LUK 24
24
Jesu Hangring
(Met 28.1-10; Mk 16.1-8; Jhn 20.1-10)
1Aafhuwnii ziing imaenphik nache rupanuw aenche embathongsah barim ningsiihnii yntaehfhuw chiaeka thaenkung ipha ing vaksae. 2Changvakonchu enuw ing thaen kamnii rungchu ymmong vasah ing envephapa, 3enuw ing asungting envaruwhtah nache ahakchaangchu tuwhmahsae. 4Chukhaenache enuw ing utingva ta aeka embarungriirna fhuwm abavae raenche enruw, ivaarjaeh peen enii pasar meeniimeh embuumna vangiirsae; 5amana enuw ing engaanchik lamher ing ruwruwting engkhuptah nache pasar meeniimeh aenche eningna enriir, “Ithii ae kaartanii ihangringchu nenuw ing ynchii khaena nenjongva? 6#Met 16.21; 17.22,23; 20.18,19; Mk 8.31; 9.31; 10.33,34; Luk 9.22; 18.31-33Jesu ing Galili na aonglae neningna ajeer chongkha yndenruw: 7Mee Sapa chu isii icher mee ae kik charnaka khros na thehvaatae, amanche inii avomanthumnii nache hangring vaata taka ariir vasahva.”
8Amana enuw ing changlaennii chongjeerchu engaansiipa, 9chutah-nache enuw ing thaenkung tanii hunganri aeka mee suum arii yngkheh ae ningna vokhehkho reentaang ae ningnakho enriirpa. 10Enuw ae chuve, Meri Magadalen re Johana, amanche Jakop amnuw Meri, enuw ynthummeh ipae; enuw thoh ynruwpoh ae rupanuw aengkho achongthang ae ningnache ariirpae; 11changvakonchu enuw enchongchu ikaanii mahva ichii ing manden aeka, enuw ing thacha mahsae. 12Changvakonchu Pitar inchembe hangiirka thaenkung phanii ing vataensa, ama ing kiimka thaenchu aabuwrtah nache, limon peen chupang amupa; chutah nache ama aruwriimka eenting hunganrisa.
Emmos ting Isiae
(Mk 16.12-13)
13Ama iniirem nache enuw engkaar tanii meeniimeh inche Jerusalem na ing meil sarii yndah Emmos khuw phanii inche isiae, 14amana enuw ing isuwh vasah thaminchu entonghak. 15Enuw ing yngkheh yngkheh chong ynsii aeka emanseer raenche, Jesu ing hempha aeka enuw thohche sihaksae. 16Changvakonchu enuw ing Jesu chu mukhang ae nare manghuwcheh mahsae. 17Amana Jesu ing eningna ariir, “Nenuw nensinii baram ing yngkheh yngkheh chong nemanseer i ynchiiva?”
Amana enuw ening idimpak inche ngiirsae. 18Changlaenche Kliopas ichii mee yngkheh inche Jesu chu abasangpa, “Ataraensiim Jerusalem na isuwh vakhae i namanghuwmah lamkhii tanii ivasipeh mee vachii?”
19Jesu ing eningna asii ae, “ynchii isuwhva?”
Enuw ing aningna enriir, “Thang-nang re mee vakhae maanache nongna vokhehkho chongna ruwreng ipirpak aningna om jaephar Nazaret Jesu khaenava, 20amanche atakchu aanchung jaethiim aere lipah aapuh aeng ynsaangkhe Jesu chu ithiinii miraar piaeka khros taklina enthehva ichii khaena chenva. 21Changvakonchu kenuw inchembe Isrel jaatichu karvachii meeva ta ungka kemandensahva. Chumna hava nong vakhae takline asuwhnii i ataniinii inge inii nithum ahenphava. 22Amanche kenuw kengkaar tanii rupanuw topoh aengkho thaenkung ting imaen ing vak aeka kenruw amanriimpae; 23vokhehkho enuw ing Jesu ahakchaangchu entuwhmahtah nache, Jesu chuve hangringsa ichii chong enriir vaarmee aechu emik ruvaamna emu ing enriir ae. 24Kenuw thoh ynruwpohchak ung achuw yngkheh aenche thaenkung tingche vak aeka amana rupanuw aeng enriir vaangche envamupa, changvakonchu Jesu chuve mumahsae.”
