HOSEA 4
4
Israel-te chunga Lalpa vuina
1Israel fate u, Lalpa thu hi hre rawh u. He ramah hian rinawmna te, khawngaihna te, Pathian hriatna te a awm loh avângin Lalpa chuan a chhûnga chêngte a thiam lo a ni.
2Thu an tiam a, an zâwm lo va,
Tual an that a, rûk an ru a,
An uire a, serh leh sâng rêng an nei lo,
Inzawm zatin tual an that.
3Ram chuan a tuar ang a,
A chhûnga awm zawng zawng an chau vang,
Tuipui sangha chenin an boral ang.
Lalpan Puithiamte a sawisêl
4Tu mah inhêkin tu mah lo indem suh u,
Nangni puithiamte hi a ni ka demte#4:4 Heb. ‘In mite chu puithiam beitute ang an ni’ tihna a ni âwm e. chu.
5A chhûn a zânin in tlu in tlu a,
Zâwlneite pawh nangmah ang chauh an ni,
I nu, Israel chu, ka tiboral ang.
6Ka miten min hriat duh loh avângin an boral a,
Nang pawhin min hriat duh loh avângin
Ka puithiam ata ka bân che hi,
I Pathian dânte i thlahthlam a,
Kei pawhin i fate ka thlahthlam ve ang.
7An tam poh leh ka laka sual an tam a,
An ropuina chu an mualphonaah ka chantîr ang.
8Ka mite sualna chu chênin an inei thau va,
Sual zêl se an ti êm êm.
9An awm dân leh an thiltih avângin ka hrem ang,
Mipui leh puithiamten angkhatin an tuar ang.
10Inthawina sa an ei ṭeuh ṭeuh va,
An kham si lo,
Chi ṭhatna pathian#4:10 Baal sawina a ni, a biakna hmunah nawhchizuar an mutpui a, thlai ṭhatna tûrah an ngai, puithiamho a demna a ni. an pan a, fa an ngah chuang lo,
Lalpa chu an hawisan avângin.
Lalpan hnam dang pathian biak a hua
11Hurna te, uain te, zu te hian
Thinlung a hruai bo ṭhîn.
12Ka miten an thing serh an râwn a,
An tiangin inlârna an zawng a,
Milem biak an châkna chuan a hruai bo va,
An Pathian chu uiresanin an hawisan ta.
13Tlâng chhîpahte an inthawi a,
Tlâng pangahte rimtui an hâl,
Sasua te, beraw te, hriang thingbuk hnuaiah te,
In fanute an inphalrai a,
In mote pawh an uire ṭhîn.
14An sualna leh uirena avângin
In fanute leh in mote chu ka hrem lo vang.
Nangni ngei hi nawhchizuar tawmpuitu,
Milem hnêna inthawina eitu in ni a,
Chinchâng hre lote chu tluchhe âwm rêng an ni.
15Aw Israel, nang chu uire mah la,
Juda zawng uire ve lul suh se,
Gilgal-ah te, Beth-aven-ah#4:15 Beth-aven tih hi ‘suahsualna in’ tihna a ni.te inthawi tûrin chho suh u,
Tah chuan Lalpa hming chhâlin chhia chham hek suh u.
16Israel zawng, bâwngla anga luhlul a ni,
Phûla berâm tla angin
Engtin nge Lalpan a vên theih ang?
17Efraim chuan milem a be ta a,
An duh ang ang chuan awm teh se.
18Zu hmunah nuam an chên a, suahsual an bâwl zui a,
Ngaihsân nih aiin mualpho an thlang.
19Thlipuiin a la bo vang a,
An inthawinate avângin an la zak ang.
Currently Selected:
HOSEA 4: MIZCLBSI
Highlight
Copy
Compare
Share
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
