JONA 4
4
Jona thinrim leh Pathian khawngaihna
1Jona erawh chu a lâwm lo hle a, a thin a rim ta a. 2Lalpa hnênah hetiang hian a ṭawngṭai a: “Aw Lalpa, hetiang hian i ti leh si ang tih ka rama ka awm lai pawh khân ka sawi lo vem ni? Chuvâng alâwm Tarsis lamah ka tlân vat ni. Nang hi zawng khawngaihna leh lainatnaa khat, Pathian thinnel leh hmangaiha khat, chhiatna thlentîr duh lo i ni miau tih ka hre si a. #Exod. 34:6. 3Aw Lalpa, tûnah ka nun hi la mai teh, ka tân thih hi dam aiin a ṭha zâwk si a,” tiin. #1 Lal. 19:4. 4Lalpa chuan, “I thinrim hi dik i ti maw?” a ti a. 5Jona chu khawpui aṭang chuan a chhuak a, khawpui chhak lamah a ṭhu a. Tah chuan bûk a sa a, a hlim aṭang chuan khawpuiah thil eng nge lo thleng dâwn tih hmuh a tum a.
6Pathian, Lalpa chuan ûm#4:6 Mi thiam ṭhenkhat chuan ‘muṭih’ tih tûr niin an ngai. a ṭotîr a, Jona lu zâr hliaha amah tihahdam tûrin a zâmtîr a. Chu ûm hlim avâng chuan Jona chu a lâwm ta hle a. 7A tûk khua a lo vâr chuan Pathianin sûlrûl a tîr a, ûm chu a ei a, a vuai ta vek a. 8Ni a lo chhuak a, Pathianin khawchhak thli lum a tlehtîr a, ni chuan Jona chhîpah a em a, luhaiin a chau ta a. Thih a dîl leh ta a, “Ka tân dam aiin thih a ṭha zâwk e,” tiin. 9Nimahsela, Pathian chuan Jona hnênah, “Ûm chungchânga i thinur hi a dik em ni?” a ti a. Ani chuan, “Thih ngam meuhva ka thinur hi ka tidik a ni,” a ti a. 10LALPA chuan a hnênah, “He ûm, i tuh pawh ni lo, i ṭhantîr pawh ni lo, zânkhat thil thu-a lo ṭhang liana, a tûka thi leh ta mai mah hi i lainat a. 11Ninevi khaw ropui takah hian mihring nuaikhat leh sînghnih lai, an ding leh vei pawh hre lo, ran rual tam tak nên an awm a, chûng chu ka khawngaih lo vang em ni?” a ti a.
Currently Selected:
JONA 4: MIZCLBSI
Highlight
Copy
Compare
Share
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
