EZEKIELA 44

Khawchhak aṭanga luhna hman dân tûr

1Khawchhak aṭanga Hmun Thianghlim chuanhnuai luhnaah min hruai leh a, a lo inkhâr a. 2Lalpa chuan min hrilh a, “Mihring fapa, kawng inkhâr hi a inkhâr reng tûr a ni, hawn tûr a ni lo; tu mah an lût tûr a ni hek lo. Israel-te Pathian, Lalpa chu, hetah hian a lût a, a inkhâr reng tûr a ni. 3Ram rorêltu erawh chu veranda-ah hian Lalpa hmaa ruai ei tûrin a kal thei ang a, a lo kalnaah bawk a kîr leh tûr a ni.

Tempul-a luh theih dân

4Hmâr lam aṭanga luhna, Tempul hmaah chuan mi hruai leh a, Tempul chhûng chu Lalpa ropuinain a khat a, bawkkhupin ka tlu a. 5Lalpa chuan ka hnênah, “Mihring fapa, ngun takin en la, chhinchhiah tlat rawh; i hnêna ka sawi hi ngaithla ngun rawh. Hmun Thianghlim chhûng hman dân tûr te, tu nge lûta chhuak thei tûr te ka hrilh dâwn che hi.

6“Hel hmang Israel chhûngte hrilh rawh: Lalpa Pathian chuan heti hian a ti: Israel chhûngte thil tenawm tih hi a tam lutuk ta. 7Hmun Thianghlimah, ka tân, sa thau leh thisen in rawn hlan pawhin hnam dang, thinlung leh tisaa serh tan lohte in hruai lût a, in tibawrhbâng a, thil tenawm in tih zozai avâng hian ka thuthlung in bawhchhia a ni. 8Ka hmun in vawng thianghlim lo va, a vawng tûrin hnam dang mi chu in dah a. 9Lalpa Pathian chuan heti hian a ti: Hnam dang, thinlung leh tisaa serh tan loh rêng rêng ka Hmun Thianghlimah an lût tûr a ni lo; Israel-te zînga chêng ngeite pawh thinlung leh tisaa serh tan lohte chu an lût tûr a ni lo.

Levia thlah puithiam an ni thei lo

10“Milem biaa Israel-te an bo lai khân Levia thlahte pawh hian min hlat a, an bawhchhiatna avângin an tuar ang. 11Hmun Thianghlim thiantu an ni ang a, kawngka an vêng ang. Mipui hâlral thilhlan tûr leh inthawina an lo talhsak ang a, an lo ṭanpui tûr a ni. 12Mipuiin milem an biak lai khân an thilhlante hlansaktu an ni a, Israel chhûngte tân suala tlûkna bulpui an ni a; chuvângin, an chungah ka kut ka lek ta a ni,” Lalpa Pathian thuchhuak chuan a ti. “An bawhchhiatna avângin an tuar tûr a ni. 13Puithiam angin ka bulah an lo kal hnai tûr a ni lo; thil tenawm an tih avângin zah an tuar ang. 14Ka in vêngtuah leh a chhûnga tih tûr apiang ti tûra tirhkahah ka ruat a ni.

Puithiam tih tûr

15“Puithiam Levia chi, Zadoka thlahte erawh chuan, Israel-te an bo lai khân ka Hmun Thianghlim an vawng tlat a, anni hi chuan min rawn hnaih thei; ka rawng an bâwl ang a, ka hmaah an ding ang. Sa thau leh thisen ka hnênah an rawn hlan ang,” Lalpa Pathian thuchhuak chuan a ti. 16“Anni chauh hi ka Hmun Thianghlimah an kal thei ang. Ka dawhkân an rawn hnaih ang a, Pathian biak an hruai ang. 17#Exod. 28:39-43; Lev. 16:4. Tempul chuanchung zâwl an lo luhin la zai sîna siam thawmhnaw an inbel tûr a ni. Chuanchung zâwlah emaw, Tempul chhûngah emaw rawng an bâwlin sahmula siam thawmhnaw an ha tûr a ni lo. 18La zai sîna siam diar an khim ang a, la zai sîna siam kekawr an ha bawk tûr a ni, an thlan titla thei tûr kâwnghrên an hrêng tûr a ni lo. 19Mipui zînga chuanhnuai zâwla an kal dâwn chuan an rawngbâwlna thawmhnaw chu an hlîp ang a, pindan thianghlimah an dah ang a, thawmhnaw dang an inbel tûr a ni; chutilo chu, thawmhnaw thianghlim chu mipuiin an khawih palh ang a, an tuar#44:19 Mi narân tân thil thianghlim khawih a thiang lo, thihna niin an ngai. dah ang e. 20Puithiam chuan an lu an ziat kawlh tûr a ni lo va, an sam an zuah sei lutuk tûr a ni hek lo, an mêt ṭhîn tûr a ni.#Lev. 16:23.#Lev. 21:5. 21Hung chhûnga an luh dâwnin puithiam tu mahin uain an in tûr a ni lo.#Lev. 10:9. 22La nula hle mah se, pasal sûn emaw, mâk emaw nupuiah an nei tûr a ni lo; Israel nula hnahkhat chu tu pawh an nei thei ang, puithiam dang thihsan pawh an nei thei ang. #Lev. 21:7,13-14.

23“Puithiamte chuan thil thianghlim leh thianghlim lo te, thiang leh thiang lo te mipui an zirtîr tûr a ni.#Lev. 10:10. 24Thu buai an rem bawk ṭhîn tûr a ni, ka Dân angin an rem tûr a ni. Ka Dân leh ka thupêkte angin kût nite an hmang tûr a ni a, ka sabat an serh tûr a ni. #Lev. 21:1-4.

25“Mitthi ruang khawihin an intibawlhhlawh tûr a ni lo. An pa te, nu te, unau te, fa te, farnu pasal nei lo te ruang erawh chu an khawih thei ang a; mahse, an bawlhhlawh ang. 26An inthen fai hnuah ni sarih chhûng an hna an chawlhsan tûr a ni. 27Chutah, hung chhûng chuanchungnungah an kal ang a, Tempula rawngbâwl an chhunzawm theih nân inthenna thil an hlân tûr a ni,” Lalpa Pathian thuchhuak chuan a ti.

28“Puithiamho tân kei hi an chanvo ka ni. Israel zîngah chanvo dang eng mah pêk tûr an ni lo, ka hna hi an chanpual a ni ang.#Num. 18:20.

29“Thlai thil hlan te, sual thawina te, thiam loh thawina te puithiam chan tûr a ni. Israel rama thil serh dah hran rêng rêng pawh an ta tûr a ni. 30Thlai chi tinrêng rah hmasa te leh ka hnêna thil pêk rêng rêng chu puithiam neih tûr a ni. Chhang siam apiangin tlang khat chu puithiam an pe tûr a ni; tichuan, chu mite chhûng chu mal ka sâwm ang. 31Sava te, ramsa te, a thisâwn leh sa seh chu puithiamte chuan an ei tûr a ni lo.”

Currently Selected:

EZEKIELA 44: MIZCLBSI

Highlight

Copy

Compare