MATHAIA 3
3
Baptistu Johana thu hril
(Mk. 1:1-8; Lk. 3:1-18; Jn. 1:19-28)
1Chûng lai chuan baptistu Johana chu Judai ram thlalêrah thu hrilin a lo kal a. 2“Sim rawh u, vânram chu a hnai tawh e,” a ti a. #Mt. 4:17; 10:7; Mk. 1:15. 3Ani hi a ni, zâwlnei Isaian,
“Thlalêra mi au aw chuan,
‘Lalpa lamlian chei ṭha ula,
A kal nân kawng tluang siam rawh u,’ a ti,”
tia a sawi kha. #Isa. 40:3 (LXX).
4Chu Johana chuan sanghâwngsei hmul kawr a ha a, savun kâwnghrên a hrêng a, a chaw chu khaukhuap leh ram khawizu a ni. #Lev. 11:22; 2 Lal. 1:8; Zak. 13:4. 5Chutih lai chuan Jerusalem leh Judai ram hmun tina awmte leh Jordan luidung vêl ram zawng zawnga awmte chuan ani chu an pan huai huai a, 6an sualte an puang a, Jordan luiah chuan a lo baptis hlawm a.
7Tin, Farisai leh Sadukai tam tak baptisma chang tûra lo kal ve a hmuhin an hnênah, “Rûl thlahte u, thinur lo thleng tûr pumpelh nân tu nge baptisma chang tûra fuih che u? #Mt. 12:34; 23:33. 8In sim ngei a ni tih tilang tûrin thil ti zêl zâwk rawh u. 9‘Kan pa chu Abrahama asin’ in lo ti dah ang e; ka hrilh a che u, Pathian chuan hêng lung hi Abrahama thlahah a din thei a ni. #Jn. 8:33,39. 10Tûn apangin thing bul tinah hreipui an dah ta, thing eng pawh rah ṭhaa rah lo chu kiha meia tuah mai tûr a ni. #Mt. 7:19. 11Kei zawngin sim entîr nân tuiin ka baptis ṭhîn che u a; ka hnunga lo kal tûr erawh chu kei aiin a ropui zâwk a, a pheikhawk keng tlâk pawh ka ni lo ve. 12Ani zawngin Thlarau Thianghlim leh meiin a baptis ang che u; a hruiha buh chu zâp faia zêma khung mai tûrin a sisêp chu a keng tawh a, a site erawh chu tihmih rual loh meiah a hâl ral ang,” a ti a. #Fil. 4:14,23; Mt. 13:30.
Isua baptisma chan thu
(Mk. 1:9-11; Lk. 3:21,22)
13Chutih lai chuan Galili ram aṭangin Johana hnênah, Jordan luia baptisma chang tûrin Isua chu a lo kal a. 14Johana erawh chuan, “Mi baptis tûr i ni zâwk si a, ka hnênah i lo kal a ni maw?” tiin a hnial a. 15Nimahsela, Isuan, “Tûnah remti hrâm rawh, hetiang felna zawng zawng hlen chhuah hi kan tân a mawi a ni,” a ti a. 16Tichuan, a remti ta a. Isuan baptisma a chan zawh chuan tui ata chu a chhuak nghâl a; a tân vân a lo inhawng a, Pathian Thlarau chu ṭhuro anga#3:16 Mss ṭhenkhatah ‘vân aṭangin’ tih a tel. lo chhukin a chunga fu a hmu a. 17Ngai teh, vân aṭanga awin, “Hei hi ka Fapa, ka Duhtaka chu a ni, a chungah ka lâwm êm êm a ni,” a ti a. #Gen. 22:2; Sam. 2:7; Isa. 42:1; Mt. 12:18; 17:5; Mk. 1:11; Lk. 9:35.
Currently Selected:
MATHAIA 3: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.