25Amana Jesu ing ariir, “Ipang mee ae, Thangnang jaephar aeng enriir vakhaechu nenbarungriirna thacha itap mee ae! 26Khrista inche ijachaam khaangnaka ama alaar isa tingche hungruwhrem vachiimah vakhang?” 27Amana Mosi na ing jaephar chaap ae phana ing basenka Jesu ataksah khaena ynthiing thiimziih chaapna ynthin vakhaechu ynchii achiiniiva ichiichu eningna ariirpeehpae.
28Chukhaenache enuw ing envasinii khuwchu envepha phanache, Jesu ing yndahseh ting sivachii pangeng ichii ing atupa, 29amana enuw ing enriir, “Atii khuri jungvisa vokhehkho hungmanthimsa. Chukhaenache kenuw thoh cheenghak taruw ta aeka engkhaam.” Amatah nache ama ing enuw thohche cheenghaksa. 30Ama ing enuw thohche isahhaknii khaena ongka, tarchu verika bor apeehpa; amana tarchu bakhiika eningnache ajepeehpae. 31Changlaenche emikchu ymmongka enuw ing atakchu emanghuwpa, changvakonchu ening-tanii ama yndangmahsa. 32Enuw ing enareerna enriir, “Ama ing lamna chong ibuwhka ynthiing thiimziih ynriirpeeh raenkhe ymbarungriir sungna mi ichuwngvaang tamahkhang?”
33Chutahnache enuw ing hangiir aeka Jerusalem ting ynrisae, amanche enuw ing sebok suum arii yngkheh ae thohre reentaang areh mee ae yntuwhfhuw aeka 34vokhehkho enriir, “Aafhuw kha hangring tataksa! Ama ing Simon ningna yndangsa!”
35Meenii aenche lamna ensirae isuwh vokhehkho ama ing tar abakhiirae emanghuw chehchu eningnache enriirpa.
Jesu ing Asebok ae ningna Yndang
(Met 28.16-20; Mk 16.14-18; Jhn 20.19-23; Nong 1.6-8)
36Meeniimeh aenche havi eningna enriir raenche, Jesu ing engkaar nache vangiirka eningna ariir, “Idaechu neningna omrasiing.”
37Changvakonchu enuw ing lae kemu varammuw ta aeka ynchiksae. 38Amana eningna ama ing ariir, “Ynchii khaena nenuw ynchik vachuw? Ynchii khaena nenbarungriirna nen-chingniiva? 39Enruw kakik kakhi ae i, ki remping. Ipar nuwna enruw; lae chuve hakchaang re ruw aningna omah, nenuw ing muchehva nenta ki chuve omna.
40Havi riirka ama ing eningnache akik re akhichu amansiipae. 41Enuw enrotha iroh re ingik aethoh thachacheh mahsae; chukhaenache ama ing eningna asiipae, “Nenuw hane isahfhuw nendeense?” 42Enuw ing iminvasah nga arekhehchu enjepeehpa, 43Ama ing verika emaekung nache asahpa.
44Aanuwnache ama ing eningna ariir, “Haviva ki ing nenuw thoh kaonglae neningna kariir chong vakhaekha; Mosi vajeer chonghak na vokhehkho Jaephar aeng amanche ympahnii la nache kakhaena ynziih vakhaechu ahungchumnii chuva.”
45Changlaenche ama ing ynthiing thiimziihchu emanghuw chehnii inche envakhar aamongpa, 46amana eningna ariir, “Haviva ynziihka omchu: Khrista inche ijachaam phanaka, animanthumnii nache ithii tanii hangring vaata. 47Amana barungriir huungnii re isiicher kuhniichu aruming nache Jerusalem na basen naka Jaat aangkhengna yntong vaata. 48Nenuw ing nemu vakhae havi apham aangkhengna riirva nenchiiva. 49#Nong 1.4Enruw, kapa ing chongreep atuchu, ki ing neningna jenbathen vakata; changvakonchu nenuw ing chungtanii ruwrengchu nengaraang mahtaang khuwruung nache hahjaehruw.”
Jesu Thangbaen ting Ajeki
(Mk 16.19-20; Nong 1.9-11)
50 #
Nong 1.9-11
Aanuwnache ama ing enuwchu Bethani phanii ing aruwpae, amana akik ithohka ama ing enuwchu bor apeehpae. 51Ama ing enuwchu bor apeehraenche, enuwchu bathenka vokhehkho thangbaen ting atakchu ajekipa. 52Amana enuw ing inempak enrotha iroh ing Jerusalem ting ynrisae, 53amanache enuw ing ympehrudeh ing rumniieen nache Thangnang emanpah.
Currently Selected:
LUK 24: MOYO
Highlight
Share
Copy
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.