LUK 23
23
Jesu chu Pilaat ningting Enghenruw
(Met 27.1-2,11-14; Mk 15.1-5; Jhn 18.28-38)
1Mee vakhae aenche hangiir aeka, Jesu chu Pilaat ningting enruwpa. 2Enuw ing Jesu chu miraar piaeka enriir, “Hava pasar inge kemee chaap vakhae ningna Kesar ningting ree ipeeh rumahka ichummah ting aruwnah, amanche ataksah ingkho Khrista iruwng chuping taka ariirchu kenuw ing ataklina kentuwhpa.”
3Pilaat ing Jesu chu chong asii, “Nang Jehudi ae iruwng vachii?” Jesu ing abasang, “Nang ing nariirpa.”
4Amana Pilaat ing aanchung jaethiim aere mee changjaeh inem ae ningnache ariir, “Ki ing hava mee takline amiraar ynchiikho tuwhmah ing.”
5Changvakonchu enuw ing aacheh yngen aeka ithipak ing enriir, “Ama ing Galili na ing havi ipha inge, Judia mee vakhae ningna manchuwka iraang abasuwhniinah.”
Jesu chu Herot ningting Enjebathen
6Ama chongchu Pilaat ing asiitah nache mee havi Galili taniiva taka arudehpa. 7Ama ing Jesu i Herot ing apuh paam derna ong meeva ichii amanghuw tahnache, Herot ning-ting ajebathenpa. 8Herot inche Jesu chu amutah nache inempak arotha rohsa, ama ing Jesu khaena chong asii khaenache apha iseehpak ing muningka achii, vokhehkho Jesu ing ruwriimnii laetho tunaka mukata ichii ing amanden. 9Chukhaenache ama ing Jesu ningna chong inempak asii; changvakonchu Jesu ing aningna ynchiikho basang mahsa. 10Changlaenche aanchung jaethiim aere thiimthang aenche Jesu taklina ichummah chong aajaeh riir aeka ingiir ae. 11Amana Herot vokhehkho alaarchang aenche Jesu chu juum aeka emaniisahpa, vokhehkho iruwng peen manvi aeka athar Pilaat ningting enghenbripa. 12Ama inii nache Herot re Pilaat ynchaarsae; ajae enuw meenii i yngensiimah aeka yngharpae.
Jesu chu Thehruw ichii Chong Apeeh
(Met 27.15-26; Mk 15.6-15; Jhn 18.39—19.16)
13Pilaat ing aanchung jaethiim aere upa vakhae ae vokhehkho mee aechu eenka 14eningna ariir, “Hava mee inge ichummah tingche mee aechu aruwnah tachuwka kaningting nenghenruwpa. Ki ing nemaekungna chong kasiitahna, nenuw ing nenriir chong inuwzii ingkhe mee havi takline amiraar yntanga tuwhmah ing; 15amanche Herot ingkho tuwhmahsa; chukhaenache Herot ing kaningting athar ahenbripa. Enruw, ithii phavachii nong ama ing yntangakho tumahsa. 16Chukhaenache ama i ki ing ichah ningka bathenva kata.” 17Akhaechuve havana kuurva sungne eningna Pilaat ing mee yngkheh ipimah arumahva. 18Changvakonchu enuw vakhae inche iruur yngkhehpang ing uung aeka enriir, “Hava mee i jenbasuw nana, kengkhaena Barabas kha bathenla.” 19(Barabas inge khuwruung sungna iraang basuwka vokhehkho mee atheh khaena kaeshum sungna ynsiihva.)
20Pilaat ing Jesu chu bathen ningka achiitah nache athar eningna ariirpareeh. 21Changvakonchu enuw ing athar uunglap uung aeka enriir, “Khros taklina jamla, khros taklina jamla.”
22Pilaat ing vathumchak ipha ing eningna ariir, “Ynchii khaenava, mee havi inge isamah ynchii tukhang? Ama ithehnii khaena ki ing amiraar yntangkho tuwhmah ing; chukhaenache ama i ichah ningka bathenva kata.”
23Changvakonchu enuw ing Jesu chu ijamnii khaena uunglap uung aeka amana enuw inche enchehpa. 24Chukhaenache enuw ing eniihsah inuwzii ing emandenchu itunii khaena Pilaat ing chong apeehpa. 25Amana iraang basuwka vokhehkho mee atheh kaeshum sungna asiihchu bathenla ta aeka enriir inuwzii ing amachu bathenka amanche Jesu chuve enuw ing emanden inuwzii ing eningting apeehpa.
Jesu Entheh
(Met 27.32-44; Mk 15.21-32; Jhn 19.17-27)
26Atii laarchang aenche Jesu chu enghenruw raenche Sairene paam tanii ivatheng Simon chu kiteeh aeka, amanche khros chu atuknung ting amandom hakpae.
