Matie 28

Kujĩi Jesu hai si balɛ

(Cɔ Maaku 16:1-10; Luku 24:1-12; Zãa 20:1-10)

1Iyi ajɔi kusĩmiu í lɔ, ajɔ amaazuma daadaakɔ Maari inɛi Madalau do Maari iyi ihɔ̃ à bɔ balɛu ku cɔ. 2Ŋɔi gbakã ilɛ kuyaya nla gɔ í ce nɔ amalekai Ilaaɔ̃ gɔ í kita wa hai lele í naa í tale kutau wa buba si. 3Wajuɛ wa daana bɛi kuŋɔi ijĩ nɔ nyauɛ ŋa mɔ wa fũuta bɛi iwu tafa. 4Ŋɔi njo í mu woo degbe ŋau hee à waa yaya nɔ à cuku ilɛ bɛi iku ŋa. 5Ŋɔi amalekau í sɔ̃ inaabo ŋau í ni, iŋɛ, i maà jɔ̀ njo ku mu ŋɛ. Ǹ mà iyi Jesu inɛ iyi à kpakpa si jĩi ku gaauui ì waa dɛ ŋa. 6Kù wa ihɛ̃ má, í jĩ hai si balɛ si bɛi í tako í fɔu. I naa i cɔ bii í tako wa sũ wo, 7nɔ i sinda ńya ńya i koo i sɔ̃ mɔcɔɛ ŋa i ni, í jĩ hai si balɛ. Á cua nŋɛ ikpa Galilee. Bɛi aa yɔɔ ŋa. Iyi ǹ nɛ an sɔ̃ ŋɛ mbɛ.

8Ŋɔi à sinda ńya ńya hai bi balɛu do njo. Nɔ baa do iyi à waa ce njo fei à nɛ inɔ didɔ̃ nla nla má. Ŋɔi à sɛi à koo à sɔ̃ mɔcɔɛ ŋa laabaauu. 9Ŋɔi Jesu í kò ŋa í ni, i fɔɔ. Ŋɔi à sɛkɛɛ siɛ wa à naa à mu kutɛɛ à sɛɛbata si wajuɛ. 10Nɔ Jesu í sɔ̃ ŋa í ni, i maà jɔ̀ njo ku mu ŋɛ. I koo i sɔ̃ kpaasim ŋa a bɔ Galilee, bɛi aa yɛm.

Idei woo degbe ŋa

11Waati iyi à wa si kpãa à waa nɛu, inɛ gɔ ŋa si woo degbe ŋau à bɔ inɔ ilu à koo à sisia inɛ ngboi woo weei Ilaaɔ̃ ŋa mii iyi í ceu fei. 12Nɔ inɛ ngboi woo weei Ilaaɔ̃ ŋau à ce kutɔtɔɔ do inɛ ngboi Zuifu ŋau à busi njɛ nɔ à mua sooge ŋau fia nkpɔ gɔ, 13à sɔ̃ ŋa à ni, i sɔ̃ inɛ ŋa i ni mɔcɔɛ ŋa à naa idũ laja à naa à ce ilei ikuu waati iyi ì waa sĩ njoo ŋa. 14Bii ilu ilɛu í gbɔ ideu, à mà bɛi aa ka ce ku ba ku maà kpã ŋɛ iju. 15Sooge ŋau à gba fiau nɔ à ce bɛi à tɔɔ ŋau. Ŋɔi í jɔ̀ ideu í fangaa si inɔi Zuifu ŋa hee do nnyi fei.

Icɛ iyi Jesu í jɔ̀a mɔcɔɛ ŋa

(Cɔ Maaku 16:14-18; Luku 24:36-49; Zãa 20:19-23; Woo bɛ ŋa 1:6-8)

16Si anyii nŋu, mɔcɔ maatakã ŋau à bɔ Galilee nɔ à koo à ba Jesu si iri kuta bii í tako í sɔ̃ ŋa wou. 17Iyi à yɔɔ, ŋɔi à waa gulɛaa. Amma si inɔ nŋa inɛ gɔ ŋa à waa sika sika. 18Ŋɔi Jesu í sɛkɛɛ si ŋa wa í ni, yiikoi lele do ti ilɛ fei à nam nii. 19Na nŋu, i koo si dimi fei, i ce ŋa mɔcɔm ŋa. Nɔ i dasi ŋa inyi do irii Baaba do ti amu Amau do ti Hundei Ilaaɔ̃. 20Nɔ ide ŋa iyi ǹ sɔ̃ ŋɛ fei, i kɔ ŋa si ide ŋau ku jirima ŋa. Nɔ an maa n wɛɛ do iŋɛ ajɔ fei hee kɔɔi andunya.

Currently Selected:

Matie 28: MKL

Highlight

Compare

Copy