1 TIMOTHEA 6

1Chhiahhlawh, bawih nghâwngkawl bâtte chuan an pute chu kawng engkimah an zah tûr a ni, chuti lo chu Pathian hming leh kan zirtîrna hi sawichhiat a ni dah ang e. #Tit. 2:9,10. 2Bawih, Kristian pu neite chuan rinnaa unau an nih denchhenin an pute chu an ngainêp tûr a ni lo, ṭha lehzualin rawng an bâwlsak zâwk tûr a ni; an rawngbâwlsakte nên rinna leh hmangaihnaa chhûngkhat an ni si a.

Hêng hi i zirtîra, i fuihna tûr chu a ni. 3Tu pawh kan Lalpa Isua Krista thutak leh sakhaw zirtîrna thu dik chu kalha zirtîrna danglam zirtîr chu, 4mi â, intivei tak, eng mah hre si lo an ni; sawihnâwm tûr zawn thiam tak, inhnial châk hliah hliah, inîtsîkna te, innghirnghona te, Pathian pawi sawi te leh thu inchuh tâwpintai nei lo chawk chhuaktu an ni; 5rilru chhe tawh, thu dik man pha tawh lo, sakhua hi hausak nâna hman tumte an ni.#2 Tim. 3:8. 6Mahni ta-a lungawite tân chuan sakhaw mi nih hi a hlâwk êm êm rêng a ni. #Heb. 13:8; Fil. 4:11. 7Khawvêlah hian eng mah kan luhpui lo va, eng mah kan chhuahpui thei dâwn bawk hek lo. #Thuh. 5:14,15; Job. 1:21. 8Ei tûr leh silh tûr kan neih chuan kan tân a tâwk a ni. #Thuf. 30:8. 9Hausak duh mite chu thlêmnaah an lût a, duhâmna âtthlâk, thang hlauhawm takah chuan an âwk a, an chhiat phah a, an boral ṭhîn a ni. #Thuf. 23:4; 28:22. 10Tangka sum ngainat hi sual tinrêng bul a ni, sum ngah an tumna lamah ṭhenkhat chuan rinna hi an pênsan a, lungngaih sawi sên lohvin mahni an intina ta a ni.

Rinna ṭan thu

11Nang, Pathian mi, chûng chu tlânsan la, dikna te, sakhaw ngaihsakna te, rinna te, hmangaihna te, dawhtheihna te, nunnêmna te neih tum tlat zâwk rawh. 12Rinna hlu tak hi ṭanin theihtâwp chhuah ang che; chatuan nun chu vuan tlat la, chumi chang tûr chuan koh i ni a, hretu tam tak hmaah rinna hi i pawm thu i puan kha.

13Engkim nunna hnâr, Pathian leh Krista Isua, Pontia Pilata hmaa hlau hlek lova thu dik ṭan tlattu hmaah chuan, #Jn. 18:37. 14i tih tûra ruat chu rinawm taka ti tûrin thu ka pe a che. Kan Lalpa Isua Krista lo lan leh hma chu bawlhhlawh kai lo leh sawisêlbovin awm rawh. 15Fak tlâk Pathian, engkim chunga thu neitu awm chhun, lalberte Lalber, lalte Lal chuan a hun takah Krista chu a rawn lantîr dâwn si a. 16Amah chauh hi thi thei lo, hnaih theih rual loh ênga chêng, tu ma la hmuh loh leh hmuh theih loh ni bawk chu a ni, a hnênah chuan chawimawina leh thiltihtheihna chatuanin awm rawh se. Amen. #Exod. 33:20.

17Khawvêl mi hausate chu inchhuang lo tûrin hrilh la, sum rin tlâk loh rin chhan tum lova engkim kan hman atâna min petu Pathianah innghat zâwk tûrin fuih rawh. #Sam. 62:10. 18Thil ṭha ti tûr te, thil ṭha tiha hausa tûr te, phal taka mi dangte sem ve chîng tûr tein fuih bawk rawh. 19Tichuan, nakin atân ro hlu tak an insiamsak a ni ang a, nunna tak tak chu an chang dâwn nia.

20Aw Timothe, i kova innghat hi vawng fimkhur hle ang che, ‘hriatna dik’ tia an chhâl, dik si lo, thu inkalh si, khawvêl mi tam takin an khûkpui ṭhin lakah khân inthiarfihlîm rawh; 21ṭhenkhat chuan an zâwm ve a, rinna kawng aṭangin an bo ta a ni. Pathian khawngaihna in hnênah#6:21 Mss ṭhenkhatah ‘i hnênah tih’ a ni a, a ṭhenah ‘Amen’ tih a tel bawk. awm rawh se.

Currently Selected:

1 TIMOTHEA 6: MIZCLBSI

Highlight

Copy

Compare