DANIELA 8

Inlârna berâm leh kêlchal hmuh thu

1Belsazara lal kum thum kum chuan kei Daniela hian inlârna, a ṭum hnihna chu ka hmu leh#8:1 Heta ṭang hian Hebrai ṭawnga ziak a ni leh ṭan. a. 2Inlârnaah chuan Elam biala awm Susan khawpui#8:2 Susan hi Persia hnam lal pakhat khawpui a ni. chhûngah ka lo awm a. Ulai lui kamah ka lo ding a. 3Ka han en chuan ki sei tak pahnih nei berâmchal ka hmu a, pakhat chu a sei zâwk a, a ṭo hnuhnûng zâwk a ni bawk. 4Chu berâm chuan khawthlang lam te, hmâr lam te, chhim lamte a phîn ruai a, sa pakhat mah lo cho ngam an awm lo va, a laka invêng him thei rêng an awm hek lo. A duh ang angin a che a, a inhrosa ta vak vak a.

5Engtihna nge ni ang tih ka ngaihtuah lai chuan khawthlang lam aṭangin kêlchal, lei pawh rap hman lo khawpa chakin a lo tlân a, a mit inkârah ki pakhat sei zet hi a awm a. 6Lui kama berâm ding ka hmuh kha a rawn pan a, a theihtâwpa chakin a rawn phîn a. 7Berâm chu a rawn hnaih a, a si ta vak a, a ki pahnih chu a sîk tliahsak a, eng mah a ti thei ta lo va. Berâm chu leiah a si thlu a, a chîl ta nek a. Berâm chu a lak aṭanga chhan chhuak thei tu mah an awm lo. 8Kêlchal chu a thâwm a na ta hle a; mahse, a ropui vânglai tak chuan a ki chu a tliak ta a; a aiah ki pali, kâwlkil li kâwk far, sei tak a lo ṭo ta a. 9ki pali zînga pakhat aṭang chuan ki tê tak tê hi a lo chawr chhuak a, chhim leh khawchhak lamah a ṭhang uak uak a, ram ropui#8:9 Israel ram sawina a ni. lamah chuan a ṭhang a. 10Vâna mipuite tluk a tum a, chûng zînga mi leh arsi ṭhenkhat chu leiah a paih a, a chîl nek a. #Thup. 12:4. 11Vân mipuite hotupa tlukin a intiropui a, hâlral thilhlan, eng lai pawha an hlan ṭhin chu a tihtâwpsak a, Hmun Thianghlim pawh chu a tichhe bawk a. 12An bawhchhiatna avângin mite chuan thilhlan an hlan reng ṭhin chu an bânsan a, thutak chu leiah an paih thal dêr a, ki chuan a duh duhin thil a ti ta a. 13Vântirhkoh pakhat ṭawng ka hria a, vântirhkoh dangin a hnênah, “Inlârnaa thil hmuh hi eng chen daih tûr nge, thilhlan an hlan ziah ṭhin chu eng chen nge bawhchhiatna râpthlâk tak chuan a lan ang? Eng chen nge Hmun Thianghlim leh ram ropui ber chu duh duha an sawisak ang?” a ti a. 14Pakhat zâwk chuan a chhâng a, “Zîng leh tlai tina thilhlan an hlan ṭhin chu ṭum sânghnih leh zathum#8:14 Ni 1150 chhûng a ni, tihduhdah an nih, thilhlan an tihtâwp chhûng Bung 7:25-a sawi chu kum thum leh a chanve, ni 1260 a ni. an hlân lo vang. Chumi hnuah Hmun Thianghlim chuan ngai a awh leh ang,” a ti a.

Gabrielan inlârna a hrilh fiah

15Kei, Daniela hian chûng ka thil hmuh awmzia chu hriat ka duh a. Mihring ni âwm tak ka hmaah a lo ding a. 16Ulai lui kam lehlam aṭang chuan mi pakhat aw ka hria a, “Gabriel, a thil hmuh kha hrilh fiahsak rawh,” a ti a.#Lk. 1:19,26. 17Ka dinna bulah a lo kal a, ka hlau êm a, ka tlu bawkkhup ta a. “Mihring fapa, i thil hmuh kha khawvêl tâwp hun tûr entîrna a ni tih hre rawh,” mi ti a.

18Thu a sawi lai chuan eng mah hre lovin leiah ka tlu bawkkhup a; mahse, mi rawn chelh a, mi dintîr a. 19“Thinurna a lo thlen hun tûr ka hrilh dâwn che a ni, i thil hmuh hi khawvêl tâwp hun tûr thil a ni. 20Ki pahnih nei berâmchal i hmuh kha Media leh Persia lal entîrna a ni. 21Kêlchal hmul thum kha Grik lal entîrna a ni, a mit inkâra ki sei tak kha an lal hmasa ber entîrna a ni. 22Ki tliak ta aiawh tûra ki pali lo chawr khân Grik ram hmun li-a inṭhen tûr a entîr a; amaherawhchu, lal hmasa ber ang khân an chak lo vang.

23“Chûng ram lalte an tlâwm dâwn hunah,

An sual vâwrtâwp thlen dâwnin

Râl rêl thiam tak a lo kal ang.

24Thil a tithei hle dâwn a,

Engkim a tichhe rem rum ang.

A tih apiangah a hlawhtling ang a,

Hnam tam tak a tichhia ang a,

Hmun Thianghlim chungah pawh a che ang.

25A fin a kherek êm êm a, vervêk taka a thiltihte a hlawhtling zêl a,

A inngairopui hle ang a,

Inring hman lote a bei ang a, a tichhia ang,

Hotute hotu meuh pawh a cho vang.

26“Zîng leh tlai tin thilhlan an hlan ṭhin chungchâng inlârna i hmuh kha a lo thleng ngei ang a; amaherawhchu, i thil hmuh hi i zêp tlat tûr a ni, rei tak hnua lo thleng chauh tûr a ni si a,” a ti a.

27Kei, Daniela hi ka chau dêr a, ni eng emaw zât chu ka dam lo va. Ka thawh peih hnu chuan lal hna chu ka thawk zui leh ta zêl a; mahse, ka thil hmuh avâng chuan ka bo map a, a ngaihna rêng ka hre lo.

Currently Selected:

DANIELA 8: MIZCLBSI

Highlight

Copy

Compare