an man tih a hriatin Isua chu Galili ramah a kal ta daih a. #Mt. 14:3; Mk. 6:17; Lk. 3:30; Jn. 1:43. 13Nazaret chhuahsanin Kapernaum khuaah a zu awm ta reng a, chu chu Zebulun leh Naftali biala dîl kama awm a ni; #Mk. 1:21; Lk. 4:23; Jn. 2:12. 14zâwlnei Isaia sawi kha a lo thleng ta a ni:
15“Zebulun leh Naftali ram
Tuipui panna kawng, Jordan râl,
Jentail-te chênna Galili.
16Thim hnuaia ṭhute chuan êng nasa tak an hmu a,
Thihna ram thima chêngte chungah chuan êng a lo chhuak ta,”
a tih kha. #Isa. 9:1,2.
17Chuta chinah chuan Isuan, “Sim rawh u, vânram chu a hnai tawh e,” tiin a hril ṭan ta a. #Mt. 3:2; 10:7; Mk. 1:15.
Sangha man mi pali Isuan a ko
(Mk. 1:16; Lk. 5:1-11)
18Galili dîl kama a lên pahin unau pahnih, Simona, Petera an tih leh Andria chu dîla an lên dêng a va hmu a; sangha man mi an ni rêng a. 19An hnênah, “Mi zui rawh u; tichuan, mihring mantuah ka siam ang che u,” a ti a. 20An lênte chu an hnutchhiah a, ani chu an zui ta nghâl a. 21Chuta ṭang chuan a kal zêl a, unau dang pahnih, Zebedaia fa, Jakoba leh Johana chu a hmu a, an pa Zebedaia hovin lawngah an lên an lo ṭhui ṭha a, anni chu a ko va. 22Tichuan, lawng leh an pa chu an kalsan a, Isua chu an zui ta nghâl a.
Zirtîr, thu hril leh tihdam hna
(Lk. 6:17-19)
23Isua chuan Galili ram a fang vêl a, an sunagog#4:23 Juda-te inkhâwmna in, sikulah leh puipunna hmun atân an hmang.-ahte zirtîrin, Ram Chanchin ṭha chu a hril a, Israel-te zînga natna tinrêng leh chak lohna tinrênga nâte chu a tidam zêl a.#Mt. 9:35; Mk. 1:39. 24Tichuan, Suria ram zawng zawngah a chanchin chu a thang ta a; damlo zawng zawng, damlohna leh natna tinrêng tuar te, ramhuai man te, thla-em-ât te leh zeng te, a hnênah an rawn hruai a, a lo tidam hlawm a. 25Galili ram aṭang te, Dekapoli khua aṭang te, Jerusalem aṭang te, Judai ram aṭang te leh Jordan râl aṭang te chuan mipui nasa takin amah an zui a.
Currently Selected:
MATHAIA 4: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.