EZEKIELA 45

Ram chhûnga Lalpa chanvo

1Ro atân ram in sem dâwnin Lalpa tân Hmun Thianghlim tûr, tawng sînghnih leh sângnga a sei, tawng sînghniha zau#45:1 Heb. ‘Tawng sîngkhat’ ram in serh hrang tûr a ni, chu ram chu ram serh a ni ang. 2He ram chhûngah hian hmun serh bîk, kil li nei, tawng zanga bial zuah tûr a ni. 3Hmun serh pum pui aṭang hian tawng sînghnih leh sângngaa sei, a vâng lam tawng sîngkhat teh chhuak ula, chu chu hmun thianghlim bîk, serh hran tûr chu a ni. 4Hmun thianghlim bîk a ni a, Hmun Thianghlima Lalpa rawngbâwltu puithiamte tân a ni, an insakna tûr leh biakbûk sakna tûr a ni. 5A la bâng, ram tawng sînghnih leh sângngaa sei, tawng sîngkhata zau chu Tempula thawktu Levia chite tân a ni, an nei ang a, hemi chhûngah hian khua an nei ang. 6Hmun serh bulah chuan khawpui tûr ram, tawng sînghnih leh sângngaa sei, a zau lam tawng sângngaa zau teh chhuak ula, chu chu Israel mi zawng zawng tân a ni ang.

Lal tân ram

7Lal tân pawh ram zuah tûr a ni. Hmun Thianghlim aṭangin khaw thlang lamah tuifinriat thleng a ni ang a, khawchhak lamah ram ripui thleng a ni ang a, Israel hnam pakhat tâna ram zuah tiat a ni tûr a ni. 8Israel ramah lal chanvo tûr chu he ram hi a ni ang, mi dang a nêk tûr a ni lo, hemi bâk hi chu Israel miten an nei tûr a ni.

Lal rorêl dân tûr

9Lalpa Pathian chuan heti hian a ti: “Israel hotute u, pâwngnêkna leh innêkchêpna hi bân ngang tawh teh u, dik takin rorêl ula, thil dik ti rawh u, ka mite hi an ram ata nêk chhuak tawh lul suh u,” Lalpa Pathian thuchhuak chuan a ti.

10“In thil tehna chu a dik tûr a ni. Efa dik leh bath dik#45:10 Ezekiela huna Efa hi litre 17:5 (ṭin khat ṭhelh) dawng a ni. Tui lam tehna chu bath a ni, Efa nên a indawng tâwk chiah a ni. in hmang tûr a ni.#Lev. 19:36. 11Efa leh bath hi a intluk chiah tûr a ni, a lêt sâwm chu Homer khat a ni ang, Homer hi tehna chhûtna ber tûr a ni ang a. 12In bûklung pawh hetiang tûr hi a ni: Gera sawmhnih chu sekel a ni ang a, sekel sawmruk chu mina khat a ni ang.#45:12 Ezekiela huna Gera chu gram chanve aia zâng a ni, sekel chu gram 11:4 vêl a ni. 13In thil hlan dân pawh hetiang tûr hi a ni: Huit chu in thar zât phur sawmruka phur khat, barli pawh phur sawmruka phur khat, hriak chu ṭin zaa ṭin khat in hlân tûr a ni. 14In hriak tehna tûr chu bath a ni a, bath sâwm chu Kor khat a ni ang. Kor leh Homer hi a intiat a ni. 15Israel rama berâm vulh zahnih zêlah berâm pakhat hlan bawk tûr a ni. Buh te, hâl ral tûr te, remna thilhlan te in hlân tûr a ni; tichuan, in sualte ngaihdam a ni ang,” Lalpa Pathian thuchhuak chuan a ti. 16Ram chhûnga mi zawng zawngin Israel rama rorêltu hnênah hêng thil hi an rawn pe tûr a ni.

17“Thla thar kûtah te, sabat ni-ah te leh kût dangah te rorêltu chuan Israel hnam pum aiawhin hâlrala hman tûr ran te, buh hlan tûr te, uain hlan tûr te a tum ang. Israel mipui sual thawi nân, sual thawina te, buh hlan te, hâlral tûr te, inremna inthawinate a hlân tûr a ni.”

Kût

(Exod. 12:1-20; Lev. 23:33-43)

18Lalpa Pathian chuan heti hian a ti: “Thla thar ni hmasa berah berâmpa hmêlhem lo talhin Tempul in thian tûr a ni. 19Puithiamin he sual thawina thisen hi a la ang a, Tempul kawngka biangah te, maichâm tap hnuai kil li-ah te, chuanchung veranda kawngka#45:19 Hei hi luhna in, chuanchunga chhuahna lai kha a ni. biangah te a tât tûr a ni. 20Thla thar ni sarih niin thil sual tih palh leh hriat loh vânga thil sual tih palh tân chutiang bawkin in ti leh tûr a ni; chutiang chuan Tempul chu in tithianghlim tûr a ni. 21Thla thar ni sâwm leh pali ni chuan kalhlên kût in hmang ṭan tûr a ni, ni sarih chhûng chhang dawidim telh loh in ei tûr a ni.#Exod. 12:1-20; Num. 28:10-25. 22Kût ṭan tirh niin lal chuan ama sual leh mipui sual thawi nân bâwngla a hlân tûr a ni. 23Ni sarih chhûng chu ni tin bâwngpa pasarih leh berâmchal pasarih, hmêlhem lo Lalpa hnênah hâl ral atân a hlân tûr a ni a, kêlpa pakhat pawh ni tin sual thawi nân a hlân tûr a ni. 24Bâwngpa pakhat leh berâm pakhat rual chuan chhangphut efa khat ve ve zêl hlan tel tûr a ni; chhangphut efa khatah hriak hin#45:24 Hin hi bath hmun ruka ṭhen hmun khat a ni, litre thum ṭhelh. khat a tel zêl bawk tûr a ni.

25“Thla sarihna, ni sâwm leh pali ni kûtah pawh ni sarih chhûng chutiang bawk chuan a ti tûr a ni; sual thawina te, hâlral thilhlan te, chhangphut te a hlân tûr a ni. #Lev. 23:33-36; Num. 29:12-38.

Currently Selected:

EZEKIELA 45: MIZCLBSI

Highlight

Copy

Compare