27Mee inempak inche aanuw henjii aeka vokhehkho embarung ichum aeka ijachaampak ing ichapsah ae rupanuw ae ingkho Jesu aanuwchu ajiisah ae. 28Amana Jesu ing vaanlehka eningna ariir, “Jerusalem sanuw ae, ki kakhaena ichappeeh mahruw, nenuw nentaksah khaena vokhehkho nensiti ae khaena chapruw. 29Enruw, siti abaringmah miknii mahri ae, vokheh-kho nithen apeehmahri ae enuw aechu bor aphapae ta ae naka riirva enchii inii tha aphachu ahenphava! 30#Aman 6.16Changlaenche lamthing bung ae tingche kenuw kentaklina ibukpeehra amanche lamthing bukhoh ae tingche kenuwchu ibaruwsara ta ae naka enuw ing ichong basen vaatae. 31Akhaechuve enuw ing er thing takline havana nong ae i entu vanave, ichong taklina chencha ynchii suwhvaate?
32Isamah nongtu meenii ae chukho Jesu thoh itheh haknii khaenache enruwpa. 33Enuw ing Rukang ichii minchu enghungtung tahnache, enuw ing isamah nongtu meeniimeh aechu Jesu thohche yngkheh ing atachang ting amanche yngkheh ing atari ting khros na jopi hen aeka enjampae. 34Amana Jesu ing ariir, “Apa, enuw i kuhpeeh aera; enuw ing ynchii kentuva ichii emanghuwsah mahva.” Amana enuw ing Jesu peendiirchu sen aeka enlaepah engabuwrniipa. 35Changlae mee aenche ngiir aeka engen, changvakonchu Jehudi aapuh upa vakhae aeng chembe enerku hungthep vethep aeka, vokhehkho maniisa aeka enriir, “Ama ing mee aechu akarpeehva; atak i Thangnang ing aateer Khrista chu vanave, ataksah ing yngkarsa rasiing.”
36Laarchang mee aengkho Jesu abuumting vak aeka amen iraecharii ithuwrchii empeeh thoh ynruw ing maniisa aeka enriir, 37“Nang Jehudi ae iruwng vataniive, nataksah yngkarsara.”
38Jesu Khrista aruwchung nache havana chongtiim i ynziihka om: “Havi Jehudi ae iruwngva.”
39Khros taklina meeniimeh enjam yngkheh ing Jesu ningnache ithipak ing chongka ariir, “Nang Khrista chumah vachiikhang? Natak sahkho yngkar nana amanche kenuw chukho ikarla.”
40Changvakonchu yngkheh inchembe rukuhka ariir, “Nang Thang-nang nachiimahva? Nang amathoh aanghakjaeh ing phava nachiichu naphava. 41Inuw chuve ichumchak ing iphapham isuwh ymphava; akhaechuve inuw ing yntu ynrisah inuwzii ing ymphava; changvakonchu ama ive isamah tangmah yngkheh pangkho tumah.” 42Amana Jesu ningna ama ing ariir, “Jesu, Iruwng ing napaar raenche kichu eensiisaro achii.”
43Jesu ing aningna ariir, “Ki ing naningna kariirnah, atanii nang ki thoh Paradais nache onghak vaata.”
Jesu Ithii
(Met 27.45-56; Mk 15.33-41; Jhn 19.28-30)
44Changlaenche aphachu kuruk ita, amanche inii irengchu apha eekuw atakmahri raentaangche duwrpohka paam aangkheng manthimpohsa; 45vokhehkho Rumniieen sungna laedenpeen chukho achimbangna ynsiihsa. 46Amana Jesu ing ipirpak ing uungka ariir, “Apa, nakiklina kalaetha i kamansirsahnahchii!”
47Changlaenche laarchang mee chaama aapuh inche amachu amutahna Thangnang manpahka ariir, “Atatak ing mee havi ynthiing ichum mee varae.”
48Havi aanbuwr mee inempak itheng aenche isuwh vakhaechu emutahna, embarung ichum aeka yngkaesae. 49#Luk 8.2,3Amanche aanghuwfhuw vakhae aenche vokhehkho Galili tanii Jesu aanuw ajii vakhae rupanuw aenche laarkhehna ngiir aeka isuwh vakhaechu emupa.
Jesu Endim
(Met 27.57-61; Mk 15.42-47; Jhn 10.38-42)
50Atii Josep ichii aanchungpuh ae kaarna ynvae ichum itu mee yngkheh pasar om, 51atak i enuw ing entu enri nongchaap arumah Jehudi ae khuwruung Arimathia tanii itheng Thangnang iruwngpaam ahah mee yngkhehva. 52Hava pasar inge Pilaat ningting vakka Jesu ahakchaang avaniihpa. 53Amana Jesu hakchaangchu ama ing basumka amanche ynnaarjaeh peen ing iromka achuwkho endimniimahri rungkuw thaen nache Jesu chu asiihpa. 54Ama iniichu Thoraang itu Iniiva vokhehkho Deennii iniichu abasennii ahenphava.
55Jesu ing anruwfhuwchak ae Galili tanii rupanuw aeng aanuwchu jiiaeka Jesu athaen vokhehkho ahakchaangchu ynsaangkhe asiihse ichiichu engen; 56amana enuw ing hunganri aeka abarim isapak vokhehkho yntaehfhuw richiithou embathongpa. Deennii inii nachembe vajeer chonghak inuwzii ing enuw ongsae.
Currently Selected:
LUK 23: MOYO
Highlight
Share
Copy
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.