HABAKUKA 1
1
1Inlârnaa zâwlnei Habakuka thil hmuh chu:
Habakukan a vui thu a sawi
2Aw Lalpa, min pui tûrin ka auh che hi,
Eng chen nge, min ngawihsan dâwn?
‘Mi sualten mi vaw hlum takngial dâwn,’ tia ka auh che pawhin,
Engati nge min chhân loh?
3Engati nge dik lo taka thil an tih min hmuhtîra,
Râwng taka an che i ngaihtheih zêl le?
Inrawk leh invuak a hluar a,
Inhau leh invelh a tam hle hi.
4Dam hian awmzia a nei tawh lo va,
Dikna a lal tawh hek lo.
Mi sualten mi dikte an dinchan khalh a,
Chuvângin, dik taka thil tih a ni ta lo.
Lalpa chhânna
5In vêla hnamte hi thlîr kual ula,
En ngun teh u,
Mak in ti hle ang,
In hriat pawha in awih loh tûr,
In hmuh phâkah thil ka tih dâwn hi.#Tirh. 13:41.
6Ngai teh, Kaldai mite chu ka chawk tho dâwn a,
Hnam kawlhsen leh thinram tak,
Mi ram neihsak tuma ram tina vâkvêl ṭhînte chu! #2 Lal. 24:2.
7An hlauhawmin an ṭihbaiawm hle mai,
Chapo takin duh duhin an che.
8An sakawrte pawh keite aiin an chak a,
Thimhlim#1:8 Heb. ‘thimhlim, thlalêr, Arab ram’ tih theih a ni. chinghniate ai pawhin an hlauhawm.
9An sakawr chuang mite chu ram hla tak aṭangin
Chak takin an lo tlân dur dur a,
Mupui âr la tûr bir angin an chak.
10Mi rûn tûra lo kal an ni vek a,
An thâwm hria apiang an thlabâr a,
Ṭiauvaivut anga tam sal an man.
11Lalte an palzût a, miliante pawh an nuihzat a,
Kulhte lah engah mah an ngai lo,
Lei an chhûng pâwng a, an la zêl mai.
Lalpa laka Habakuka vui thu
12Hmân ata tawh Pathian thianghlim, nung reng,
Lalpa chu i ni lo vem ni?
Aw Lalpa, anni chu min hrem tûra i ruat an ni a,
Aw kan kulhpui, min thununtu atân i ruat an ni.
13I mitte chu a thianghlim êm êm a,
Thil sual i en reng thei si lo va.
Engati nge vervêk taka tite i ngaihtheih viau si?
Mi sualten an aia ṭhate an tihduhdah laia
Engtizia nge i ngawih reng mai le?
14Engtizia nge mihring hi tuipui sangha ang leh
Rannung bawkvâka kal lal nei lote ang leka i siam ni le?
15Kaldai-ho chuan mite nghakuaiin an âwk a,#1:15 Babulon miten an hmuh apiang sangha ang leka ngaiin an sawisa a ni.
Lênin an khuh a, lênkhangin an fûn a,
An hlim êm êm lehnghâl a.
16Tichuan, an lênte chu chibai an bûk a,
An lênkhang hnênah inthawina an hlân a,
Ei tûr an hmuhna leh nuam an tâwl theihna a nih avângin.
17Tichuan, an lênte chu tiruak zêlin,
Hnamte chu lainat hauh lovin an that zêl dâwn em ni?
Currently Selected:
HABAKUKA 1: MIZCLBSI
Highlight
Copy
Compare
Share
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
