2 THESALONIA 3
3
1Achiniidehna kauw kanae ae, Aafhuw chong isachu neningna vaangkhe, ithupak ing aanjarnii ing vokhehkho alaar isachu ahang-ruungnii sehseh ing ithampeeh saruw. 2Amanche ichamah vokhehkho ichuwhmah mee ae tanii yngkarnii khaena ithampeeh saruw, akhaechuve mee vakhae ningna isa chongchu thachanii omkhom mahva.
3Changvakonchu Aafhuw chuve thachafhuwva, ama ing nenruwreng imanpirpeeh vaata vokhehkho isamah tanii ingahpeeh vaata. 4Kenuw ing kenriir vakhaechu nenuw ing nentusa vokhehkho hentuva nenta ta ungka neningna kenbarungriir kemangamsa.
5Aafhuw ing neningna Thangnang ningsiihchu ynghuwniiseh khaena vokhehkho ikhaangchehnii Khrista ing ympeeh ingkhe maen eensapeeh ynsuwhrasiing.
Nong Tufhuw
6Atii kauw kanae ae, nenuw vakhaechu Aafhuw Jesu Khrista rumingna chonghak kempeehnahchuw, amachuve thaachah mee ae vokhehkho kenriir chongchu amanziimah mee vakhae tanii nenuw asiksii ing tiingruw. 7Nenuw ing kentu kenri vasah nakhe ynsaangkhe manjiiva kenchiiva ichii nentaksah ing nemanghuwsa; akhaechuve kenuw ing nenuw thoh kengonglae nongtu ringmahdeh ung. 8Kenuw ing achuw yngkheh ningnakho ngareh ing isahfhuw samahdeh ung vokhehkho kenuw ing achuw mee yngkheh ningnache ija peehrik piniimah khaena siimjaen naeru inche ijachaam ikhaang thoh nong kentuva. 9Havi kenuw ing iphanii ruwreng keningna omah changchii mahva, changvakonchu kentu kenri inge mee ing ynziinii khaena aandangnii ynsuwhpung. 10Kenuw ing nenuw thoh kengonglae neningna hava chonghak vakhae i kempeeh vasah vachuw; achuw yngkheh ing ynriing ningka tamahnave isahkho samah rasiing.
11Nengkaarna ynriing ningka achiimah ynlenjaehka vokhehkho isahpang sakata achii omna ichii chong kensiisa. 12Changchii mee aechu idaejaeh ing ynriing ae sana sasa ae rasiing ichii khaena, kenuw ing Aafhuw Jesu Khrista rumingna chonghak kempeehchuw inge kengathohsah nahchuw. 13Changvakonchu kauw kanae ae, nenuw isa nong itutahna jaanung tamahdehruw. 14Achuw yngkheh ing kembaziih chongthen ne kenriirchu reehnave ama meechu buwtinruw amanche aning aanjaknii ing amathoh ynchaarhak mahruw. 15Changvakonchu eejeehniiva ichii ing rimahruw, ama changdenna nauw nanae yngkheh vaang ichahruw.
16Atiive idae Aafhuw inche apha vakhaena vokhehkho nenongtu chaapna idaechu ympeeh ynsuwhrasiing. 17Havana kaningtanii salaam ynziih i Pol kakikrap ing kabaziihva amanche kachongthen vakhae aandangniiva. 18Inuw vakhae Aafhuw Jesu Khrista atungsiih inche apha om vakhaena eenruwfhuw rasiing.
Currently Selected:
2 THESALONIA 3: MOYO
Highlight
Copy
Compare
Share
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
