AMOSA 6
6
1Zion tlânga nuamti taka awm der dera,
Samari tlânga thawveng taka awm veng vengte,
Hnam azawnga hnam ropui Israel,
An milian, mipuiin an pan ṭhinte chan tûr chu
A va râpthlâk dâwn êm!
2Kalne khuaah kal ula, hawi vêl rawh u,
Hamat khaw ropuiah kal leh ula,
Filistia khua Gath-ah chhuk thla teh u,
Judai leh Israel ram aiin an ram chu a ṭha zâwk em ni?
Zauh pawh a zau zâwk em ni?
3Hun ṭha lo, lo thleng mai tûr lakah hian
I inchhungêng vei a,
I awm dân hian i chhiatna tûr a tihnai sauh a ni.
4Saingho khuma#6:4 Sainghova chei khum a ni. mua,
Ṭhutna dûpa ṭhu zâla,
Berâm rual zînga a no thlan chhuah sa leh
Bâwngno chum sa ei ṭhînte u,
5Perhkhuang nêna hla lênglâwng saa,
Davida anga phuah belh zêlte u,
6Zu no lian pui pui dawma,
Hriak rimtui inchulha,
Jakoba thlahte vânduaina pawi tihpui hauh si lote u,
In chan tûr chu a va râpthlâk êm!
7Chuvângin, sala hruai hmasak ber in ni ang a,
Nuam tâwla in ri bûng bûng chu a tâwp ang.
8Engkim Lalpa chuan a hming chhâlin heti hian a ti:
“Jakob-ho chapona ka ten a,
An in ṭha pui puite ka ngaimawh a ni.
An khawpui chu a chhûnga awm nên ka mantîr vek ang,”
Tih hi Lalpa, Engkim Pathian thuchhuak a ni.
9Thi bâng in pakhatah mi sâwm tawm khâwm mah se,
An thi tho vang.
10Laina#6:10 Heb. ‘Pa mi’ tihna a ni âwm e, ‘hâlral hlansaktu’ a ni. ruang hlâwmtuin ruang a rawn lâk dâwnin in chhûngrila awm hnênah, ‘Awm a la awm em?’ a ti ang a.
Ani chuan, ‘Awm tawh lo,’ a lo ti ang.
‘Ngawi#6:10 LALPA hming an lam chuan a lo hre hlauh ang a, a hrem bâk pawh a rawn hrem ang tih an hlau a ni âwm e. hlauh rawh, Lalpa hming kan lam palh ang e,’ a ti ang.
11Ngai teh, Lalpa chuan thu a pe a,
“In ropuite chu a chhe rem rum ang a,
In tête pawh a sawm vek ang.
12Lungpui hmunah sakawr a tlân ngai em ni?
Chutah chuan bâwngin lei a let ngai em ni?
Nangni zawng, in rorêl chu tûr ang a ni a,
Dikna ṭhatna chu thil khaah in chantîr a,
13Lo-debar#6:13 He khaw tê tak hming hi ‘eng mah tham lo’ tihna a ni. khaw tê tak tê chu in la a,
in chhuang hle a,
‘Karnaim#6:13 He khua pawh hi khaw tê tak tê bawk a ni a, a hming hi ‘ki’ tihna a ni, chak leh thiltithei sawina. khua pawh la thei khawpin kan chak,’ in ti a;
14Ngai teh u, Israel chhûngte u, nangmahni bei tûrin,
Hnam dang ka rawn tîr dâwn,
Hmâr lam Hamat aṭanga Araba phai
Thlengin an tiduhdah ang che u,”
Lalpa, Engkim Pathian thuchhuak chuan a ti.
Currently Selected:
AMOSA 6: MIZCLBSI
Highlight
Copy
Compare
Share
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
