2 THESALONIA 2
2
Ichamah Barungriir
1 #
1 Thes 4.15-17
Kauw kanae ae, atii Aafhuw Jesu Khrista juwngvachii iniina yngkongpoh manuwka yntuwhfhuw vaanchii khaenache kenthamsah nahchuw, 2amachuve laetha ing vakhangnare, chong ing vakhangnare, kembaziih ing vakhangnare, Aafhuw aaniichu thengsa ichii khaenache nenbarungriir fhuwm bavaeniimah rasii. 3Achuw tanga ingkho nenuwchu imanchaemah rasiing; akhaechuve yngkheh yngkheh laar yntuk ing maensa vaata, vokhehkho isii icher mee, imaangvasah ichamah inche aandangmahri raentaangche aniichu suwhmahrinii. 4Ama mee inche irumfhuw lae chaap chukho rumah naka, ataksah ing aanchung sehping tavaata; amachupang mahka Thangnang eenna ongnaka Thangnang ping tavaata!
5Ki ing nenuw thoh kaonglae havi khaena kariirkha nenuw nengaansii-mahva? 6Vokhehkho ataksahrap aanii nache aandangnii khaenache, atarae aakhaamchu nenuw ing nemanghuwsa. 7Akhaechuve vajeer chonghak amanziimah ingikniipak ingkhe ataraenkho nong atunah, changvakonchu ataraene aakhaam meechu aamphuwng mahri raentaang-che akhaamsah vatah. 8Vajeer chonghak amanziimah ichamah meekha yndangvaata, changvakonchu Aafhuw Jesu ing ajuwnglaenche aahuwh inche seemnaka mamaang vaata. 9#Met 24.24Vajeer chonghak amanziimah thengvachii umlae anong chuve aangkhenglaang ruwreng, ichummah buwtinnii vokhehkho laetho, 10amanche laethana ymmoh ae khaena ichummah mee manchaenii aangkhengchu ynruwfhuw vaata; enuw ing ikarpeeh phanii vokhehkho ichum ningsiihchu rimahsae, 11vokhehkho ichummahchu thachanii khaena, Thangnang ing entaklina ipirpak ynraar barungriir ajenbathenpa, 12chukhaenache ichumchu athachamah ae, ichummah nache nungae nungka enchii vakhaechu vajeer tuvaata.
Manlaenpeeh phanii khaena Eeteer
13Kauw kanae ae, nenuw nengkhaena apha vakhaenache Thangnang ympahchu kenongva, Thangnang ing nenuwchu aburna basenka laetha ajaarnache nemanthiingnii khaena vokhehkho ichumchu nenthacha inche ikarpeeh phanii khaena eeteerpa. 14Havi khaene nenuw ing inuw Aafhuw Jesu Khrista alaar isachu iphanii khaenache, kenuw ing isa chong kemanchuwchuw ajaarnache yngeenpa. 15Chuvanuwve kauw kanae ae, icheep inche ngiirruw, kenchongsae ing vakhangnare, kenchongthen ing vakhangnare, kemanchuw chuwkha icheep ing bachuw therruw.
16Atiive inuw Aafhuw Jesu Khrista ataksahrap ing vokhehkho inuw vakhae aning ymmansiih apa Thangnang ing ichen naemah rotharoh re ningmandenchu atungsiih ajaarna ympeeh inche nenbarungriir manpirnii rasiing, 17vokhehkho isa nong re chongsae vakhae inche imancheepther rasiing.
Currently Selected:
2 THESALONIA 2: MOYO
Highlight
Copy
Compare
Share
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
